ଭୁବନେଶ୍ୱର,୨୧।୧(ବ୍ୟୁରୋ): ନିଖିଳ ଉତ୍କଳ କ୍ଷୁଦ୍ର ବ୍ୟବସାୟୀ ଓ ଭେଣ୍ଡିଂଜୋନ୍ ସୁରକ୍ଷା ଟ୍ରଷ୍ଟ, ନିଖିଳ ଓଡ଼ିଶା ରାସ୍ତାପାର୍ଶ୍ୱ ଉଠାଦୋକାନୀ ମହାସଂଘ ଓ ଜାତୀୟ ଉଠାଦୋକାନୀ ମହାସଂଘ ପକ୍ଷରୁ ଜାତୀୟ ଉଠାଦୋକାନୀ ଦିବସ ପାଳିତ ହୋଇଯାଇଛି। ଏହି ଅବସରରେ ହଜାର ହଜାର ଉଠାଦୋକାନୀ ମାଷ୍ଟର କ୍ୟାଣ୍ଟିନ ଛକରୁ ଏକ ବିରାଟ ଶୋଭାଯାତ୍ରାରେ ବାହାରି ରାଜମହଲ ଛକ ଦେଇ ଭୁବନେଶ୍ୱର ୟୁନିଟ୍-୧ସ୍ଥିତ ଫଳ ଭେଣ୍ଡିଂଜୋନ୍ ନିକଟରେ ପହଞ୍ଚତ୍ଥିଲେ। ସେଠାରେ ଏକ ସାଧାରଣ ସଭା ଅନୁଷ୍ଠିତ ହୋଇଥଲା। ଉଠାଦୋକାନୀ ମହାସଂଘର ପ୍ରତିଷ୍ଠାତା ସଭାପତି ପ୍ରତାପ ସାହୁଙ୍କ ପୌରହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଏମ୍ସି ମେୟର ସୁଲୋଚନା ଦାସ ଯୋଗଦେଇ କହିଲେ, ଭୁବନେଶ୍ୱରରେ କିଛିଦିନ ହେବ ବହୁ ଉଠାଦୋକାନୀଙ୍କୁ ଉଚ୍ଛେଦ କରାଯାଇଛି, ଫଳରେ ସେମାନେ ଜୀବିକା ହରାଇଛନ୍ତି। ଏବେ ମଧ୍ୟ ସେମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ବିଏମ୍ସି ସେମାନଙ୍କ ଅସୁବିଧାକୁ ଦୃଷ୍ଟିରେ ରଖି ଖୁବ୍ଶୀଘ୍ର ୩୬ଟି ଭେଣ୍ଡିଂଜୋନ୍ ମାଧ୍ୟମରେ ଉଠାଦୋକାନୀଙ୍କୁ ଥଇଥାନ କରାଯିବ। ଅବଶିଷ୍ଟ ଦୋକାନୀଙ୍କୁ ପର୍ଯ୍ୟାୟକ୍ରମେ ଥଇଥାନ କରାଯିବ। ଭେଣ୍ଡିଂଜୋନ୍ଗୁଡ଼ିକରେ ପାନୀୟ ଜଳ, ଶୌଚାଳୟ ଓ ପାର୍କିଂର ବ୍ୟବସ୍ଥା ମଧ୍ୟ କରାଯିବ ବୋଲି ସେ କହିଥିଲେ। ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା କହିଲେ, ଭୁବନେଶ୍ୱର ହେଉଛି ସମସ୍ତଙ୍କର ସହର।
ଗରିବ, ଧନୀ ସମସ୍ତେ ଏଠାରେ ରହିବାର ଅଧିକାର ଅଛି। ଯଦି କୌଣସି ଦୋକାନୀ ଅସୁବିଧାରେ ପଡ଼େ, ଆମ କର୍ପୋରେଟରଙ୍କୁ ସହଯୋଗ ମାଗିଲେ ସହଯୋଗର ହାତ ବଢାଇବେ। ମୁଖ୍ୟବକ୍ତା ଭାବେ ମହାସଂଘର ଉପଦେଷ୍ଟା ତଥା କଟକ ମେୟର ସୁବାସ ସିଂ କହିଲେ, ଉଠାଦୋକାନୀଙ୍କ ଅଧିକାର ପାଇଁ ଆନ୍ଦୋଳନ କରି ବହୁବାର ମୁଁ ଜେଲ୍ ଯାଇଛି। କଟକରେ ଉଠାଦୋକାନୀମାନେ କିଭଳି ଥଇଥାନ ହୋଇପାରିବେ, ଟାଉନ ଭେଣ୍ଡିଂ କମିଟି ଓଡ଼ିଶାର ପ୍ରତ୍ୟେକ ସହରରେ କିପରି ଗଠନ କରାଯିବ ତାହା ଉପରେ ଆଲୋକପାତ କରିଥିଲେ। ସମ୍ମାନିତ ଅତିଥି ଭାବେ ବିଏମ୍ସି ଷ୍ଟାଣ୍ଡିଂ କମିଟି (ପ୍ଲାନିଂ, ସାନିଟେସନ, ୱାଟର ସପ୍ଲାଏ)ର ଚେୟାରମ୍ୟାନ ବିରଞ୍ଚତ୍ ନାରାୟଣ ମହାସୁପକାର ଯୋଗଦେଇ ଉଠାଦୋକାନୀଙ୍କୁ ସମସ୍ତ ସୁବିଧା ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଥିଲେ। କର୍ପୋରେଟରମାନେ ଉଠାଦୋକାନୀଙ୍କ ସମସ୍ୟା ପ୍ରତି ଦୃଷ୍ଟି ଦେବେ ବୋଲି କହିଥିଲେ। ଏହି ଅବସରରେ ମହାସଂଘର ମୁଖପତ୍ର ‘ଆଶା’କୁ ଅତିଥିମାନେ ଉନ୍ମୋଚନ କରିଥିଲେ। ୬୭ଟି ୱାର୍ଡ଼ର ୧୬୪ ସଂଘ ତଥା ୬୦ଟି ଭେଣ୍ଡିଂଜୋନର କର୍ମକର୍ତ୍ତା ଉପସ୍ଥିତ ଥିଲେ। ସାଧାରଣ ସମ୍ପାଦକ ଅନୁଜ କୁମାର ପ୍ରଧାନ ଧନ୍ୟବାଦ ଦେଇଥିଲେ।