ଟ୍ରେନରେ ଟଏଲେଟ୍ ବା ଶୌଚାଳୟ ଖରାପ ହେବା ସାଧାରଣ କଥା। ଯଦି କୌଣସି ଟ୍ରେନର ଶୌଚାଳୟ ଖରାପ ହୁଏ ତେବେ ଯାତ୍ରୀମାନେ ଅନ୍ୟ ବଗିରେ ଥିବା ଶୌଚାଳୟକୁ ଯାଆନ୍ତି। କିନ୍ତୁ ଥରେ ଭାବିଲେ ମଝି ଆକାଶରେ ଯଦି ବିମାନର ଶୌଚାଳୟ ଖରାପ ହୁଏ ତେବେ ଯାତ୍ରୀମାନେ କ’ଣ କରିବା ଉଚିତ୍, ସେମାନେ କେଉଁଠିକି ଯିବା ଉଚିତ? ଆଜିକାଲି ଏପରି ଏକ ଘଟଣା ଚର୍ଚ୍ଚାରେ ରହିଛି। ବାସ୍ତବରେ ବାଲିରୁ ବ୍ରିସବେନ ଯାଉଥିବା ଏକ ଭର୍ଜିନ ଅଷ୍ଟ୍ରେଲିଆ ବିମାନରେ, ଶୌଚାଳୟ ଖରାପ ହେବାରୁ ଯାତ୍ରୀମାନଙ୍କୁ ବୋତଲରେ ପରିସ୍ରା କରିବାକୁ ବାଧ୍ୟ କରାଯାଇଥିଲା। ଏହି ଘଟଣା ଗତ ସପ୍ତାହରେ ଘଟିଥିଲା, ଯାହା ଏବେ ଚର୍ଚ୍ଚାକୁ ଆସିଛି।
ଏକ ରିପୋର୍ଟ ଅନୁଯାୟୀ, ବୋଇଂ ୭୩୭ ମ୍ୟାକ୍ସ-୮ ରେ ପରିଚାଳିତ ଏହି ବିମାନ ଅପରାହ୍ନରେ ଡେନ୍ପାସରରୁ ବ୍ରିସବେନ ପାଇଁ ଛାଡ଼ିଥିଲା, କିନ୍ତୁ ଉଡ଼ାଣର ଶେଷ ତିନି ଘଣ୍ଟା ଯାତ୍ରୀମାନଙ୍କ ପାଇଁ ଏକ ଦୁଃସ୍ବପ୍ନରେ ପରିଣତ ହୋଇଥିଲା ଯେତେବେଳେ ସେମାନଙ୍କୁ ବୋତଲରେ ପରିସ୍ରା କରିବାକୁ ବାଧ୍ୟ କରାଯାଇଥିଲା। ପରିସ୍ରାର ଗନ୍ଧ ଯୋଗୁ ପରିସ୍ଥିତି ଅସହ୍ୟ ହୋଇଯାଇଥିଲା। ଯାତ୍ରୀମାନେ ଏହି ଅଭିଜ୍ଞତାକୁ ଅପମାନଜନକ ଏବଂ ଦୁଃଖଦ ବୋଲି ବର୍ଣ୍ଣନା କରିଥିଲେ।
ରିପୋର୍ଟ ଅନୁଯାୟୀ, ରକ୍ଷଣାବେକ୍ଷଣ ସମସ୍ୟା ଯୋଗୁ ଉଡ଼ାଣ ପୂର୍ବରୁ ପଛ ପାର୍ଶ୍ୱରେ ଥିବା ଏକ ଶୌଚାଳୟ ବନ୍ଦ ହୋଇଯାଇଥିଲା ଏବଂ ୬ ଘଣ୍ଟାର ଯାତ୍ରା ସମୟରେ ବାକି ଶୌଚାଳୟଗୁଡ଼ିକ ମଧ୍ୟ ଭାଙ୍ଗି ଯାଇଥିଲା, ଯାହା ଯାତ୍ରୀମାନଙ୍କ ପାଇଁ ସମସ୍ୟା ସୃଷ୍ଟି କରିଥିଲା। ଜଣେ ଯାତ୍ରୀ କହିଛନ୍ତି, ଜଣେ ବୟସ୍କ ମହିଳା ନିଜକୁ ନିୟନ୍ତ୍ରଣ କରିପାରିଲେ ନାହିଁ ଏବଂ ଏକ ସାର୍ବଜନୀନ ସ୍ଥାନରେ ପରିସ୍ରା କରି ଅପମାନିତ ହୋଇଥିଲେ, କାରଣ ଉଡ଼ାଣ ମଝିରେ ସମସ୍ତ ଶୌଚାଳୟ ଫେଲ୍ ହୋଇଥିଲା। ଯାତ୍ରାର ଶେଷ ତିନି ଘଣ୍ଟାରେ କ୍ୟାବିନ କ୍ରୁ ଆମକୁ କହିଥିଲେ ଯେ, ଆମକୁ ବୋତଲ କିମ୍ବା କୌଣସି ଜିନିଷରେ ପରିସ୍ରା କରିବାକୁ ପଡ଼ିବ।
ଭର୍ଜିନ ଅଷ୍ଟ୍ରେଲିଆ ଉଡ଼ାଣ ମଧ୍ୟରେ ଯାତ୍ରୀମାନଙ୍କୁ ହୋଇଥିବା ଅସୁବିଧା ପାଇଁ କ୍ଷମା ମାଗିଛି ଏବଂ ଏହି ଚ୍ୟାଲେଞ୍ଜିଂ ପରିସ୍ଥିତିର ମୁକାବିଲା କରିବା ପାଇଁ କ୍ରୁଙ୍କୁ ମଧ୍ୟ ପ୍ରଶଂସା କରିଛି। ସେହି ସମୟରେ ଏୟାରଲାଇନ ପ୍ରଭାବିତ ଯାତ୍ରୀମାନଙ୍କୁ ଉଡ଼ାଣ କ୍ରେଡିଟ ଦେବାକୁ ପ୍ରତିଶ୍ରୁତି ଦେଇଛି। ଭର୍ଜିନ ଅଷ୍ଟ୍ରେଲିଆ ଏକ ବିବୃତ୍ତିରେ କହିଛି, ଗୁରୁବାର ସନ୍ଧ୍ୟରେ ଡେନପାସରରୁ ବ୍ରିସବେନ ଯାଉଥିବା ଭର୍ଜିନ ଅଷ୍ଟ୍ରେଲିଆର ଉଡ଼ାଣ ସମୟରେ ଏକ ସମସ୍ୟା ଦେଖାଦେଇଥିଲା, ଯାହା ଶୌଚାଳୟଗୁଡ଼ିକର ସେବାକୁ ପ୍ରଭାବିତ କରିଥିଲା। ଆମେ ଆମର ଅତିଥିମାନଙ୍କ ନିକଟରେ କ୍ଷମା ପ୍ରାର୍ଥନା କରୁଛୁ ଏବଂ ବିମାନରେ ଚ୍ୟାଲେଞ୍ଜପୂର୍ଣ୍ଣ ପରିସ୍ଥିତିର ମୁକାବିଲା କରିବା ପାଇଁ ଆମର କର୍ମଚାରୀଙ୍କୁ ଧନ୍ୟବାଦ ଦେଉଛୁ।