କାକଟପୁର,୭।୫(ଡି.ଏନ୍.ଏ.): କାକଟପୁର ବ୍ଲକ ଅନ୍ତର୍ଗତ କୁରୁଜଙ୍ଗ ପଞ୍ଚାୟତ ଚାରିଗାଁରେ ପାନୀୟଜଳ ସଙ୍କଟ ସୃଷ୍ଟି ହୋଇଛି। କୁରୁଜଙ୍ଗ ପଞ୍ଚାୟତର ବାମରା, କୁରୁମ, ପାଟ୍ଟଶାଣୀପୁର ଓ ଆଢୁଆଳ ଗ୍ରାମକୁ ନେଇ ନାମିତ ଚାରିଗାଁରେ ଦୀର୍ଘବର୍ଷ ଧରି ପାନୀୟଜଳ ସମସ୍ୟା ଲାଗିରହିଛି। ଏହି ଗ୍ରାମଗୁଡ଼ିକରେ ଥିବା ସମସ୍ତ ନଳକୂପର ଜଳ ଲୌହ ଓ ଫ୍ଲୋରାଇଡ୍ଯୁକ୍ତ ହୋଇଥିବାରୁ ଏଠାରେ ରହୁଥିବା ପ୍ରାୟ ୪୦୦ ପରିବାର ପିଇବା ପାଣି ପାଇଁ ହଇରାଣ ହେଉଛନ୍ତି। ବ୍ଲକ ପ୍ରଶାସନ ପକ୍ଷରୁ ଉକ୍ତ ଗ୍ରାମଗୁଡ଼ିକୁ ପିଇବା ପାଣି ଯୋଗାଇ ଦେବାକୁ ନିକଟସ୍ଥ ଓରେଇ ଗ୍ରାମରେ ପମ୍ପ ହାଉସ ନିର୍ମାଣ କରାଯାଇ ଓର଼େଇ ସମେତ ଚାରିଗାଁର ପ୍ରତ୍ୟେକ ଘରକୁ ପିଇବା ପାଣି ଯୋଗାଇ ଦେବାକୁ ପାଇପ ଲାଇନ୍ ବିଛାଯିବା ସହ ଷ୍ଟାଣ୍ଡପୋଷ୍ଟ ବସାଯାଇଥିଲା। ଫଳରେ ଲୋକେ ସକାଳେ ୩ ଘଣ୍ଟା ଏବଂ ଅପରାହ୍ନରେ ୨ଘଣ୍ଟା ପାଣି ପାଉଥିଲେ। କିନ୍ତୁ ପ୍ରାୟ ଶତାଧିକ ପରିବାର ନିଜ ଘର ଟାଙ୍କି ପାଇଁ ବେଆଇନ ଭାବେ ପାଇପଲାଇନରେ ମୋଟର ସଂଯୋଗ କରି ଅସାଧୁ ଉପାୟରେ ପାଣି ଚୋରି କରୁଛନ୍ତି। ଏଥିଯୋଗୁ ଶେଷ ମୁଣ୍ଡପର୍ଯ୍ୟନ୍ତ ପାଣି ପହଞ୍ଚି ପାରୁନାହିଁ। ଏ ନେଇ ଗ୍ରାମବାସୀ ବିଭାଗୀୟ କର୍ତ୍ତୃପକ୍ଷଙ୍କୁ ଅଭିଯୋଗ ଜଣାଇଥିଲେ। ସରପଞ୍ଚ ନିଗମାନନ୍ଦ ପରିଡ଼ାଙ୍କ ସମେତ ବିଭାଗୀୟ କନିଷ୍ଠ ଯନ୍ତ୍ରୀ ତଦନ୍ତ କରିଥିଲେ। କେତେକ ପରିବାର ଅସାଧୁ ଉପାୟରେ ମୋଟର ଲଗାଇ ପାଣି ନେଉଥିବା ଜଣାପଡ଼ିଥିଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ। ତେଣୁ ପାନୀୟଜଳ ସମସ୍ୟା ଦୂର ହୋଇନାହିଁ। ତୁରନ୍ତ ଟ୍ୟାଙ୍କରରେ ପାଣି ଯୋଗାଇବା ସହ ବୃହତ ପାଣି ଟାଙ୍କି ନିର୍ମାଣ କରିବାକୁ ଚାରିଗାଁ ଗ୍ରାମବାସୀଙ୍କ ପକ୍ଷରୁ ଦାବି ହେଉଛି।