ନୂଆଦିଲ୍ଲୀ, ୧୯।୧୨: ଦେଶର ଲୋକଙ୍କୁ ଜାଣିଶୁଣି ୭୦ ବର୍ଷ ପର୍ଯ୍ୟନ୍ତ ଗରିବ ରଖାଯାଇଥିଲା। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏକ କାର୍ଯ୍ୟକ୍ରମରେ ଯୋଗଦେଇ ରାଜନୈତିକ ଦଳଗୁଡ଼ିକୁ ଟାର୍ଗେଟ କରି ରବିବାର ଏଭଳି କହିଛନ୍ତି। ଦେଶରୁ ଦାରିଦ୍ର୍ୟ ଦୂର ହୋଇପାରିଥାନ୍ତା। କିନ୍ତୁ ଜାଣିଶୁଣି ଭୋଟବ୍ୟାଙ୍କ ବଜାୟ ରଖିବା ଲାଗି କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା।
ସେ କହିଛନ୍ତି ଯେ ଏଥର ସରକାରୀ ବିଦ୍ୟାଳୟଗୁଡ଼ିକର ଫଳାଫଳ ୯୯.୭ ପ୍ରତିଶତ ହୋଇଛି। ୨.୫ ଲକ୍ଷ ପିଲା ଘରୋଇ ବିଦ୍ୟାଳୟରୁ ଆସି ସରକାରୀ ବିଦ୍ୟାଳୟରେ ନାମ ଲେଖାଇଛନ୍ତି। ଯେତେବେଳେ ବିଦ୍ୟାଳୟଗୁଡ଼ିକ ଭଲ ହୋଇପାରିଲା, ୭୦ ବର୍ଷରେ ଲୋକଙ୍କ ଆର୍ଥିକ ସ୍ଥିତିରେ ମଧ୍ୟ ସୁଧାର ଆସି ପାରିଥାନ୍ତା।
ପୂର୍ବ ରାଜନୈତିକ ଦଳର ସରକାର ସେମାନେ ଜାଣିଶୁଣି ପଦକ୍ଷେପ ଗ୍ରହଣ କରି ନାହାଁନ୍ତି। ସେମାନେ ଚାହୁଁଥିଲେ ଦେଶ ଗରିବ ହୋଇ ରହୁ। ପୂର୍ବ ସରକାରଙ୍କୁ ଟାର୍ଗେଟ କରି କେଜ୍ରିୱାଲ କହିଛନ୍ତି ଯେ ୭-୮ ବର୍ଷର ଅଭିଜ୍ଞତାରୁ ଆମେ ଜାଣି ପାରିଛୁ ଯେ, ଦେଶର ବିଭିନ୍ନ ଅନୁଷ୍ଠାନଗୁଡିକ ଜାଣିଶୁଣି ପଛରେ ରହିଯାଇଛି।
ଆମେ ୬ ବର୍ଷ ମଧ୍ୟରେ ସରକାରୀ ବିଦ୍ୟାଳୟର ସ୍ଥିତିକୁ ସୁଦୃଢ଼ କରିଛୁ। ଦେଶର ବିକାଶ ଲାଗି ଆମକୁ ଦେଶବ୍ୟାପୀ ଅଭିଯାନ ଚଳାଇବାକୁ ପଡ଼ିବ। ସ୍ବାସ୍ଥ୍ୟ ସେବାଠାରୁ ଆରମ୍ଭ କରି ଶିକ୍ଷା ପର୍ଯ୍ୟନ୍ତ ସବୁ କ୍ଷେତ୍ରରେ ଦେଶକୁ ଆଗେଇ ନେବାକୁ ପଡ଼ିବ ବୋଲି ସେ ଆହ୍ବାନ ଦେଇଛନ୍ତି।