ମହାକାଳପଡ଼ା, ୨୪ା୬ (ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ୍କୁ ୧୯୭୧ ମସିହାରେ ଓଡ଼ିଶା ରାଜ୍ୟ ବିଦ୍ୟୁତ୍ ବୋର୍ଡ ପକ୍ଷରୁ ମାର୍ଶାଘାଇ କେନାଲ ବ୍ରିଜ୍ଠାରୁ ମହାକାଳପଡ଼ା-ଛପାଲି ପର୍ଯ୍ୟନ୍ତ ବିଦ୍ୟୁତ୍ ଯୋଗାଣ କରାଯାଇଥିଲା। ୫୫ ବର୍ଷ ମଧ୍ୟରେ ବହୁ ଝଡ଼ତୋଫାନ ସହି ଏହି ଅଞ୍ଚଳକୁ ନିରବଚ୍ଛିନ୍ନ ଭାବେ ବିଦ୍ୟୁତ୍ ସରବରାହ ହେଉଥିଲା। ହେଲେ ସେଦିନର ପୁରୁଣା ତାର, ଶଙ୍ଖ, ଖୁଣ୍ଟ ଦୁର୍ବଳହେବା ଯୋଗୁ ବଜ୍ରପାତ, ବର୍ଷା, ପବନ ହେଲେ ବିଦ୍ୟୁତ୍ ସରବରାହ ବିଚ୍ଛିନ୍ନ ହୋଇଯାଉଛି। ଫଳରେ ଅଞ୍ଚଳରେ ବିଦ୍ୟୁତ୍ ଗ୍ରାହକମାନେ ଅସୁବିଧାରେ ସମ୍ମୁଖୀନ ହେଉଥିବା ଅଭିଯୋଗ ହେଉଛି। ଏ ନେଇ ମହାକାଳପଡ଼ା ଅଞ୍ଚଳର ଲୋକେ ସ୍ଥାନୀୟ ବିଧାୟକ ଦୁର୍ଗାପ୍ରସନ୍ନ ନାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ଲୋକମାନଙ୍କ ସ୍ବାର୍ଥଦୃଷ୍ଟିରୁ ୧ ସପ୍ତାହ ପୂର୍ବେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ସହ ବିଧାୟକ ନାୟକ ଆଲୋଚନା କରିଥିଲେ। ପରେ ଯୁଦ୍ଧକାଳୀନ ଭିତ୍ତିରେ ବିଦ୍ୟୁତ୍ ଯୋଗାଣକାରୀ ସଂସ୍ଥା କର୍ମକର୍ତ୍ତା ଜମ୍ବୁ-ମାର୍ଶାଘାଇ ମୁଖ୍ୟ ବ୍ରିଟିଶ କେନାଲ ରାସ୍ତା ବ୍ରିଜ୍ଠାରୁ ଉଚ୍ଚ କ୍ଷମତାସମ୍ପନ୍ନ ନୂଆ ଖୁଣ୍ଟ, ତାର, ଶଙ୍ଖ ଲଗାଇବା କାର୍ଯ୍ୟ ଆରମ୍ଭ ହୋଇଛି। ଫଳରେ ପୂର୍ବଭଳି ବିଦ୍ୟୁତ୍ ସମସ୍ୟା ହଟିବ ବୋଲି ସ୍ଥାନୀୟ ବିଦ୍ୟୁତ୍ ଗ୍ରାହକ ଓ ବୁଦ୍ଧିଜୀବୀ କହିଛନ୍ତି। ପୂର୍ବ ଅପେକ୍ଷା ସବୁ କ୍ଷେତ୍ରରେ ବିଦ୍ୟୁତ୍ର ଚାହିଦା ବୃଦ୍ଧି ପାଇଛି। ଏଥିପାଇଁ ଅତ୍ୟଧିକ ବିଦ୍ୟୁତ୍ ଯୋଗାଣରେ ଲୋଡ୍ ପଡ଼ିବା, ବଜ୍ରପାତ, ଝଡ଼ତୋଫାନ, ବର୍ଷା ଯୋଗୁ ବିଭିନ୍ନ ସମୟରେ ସରବରାହ ବିଚ୍ଛିନ୍ନ ହେଉଥିଲା। ଅପରପକ୍ଷରେ ଅଞ୍ଚଳକୁ ବିଦ୍ୟୁତ୍ ଯୋଗାଣରେ ବିକଳ୍ପ ଭାବେ ପଟ୍ଟାମୁଣ୍ଡାଇ ଗ୍ରୀଡ୍ରୁ ଭାୟା ଉତିକଣ, ବାବର ମହାକାଳପଡ଼ାକୁ ସଂଯୋଗ କରାଯିବାର ବ୍ୟବସ୍ଥା ୭୦ ରୁ ୮୦ ପ୍ରତିଶତ ନିର୍ମାଣ କାର୍ଯ୍ୟ ସରିଛି। ଜମି ଅଧିଗ୍ରହଣ ସମସ୍ୟା ସମାଧାନ ପାଇଁ ବିଦ୍ୟୁତ୍ ବିଭାଗ ଆଲୋଚନା ଜାରି ରଖିଛି। ବର୍ଷାଦିନ ପରେ ସଂଯୋଗ କରାଯିବାର ବ୍ୟବସ୍ଥା ହେବ। ଏହି ନୂଆ ବିଦ୍ୟୁତ୍ ଖୁଣ୍ଟ ମହାକାଳପଡ଼ା କିଆରବାଙ୍କ ସବ୍ ଡିଭିଜନ ଗ୍ରୀଡ୍କୁ ସଂଯୋଗ କରାଯିବାର ବ୍ୟବସ୍ଥା ଗ୍ରହଣ କରାଯାଇଛି ବୋଲି ବିଭାଗୀୟ ସୂତ୍ରରୁ ପ୍ରକାଶ।