ନୂଆଦିଲ୍ଲୀ, ୧୧।୫: ଚାରି ଦିନର ତୀବ୍ର ଡ୍ରୋନ ଓ କ୍ଷେପଣାସ୍ତ୍ର ଆକ୍ରମଣ ପରେ ଭାରତ ଓ ପାକିସ୍ତାନ ଶନିବାର ସଂଧ୍ୟାରେ ଏକ ସମ୍ପୂର୍ଣ୍ଣ ଓ ତୁରନ୍ତ ଯୁଦ୍ଧବିରତି ପାଇଁ ରାଜି ହୋଇଛନ୍ତି। ଏହି ଘୋଷଣା ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ କରିଛନ୍ତି। ଟ୍ରମ୍ପ କହିଛନ୍ତି, “ଆମେରିକାର ମଧ୍ୟସ୍ଥତାରେ ରାତିସାରା ଆଲୋଚନା ପରେ ଭାରତ ଓ ପାକିସ୍ତାନ ଏକ ସମ୍ପୂର୍ଣ୍ଣ ଓ ତୁରନ୍ତ ଯୁଦ୍ଧବିରତି ପାଇଁ ରାଜି ହୋଇଛନ୍ତି।”
ସେ ଆହୁରି କହିଛନ୍ତି, ମୁଁ ଖୁସି ଯେ ଉଭୟ ଦେଶର ପାରସ୍ପରିକ ସହମତିରେ ଏହି ଚୁକ୍ତି ହୋଇଛି। ଟ୍ରମ୍ପ ଏହା ମଧ୍ୟ କହିଛନ୍ତି ଯେ ଆମେରିକା ଏହି ଐତିହାସିକ ଏବଂ ସାହସିକ ନିଷ୍ପତ୍ତି ନେବାରେ ଉଭୟ ଦେଶକୁ ସାହାଯ୍ୟ କରିପାରିବ। ମୁଁ ଭାରତ ଏବଂ ପାକିସ୍ତାନର ଦୃଢ଼ ନେତୃତ୍ୱ ପାଇଁ ବହୁତ ଗର୍ବିତ, ଯେଉଁମାନେ ସେମାନଙ୍କର ଶକ୍ତି, ଜ୍ଞାନ ଏବଂ ସାହସ ବ୍ୟବହାର କରି ସ୍ବୀକାର କଲେ ଯେ ଏହା ଯୁଦ୍ଧ ଉତ୍ତେଜନାକୁ ବନ୍ଦ କରିବାର ସମୟ, ଯାହା ଲକ୍ଷ ଲକ୍ଷ ଲୋକଙ୍କ ମୃତ୍ୟୁ ଏବଂ ଧ୍ୱଂସର କାରଣ ହୋଇଥାନ୍ତା। ଏଥିରେ ଲକ୍ଷ ଲକ୍ଷ ନିରୀହ ଲୋକ ପ୍ରାଣ ହରାଇ ପାରିଥାନ୍ତେ! ଆପଣଙ୍କର ସାହସିକ କାର୍ଯ୍ୟ ଆପଣଙ୍କର ଐତିହ୍ୟକୁ ଆହୁରି ମଜବୁତ କରିଛି। ମୁଁ ଆପଣ ଦୁହିଁଙ୍କ ପାଇଁ ଗର୍ବିତ…’।
ମୁଁ ଗର୍ବିତ ଯେ ଆମେରିକା ଆପଣଙ୍କୁ ଏହି ଐତିହାସିକ ଏବଂ ସାହସିକ ନିଷ୍ପତ୍ତିରେ ପହଞ୍ଚିବାରେ ସାହାଯ୍ୟ କରିପାରିବ। ଯଦିଓ, ଏହା ଉପରେ ବହୁତ ଆଲୋଚନା ହୋଇ ନ ଥିଲା, କିନ୍ତୁ ମୁଁ ଉଭୟ ଦେଶ ସହିତ ବାଣିଜ୍ୟ ବୃଦ୍ଧି କରିବାକୁ ଯାଉଛି। ଏହା ବ୍ୟତୀତ, “ହଜାର ବର୍ଷ ପରେ” କଶ୍ମୀର ସମସ୍ୟାର ସମାଧାନ ମିଳିପାରିବ କି ନାହିଁ ତାହା ଦେଖିବା ପାଇଁ ମୁଁ ଆପଣମାନଙ୍କ ଉଭୟଙ୍କ ସହିତ କାମ କରିବାକୁ ଚେଷ୍ଟା କରିବି। ଏହି ଚମତ୍କାର କାର୍ଯ୍ୟ ପାଇଁ ଭଗବାନ ଭାରତ ଏବଂ ପାକିସ୍ତାନର ନେତୃତ୍ୱକୁ ଆଶୀର୍ବାଦ କରନ୍ତୁ! ବୋଲି ଟ୍ରମ୍ପ କହିଛନ୍ତି।
