କଲମ୍ବୋ,୧୭।୯: ଏସିଆ କପ ୨୦୨୩ର ଫାଇନାଲ୍ ମ୍ୟାଚ ଭାରତ ଏବଂ ଶ୍ରୀଲଙ୍କା ମଧ୍ୟରେ ଖେଳାଯିବ। ଏହି ମ୍ୟାଚ ପୂର୍ବରୁ ଭାରତୀୟ ଦଳକୁ ଏକ ବଡ ଝଟ୍କା ଲାଗିଛି। ବାଂଲାଦେଶ ବିପକ୍ଷ ସୁପର-୪ ମ୍ୟାଚରେ ଅଲରାଉଣ୍ଡର ଅକ୍ଷର ପଟେଲ ଆହତ ହୋଇଥିବାରୁ ସେ ଫାଇନାଲ ମ୍ୟାଚ୍ ଖେଳିପାରିବେ ନାହିଁ। ବର୍ତ୍ତମାନ ତାଙ୍କ ସ୍ଥାନରେ ଷ୍ଟାର ଅଲରାଉଣ୍ଡର ୱାଶିଂଟନ ସୁନ୍ଦରଙ୍କୁ ସ୍ଥାନ ଦିଆଯାଇଛି। ଫାଇନାଲ ପୂର୍ବରୁ ସୁନ୍ଦର କଲମ୍ବୋରେ ପହଞ୍ଚି ଦଳରେ ଯୋଗ ଦେଇଥିଲେ। ଭାରତରେ କ୍ରିକେଟ ବୋର୍ଡ ଅଫ କଣ୍ଟ୍ରୋଲ ଦ୍ୱାରା ଏ ସମ୍ପର୍କରେ ସୂଚନା ଦିଆଯାଇଛି।
ସୁପର-୪ରେ ବାଂଲାଦେଶ ବିପକ୍ଷରେ ଖେଳାଯାଇଥିବା ମ୍ୟାଚରେ ଭାରତୀୟ ଅଲରାଉଣ୍ଡର ଅକ୍ଷାର ପଟେଲ ଭଲ ଫର୍ମରେ ନଜର ଆସିଥିଲେ। ଅଷ୍ଟମ ନମ୍ବରରେ ବ୍ୟାଟିଂ କରି ସେ ୩ ଚୌକା ଓ ୨ ଛକା ସହାୟତାରେ ୩୪ ବଲରେ ୪୨ ରନ ସଂଗ୍ରହ କରିଥିଲେ। ଏହା ବ୍ୟତୀତ ବୋଲିଂ ବେଳେ ସେ ଗୋଟିଏ ଉଇକେଟ ନେଇଥିଲେ।