ନୂଆପଡ଼ା,୪ା୪ (ମକାରୁ ବେମାଲ):ନୂଆପଡ଼ା ଜିଲା ସିନାପାଲି କଲେଜରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜାଲ୍ ଶିକ୍ଷକ ନିଯୁକ୍ତି କରି ଦରମା ଟଙ୍କା ଆତ୍ମସାତ୍ କରିଥିବା ସିନାପାଲି ଥାନାରେ ଅଭିଯୋଗ ହୋଇଛି। ଅଭିଯୋଗ ଅନୁସାରେ ସିନାପାଲି ବ୍ଲକ ଗଣ୍ତାବାହାଲି ପଞ୍ଚାୟତ ଉଚ୍ଚ ବିଦ୍ୟାଳୟରେ ୧୯୮୭ ଜୁଲାଇ ୨୯ରୁ ଗଙ୍ଗାଧର ମେହେର ପିଇଟି ଶିକ୍ଷକ ଭାବେ ନିଯୁକ୍ତି ପାଇ କାର୍ଯ୍ୟ ତୁଲାଇ ଆସୁଛନ୍ତି। କିନ୍ତୁ କେହି ଜଣେ ତାଙ୍କ ନାମରେ ସିନାପାଲି କଲେଜରେ ପିଇଟି ଶିକ୍ଷକ ଭାବେ ମିଥ୍ୟା ଆବେଦନ କରି ଜାଲ୍ ରେଜୁଲେଶନ, ନିଯୁକ୍ତି ପତ୍ର, ଉପସ୍ଥାନ ଆଦି ତଥ୍ୟ ଦ୍ୱାରା ମିଥ୍ୟା ଚେକ୍ ନେଇ ୧୯୯୪ ଜୁନ ୧ରୁ ୧୯୯୬ ମାର୍ଚ୍ଚ ୩୧ ପର୍ଯ୍ୟନ୍ତ ସରକାରୀ ଅର୍ଥ ହଡ଼ପ କରାଯାଇଛି। ସେ ସମୟରେ ସିନାପାଲି କଲେଜରେ ଥିବା କମିଟି ଅଧ୍ୟକ୍ଷ ଓ କର୍ମଚାରୀ ଷଡଯନ୍ତ୍ର କରି ଏପରି କରିଥିବା ଅଭିଯୋଗ କରି ଗଙ୍ଗାରାମ ସିନାପାଲି ଥାନାର ଦ୍ୱାରସ୍ଥ ହୋଇଛନ୍ତି। ଅନ୍ୟପକ୍ଷରେ ଗଙ୍ଗାରାମଙ୍କ ନାମରେ ଦୁଇଟି ଅନୁଷ୍ଠାନରୁ ଅର୍ଥ ଆତ୍ମସାତ୍ କରି ଚାକିରି କରିଥିବା ଆରୋପ ଲଗାଇ ଓଡିଶା ସରକାରଙ୍କ ଶିକ୍ଷା ନିର୍ଦ୍ଦେଶାଳୟ ପତ୍ର ସଂଖ୍ୟା ୧୫୪୫୭, ତା୧୬ା୬ା୨୦୨୫ ଓ ଜିଲା ଶିକ୍ଷା ଅଧିକାରୀ ପତ୍ର ସଂଖ୍ୟା ୨୫୫ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ହୋଇଛି। ଏହାର ତଦନ୍ତ କରି ନ୍ୟାୟ ପ୍ରଦାନ ପାଇଁ ଗଙ୍ଗାରାମ ସିନାପାଲି ଥାନାରେ ଅଭିଯୋଗ କରିଛନ୍ତି। ପୋଲିସ ଏହାର ତଦନ୍ତ ଆରମ୍ଭ କରିଥିବା ଜଣାପଡିଛି।