ଭାରତ କହିଛି ଯେ ଏହି ଯୁଦ୍ଧବିରତି ପାକିସ୍ଥାନର ମିଲିଟାରୀ ଅପରେଶନର ଡାଇରେକ୍ଟର ଜେନେରାଲଙ୍କ ଫୋନ କଲ ପରେ ଶନିବାର ଅପରାହ୍ନ ୩:୩୫ରେ ନିଷ୍ପତ୍ତି ହୋଇଥିଲା ଏବଂ ଏହା ସଂଧ୍ୟା ୫ଟାରୁ କାର୍ଯ୍ୟକାରୀ ହୋଇଛି। କିନ୍ତୁ, ଏହାର କିଛି ଘଣ୍ଟା ମଧ୍ୟରେ ଭାରତ ଅଭିଯୋଗ କରିଛି ଯେ ପାକିସ୍ତାନ ଏହି ଯୁଦ୍ଧବିରତିର ଉଲ୍ଲଂଘନ କରିଛି। ଭାରତୀୟ ବୈଦେଶିକ ସଚିବ ବିକ୍ରମ ମିଶ୍ରୀ କହିଛନ୍ତି, “ଗତ ତିନି ଘଣ୍ଟା ମଧ୍ୟରେ ପାକିସ୍ଥାନ ଏହି ବୁଝାମଣାର ବାରମ୍ବାର ଉଲ୍ଲଂଘନ କରିଛି।” ଭାରତୀୟ ସୈନ୍ୟ ଏହାର “ଉଚିତ ଓ ଯଥାଯଥ” ଜବାବ ଦେଉଛନ୍ତି।
ଟ୍ରମ୍ପଙ୍କ ଘୋଷଣା ପରେ କଂଗ୍ରେସ ଏମପି ଶଶୀ ଥରୁର ପାକିସ୍ତାନ ଉପରେ କଟାକ୍ଷ କରି ଏକ ହିନ୍ଦୀ କବିତା ପୋଷ୍ଟ କରିଛନ୍ତି: “ଉସକୀ ଫିତରତ ହୈ ମୁକର ଜାନେ କୀ, ଉସକେ ବାଦେ ପେ ଯକୀନ କୈସେ କରୁ।” ଏହାର ଅର୍ଥ ହେଉଛି, “ତାର ସ୍ବଭାବ ହେଉଛି ପ୍ରତିଶ୍ରୁତି ଭାଙ୍ଗିବା, ତା’ର ପ୍ରତିଶ୍ରୁତି ଉପରେ କିପରି ବିଶାସ କରିବି?”
ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏବଂ ଉପ-ରାଷ୍ଟ୍ରପତି ଜେଡି ଭାନ୍ସ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପାକିସ୍ଥାନର ପ୍ରଧାନମନ୍ତ୍ରୀ ଶେହବାଜ ଶରିଫ, ଭାରତୀୟ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଏବଂ ପାକିସ୍ଥାନର ସେନା ମୁଖ୍ୟ ଆସିମ ମୁନିରଙ୍କ ସହ ୪୮ ଘଣ୍ଟା ଧରି ଆଲୋଚନା କରିଥିଲେ। ରୁବିଓ କହିଛନ୍ତି ଯେ ଏହି ଚୁକ୍ତି କେବଳ ଯୁଦ୍ଧବିରତି ନୁହେଁ, ବରଂ ଏକ ନିରପେକ୍ଷ ସ୍ଥାନରେ “ବିସ୍ତୃତ ବିଷୟ” ଉପରେ ଆଲୋଚନା ଆରମ୍ଭ କରିବା ମଧ୍ୟ ଅନ୍ତର୍ଭୁକ୍ତ କରେ।