ଚଣ୍ଡିଗଡ଼,୧୮।୧୦: ପଞ୍ଜାବର ସିରହିନ୍ଦ ରେଳ ଷ୍ଟେଶନ ନିକଟରେ ଏକ ବଡ଼ ଧରଣର ଟ୍ରେନ ଦୁର୍ଘଟଣା ଟଳି ଯାଇଛି। ଅମୃତସରରୁ ସହରସା ଯାଉଥିବା ଗରିବ ରଥ ଏକ୍ସପ୍ରେସରେ ହଠାତ୍ ଅଗ୍ନିକାଣ୍ଡ ଘଟି ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଛି। ଟ୍ରେନଟି ଅମ୍ବାଲାରୁ ଅଧ କିଲୋମିଟର ଦୂରରେ ଥିବା ସିରହିନ୍ଦ ଷ୍ଟେଶନ ନିକଟରେ ପହଞ୍ଚିବା ମାତ୍ରେ ଏହି ଘଟଣା ଘଟିଥିଲା। ଗୋଟିଏ କୋଚରୁ ଧୂଆଁ ବାହାରୁଥିବା ଦେଖି ଯାତ୍ରୀମାନେ ତୁରନ୍ତ ରେଳ କର୍ମଚାରୀଙ୍କୁ ସତର୍କ କରାଇ ଦେଇଥିଲେ। ଡ୍ରାଇଭର ବୁଦ୍ଧିମତ୍ତାର ସହିତ କାର୍ଯ୍ୟ କରି ତୁରନ୍ତ ଟ୍ରେନ ଅଟକାଇ ଦେଇଥିଲେ, ଯାହା ଫଳରେ ଏକ ବଡ଼ ଦୁର୍ଘଟଣା ଏଡାଇ ଯାଇଥିଲା।
ଘଟଣାଟି ସକାଳ ପ୍ରାୟ ସାଢ଼େ ୭ଟା ସମୟରେ ଘଟିଛି। ରେଳ ଅଧିକାରୀଙ୍କ ଅନୁଯାୟୀ, ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି ଏବଂ କୌଣସି ମୃତାହତ କିମ୍ବା ଆହତ ହୋଇଥିବାର ରିପୋର୍ଟ ହୋଇନାହିଁ। ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ, କିନ୍ତୁ ଯାନ୍ତ୍ରିକ ତ୍ରୁଟି କିମ୍ବା ସର୍ଟ ସର୍କିଟ ସନ୍ଦେହ କରାଯାଉଛି।
ଅଧିକାରୀମାନେ କହିଛନ୍ତି ଯେ, ଅଗ୍ନିକାଣ୍ଡକୁ ନିୟନ୍ତ୍ରଣ କରାଯିବା ପରେ, ଟ୍ରେନର ଅବସ୍ଥା ଯାଞ୍ଚ କରାଯାଉଛି। କ୍ଷତିଗ୍ରସ୍ତ କୋଚ ଯାଞ୍ଚ କରିବା ପରେ, ଟ୍ରେନଟି ଖୁବ ଶୀଘ୍ର ତା’ର ଗନ୍ତବ୍ୟସ୍ଥଳ ସହରସା ଅଭିମୁଖେ ଯାତ୍ରା କରିବ। ରେଳ ସୁରକ୍ଷା ବଳ (RPF) ଏବଂ GRP ଦଳ ସମଗ୍ର ଅଞ୍ଚଳକୁ ଘେରାବନ୍ଦୀ କରିଛନ୍ତି ଏବଂ ଯାତ୍ରୀମାନଙ୍କୁ ସମସ୍ତ ଆବଶ୍ୟକୀୟ ସୁବିଧା ଯୋଗାଇ ଦିଆଯାଉଛି।