ନୂଆଦିଲ୍ଲୀ,୧୧।୧୧: ଦିଲ୍ଲୀର ଐତିହାସିକ ଲାଲକିଲ୍ଲା ନିକଟରେ ହୋଇଥିବା ଭୟଙ୍କର ବିସ୍ଫୋରଣ ରାଜଧାନୀର ଶାନ୍ତି ଭଙ୍ଗ କରିବା ସହ ଦେଶର ସୁରକ୍ଷା ବ୍ୟବସ୍ଥା ପାଇଁ ଆତଙ୍କ ସୃଷ୍ଟି କରିଛି। ଏହି ବିସ୍ଫୋରଣରେ ମୃତ୍ୟୁବରଣ କରିଥିବା ଲୋକଙ୍କ ୫ଟି ପରିବାର ପାଇଁ ସବୁକିଛି ଓଲଟପାଲଟ ହୋଇଯାଇଛି।
ବିସ୍ଫୋରଣରେ ମୃତ୍ୟୁବରଣ କରିଥିବା ବ୍ୟକ୍ତିମାନେ ହେଉଛନ୍ତି, ପଙ୍କଜ ସଇନି (୨୨) ଯାହାଙ୍କ ଘର ବିହାର, ସେ ଜଣେ କ୍ୟାବ୍ ଡ୍ରାଇଭର ଥିଲେ ଏବଂ ନିଜ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ। ଚାନ୍ଦିନୀ ଚୌକରେ ଜଣେ ଯାତ୍ରୀଙ୍କୁ ଛାଡ଼ିବା ପରେ ଏହି ଦୁର୍ଘଟଣା ଘଟିଥିଲା।
ଅଶୋକ କୁମାର: ଦିଲ୍ଲୀ ପରିବହନ ନିଗମର ଜଣେ କଣ୍ଡକ୍ଟର ଥିଲେ। ମୂଳତଃ ଅମରୋହାର ଅଶୋକ ୮ ଜଣଙ୍କ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ। ସେ ଅନ୍ୟ ଜଣେ ମୃତକ ଲୋକେଶ କୁମାର ଗୁପ୍ତାଙ୍କ (ସେ ମଧ୍ୟ ଅମରୋହାର) ସହ ଦେଖା କରିବାକୁ ଯାଉଥିଲେ।
ନୋମାନ (୨୨): ଉତ୍ତର ପ୍ରଦେଶର ଶାମଲିର ନୋମାନ ନିଜ କସ୍ମେଟିକ୍ ଦୋକାନ ପାଇଁ ଜିନିଷ କିଣିବାକୁ ଚାନ୍ଦିନୀ ଚୌକର ହୋଲସେଲ୍ ମାର୍କେଟକୁ ଯାଇଥିଲେ। ତାଙ୍କ କକା ଏହି ଘଟଣାକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି।
ଅମର କାଟାରିଆ (୩୪): ଜଣେ ଔଷଧ ଦୋକାନ ମାଲିକ, ଯିଏ ଭାଗୀରଥ ପ୍ୟାଲେସ୍ରେ ଥିବା ଦୋକାନରୁ ଘରକୁ ଫେରୁଥିଲେ। ତାଙ୍କ ବାପା ଲୋକ ନାୟକ ହସ୍ପିଟାଲ୍ ବାହାରେ ହାହାକାର କରିଥିଲେ।
ଦିନେଶ କୁମାର ମିଶ୍ର: ଉତ୍ତର ପ୍ରଦେଶର ଶ୍ରାବସ୍ତିର ଦିନେଶ କାର୍ଡ଼ ଦୋକାନରେ କାମ କରୁଥିଲେ ଏବଂ ୩ ସନ୍ତାନର ବାପା ଥିଲେ। ତାଙ୍କ ପତ୍ନୀ ରିନା ସବୁକିଛି ହରାଇଥିବା କହିଛନ୍ତି।
ମୃତକଙ୍କ ପରିବାର ଲୋକମାନେ ନ୍ୟାୟ ଏବଂ ସରକାରୀ ସହାୟତା ପାଇଁ ଦାବି କରିଛନ୍ତି। ବିସ୍ଫୋରଣର ତୀବ୍ରତା ଏତେ ଥିଲା ଯେ କିଛି ଶବକୁ ଏପର୍ଯ୍ୟନ୍ତ ଚିହ୍ନଟ କରାଯାଇ ନାହିଁ। ଲୋକ ନାୟକ ହସ୍ପିଟାଲ୍ ବାହାରେ ଏକ ନିରବତା ଦେଖାଦେଇଛି, ଯାହା କେବଳ ପରିବାର ସଦସ୍ୟଙ୍କ କାନ୍ଦ ବୋବାଳୀରେ ଫାଟିପଡୁଛି।