ଲଣ୍ଡନ,୧୦ା୩: ଇରାନ-ଆମେରିକା ଯୁଦ୍ଧକୁ ନେଇ ବୈଶ୍ୱିକ ପୁଞ୍ଜି ବଜାର ବେଳକୁ ବେଳ ଧରାଶାୟୀ ହେବାରେ ଲାଗିଛି। ତୈଳ ସଙ୍କଟକୁ ନେଇ ପେଟ୍ରୋଲୟିମ ବଜାରରେ ଅସ୍ଥିରତା ଏବଂ ଭୂ-ରାଜନୈତିକ ସ୍ତରରେ ଦେଖାଯାଇଥିବା ଅସାମଞ୍ଜସ୍ୟ ନିବେଶକଙ୍କୁ ଘୋର ଆଶଙ୍କା ମଧ୍ୟକୁ ଠେଲି ଦେଇଥିବାବେଳେ ଏବେ ଶେୟାର ବଜାରରୁ ମୁହଁ ଫେରାଇ ନିବେଶକମାନେ ସୁନାରେ ପୁଞ୍ଜି ନିବେଶ କରିବାକୁ ଶ୍ରେୟ ମଣିଛନ୍ତି। ବର୍ତ୍ତମାନ ଶେୟାର ବଜାର ତୁଳନାରେ ଲଣ୍ଡନ ସମେତ ବିଶ୍ୱର ଅନ୍ୟ ପ୍ରମୁଖ ମେଟାଲ ଏକ୍ସଚେଞ୍ଜଗୁଡିକରେ ସୁନା ସର୍ବାଧିକ କାରବାର ହେବା ସହିତ ଅନ୍ତର୍ଜାତୀୟ ସ୍ତରର ବ୍ୟାଙ୍କ ମଧ୍ୟ ପର୍ଯ୍ୟାପ୍ତ ପରିମାଣରେ ସୁନା କିଣିବାକୁ ଲାଗିଛନ୍ତି। ଏହାକୁ ନେଇ ଅନ୍ତର୍ଜାତୀୟ ବଜାରରେ ସୁନା ଚାହିଦା ବୃଦ୍ଧି ପାଇବା ସହିତ ଅନ୍ତର୍ଜାତୀୟ ବେଞ୍ଚମାର୍କ ମୂଲ୍ୟରେ ମଧ୍ୟ ବୃଦ୍ଧି ଘଟି ଚାଲିଛି। ସୋମବାର ସୁଦ୍ଧା ଲଣ୍ଡନସ୍ଥିତ ଏଲବିଏମଏରେ ୨୪ କ୍ୟାରେଟ୍ ସୁନା ଆଉନ୍ସ ପ୍ରତି ମୂଲ୍ୟ ୫୪୦୦ରୁ ୫୬୦୦ ଡଲାର ରହିଥିବା ଜଣାପଡ଼ିଛି।
ସବୁଠାରୁ ବଡ଼ କଥା ହେଉଛି ଇରାନ-ଆମେରିକା ଯୁଦ୍ଧ ପରେ ସୁନାର ଚାହିଦା ଓ ନିବେଶ ବୃଦ୍ଧିକୁ ନେଇ ଯେଉଁ ବଜାର ସୃଷ୍ଟି ହୋଇଛି ତାହାର ମୂଲ୍ୟ ୩୦ରୁ ୩୫ ଟ୍ରିଲିୟନ ଡଲାର ଛୁଇଁଛି। ଆର୍ଥିକ ଦୃଷ୍ଟିରୁ ଆକଳନ କଲେ ଏହି ବଜାର ମୂଲ୍ୟ ଭାରତ ଏବଂ ଯୁକ୍ତରାଜ୍ୟର ମୋଟ ଜିଡିପିଠାରୁ ଅନେକ ଅଧିକ ହେବ। ଭାରତ ଏବଂ ଯୁକ୍ତରାଜ୍ୟ ଜିଡିପି ୮ରୁ ୯ ଟ୍ରିଲିୟନ ଡଲାର ମଧ୍ୟରେ ରହିଥିବାବେଳେ ବର୍ତ୍ତମାନ ସୁନା ବଜାର ୩୦ରୁ ୩୫ ଟ୍ରିଲିୟନ ଡଲାର ହେବ ବୋଲି ଆକଳନ କରାଯାଇଛି।