ଦାରିଙ୍ଗବାଡ଼ି,୨୫।୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗାବାଡି ବ୍ଲକ ସିମନବାଡି ଶିବମନ୍ଦିର ପ୍ରାଙ୍ଗଣରେ ଭଗବାନ ବିର୍ସାମୁଣ୍ଡାଙ୍କ ୧୫୦ତମ ଜନ୍ମ ଜୟନ୍ତୀ ପାଳନ କରାଯିବା ସହ ସାଧାରଣତନ୍ତ୍ର ଦିବସ ଉପଲକ୍ଷେ ଭାରତ ମାତାଙ୍କ ପୂଜନ ଉତ୍ସବ ଉଦ୍ଘାଟିତ ହୋଇଯାଇଛି । ମହିଳା ଏବଂ ପୁରୁଷ ଶ୍ରଦ୍ଧାଳୁ ଏକ ଶୋଭାଯାତ୍ରାରେ ବାହାରି କଳସରେ ପାଣି ଉଠାଇ ସହର ପରିକ୍ରମା କରି ମଞ୍ଚରେ ପହଞ୍ଚି ଥିଲେ। ପରେ ମହାପ୍ରଭୁ ଜଗନ୍ନାଥଙ୍କ ନିକଟରେ ପୂଜାର୍ଚ୍ଚନା କରାଯିବା ସହ କଳସ ସ୍ଥାପନ କରାଯାଇଥିଲା।
ସନ୍ଧ୍ୟାରେ କୃଷି ଓ କୃଷକର ବିକାଶ ସହ ଅନୁସୂଚିତ ଜନଜାତି ଓ ଜାତିଙ୍କ ଜୀବନ ଜୀବିକା କିଭଳି ସ୍ବାବଲମ୍ବୀ ହୋଇପାରିବେ ସେନେଇ ଆଲୋଚନା କରାଯାଇଥିଲା। ସେହିପରି ଜଳବାୟୁ ପରିବର୍ତ୍ତନ ଓ ପରିବେଶର ସୁରକ୍ଷା ସମ୍ପର୍କରେ ଆଲୋଚନା ହୋଇଥିଲା। ଆଲୋଚନାଚକ୍ରରେ ଅତିଥିଭାବେ ଅବସରପ୍ରାପ୍ତ ପ୍ରଫେସର ପ୍ରଭୁ ଚରଣ ଲେଙ୍କା, ଅମରେଶ ମିଶ୍ର, ବାଲିଗୁଡା ଏସ୍ସିଏଫ ମନୋରଞ୍ଜନ ବାଗ, ଆନନ୍ୟା ଅନୁଷ୍ଠାନର ସଂଯୋଜକ ଅବିନାଶ ମହାନ୍ତି ପ୍ରମୁଖ ଯୋଗ ଦେଇଥିଲେ। ଦେବାଶିଷ ମିଶ୍ର ମଞ୍ଚ ପରିଚାଳନା କରିଥିଲେ।
ସେହିପରି ଦ୍ୱିତୀୟ ପର୍ଯ୍ୟାୟ ଆଲୋଚନାଚକ୍ର ଜନଜାତି ଲୋକ ନୃତ୍ୟ, ସଂସ୍କୃତି, କୁଇ ଭାଷା ଓ ଜନଜାତିଙ୍କ ଦକ୍ଷତା ସମ୍ପର୍କରେ ଆଲୋଚନା କରାଯାଇଥିଲା ଏହି ଅବସରରେ କୃଷି ସମ୍ପର୍କରେ କାର୍ଯ୍ୟ କରୁଥିବା ସ୍ବେଚ୍ଛାସେବୀ ଅନୁଷ୍ଠାନ ଅନନ୍ୟାର ଅଧ୍ୟକ୍ଷ ଦୁର୍ଗାମାଧବ ଆଚାର୍ଯ୍ୟଙ୍କ ଅଧ୍ୟକ୍ଷତାରେ ଆଲୋଚକ ତଥା ଅତିଥି ଫିରିଙ୍ଗିଆ ମହାବିଦ୍ୟାଳୟର ଅଧ୍ୟକ୍ଷ ଡ଼ଃ ଚିତ୍ତରଞ୍ଜନ ମିଶ୍ର, ଅଧ୍ୟାପକ ଡମ୍ବୁରୁଧର ସାହୁ, ଅଧ୍ୟାପକ ବିଭୁତିଭୂଷଣ ସତପଥୀ, ବରିଷ୍ଠ ନାଗରିକ ସୁଦର୍ଶନ ପ୍ରଧାନ ଏବଂ ଶୁନାଫୁଲ ମା ଯୋଗଦେଇ ଆଲୋଚନା କରିଥିଲେ। ଏହି ଅବସରେ ସମସ୍ତ ଅତିଥିଙ୍କୁ ପୁଷ୍ପଗୁଛ ଦେଇ ସମ୍ବର୍ଦ୍ଧିତ କରାଯାଇଥିଲା।
ସେହିପରି ତୃତୀୟ ପର୍ଯ୍ୟାୟ କାର୍ଯ୍ୟକ୍ରମରେ ସଂସ୍କାର ଭାରତୀର ଭୋପାଳ ମୁଖ୍ୟ କାର୍ଯ୍ୟାଳୟର ଜାତୀୟ ଜନଜାତି ଲୋକକଳା ସଂଯୋଜକ ନିରଞ୍ଜନ ପଣ୍ଡାଙ୍କ ଅଧ୍ୟକ୍ଷତାରେ ମୁଖ୍ୟ ଅତିଥି ଭାବେ କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ଯୋଗଦେଇଥିଲେ। ସେହିପରି ଅତିଥି ଭାବେ ତହସିଲଦାର ଶରତ ଶବର, ବାଲିଗଡ଼ା ଆଇଟିଡିଏ ପ୍ରକଳ୍ପ ପ୍ରଶାସକ ଗଦାଧର ପାତ୍ର, ଅନନ୍ୟାର ମୁଖ୍ୟ ନିର୍ଦ୍ଦେଶକ ଅମରେଶ ମିଶ୍ର, ସଂସ୍କାର ଭାରତୀର ମୁଖ୍ୟ ଶାନ୍ତନୁ ରଥ ପ୍ରମୁଖ ଯୋଗଦେଇ ଭଗବାନ ବିର୍ସାମୁଣ୍ଡାଙ୍କ ସମ୍ପର୍କରେ ଆଲୋଚନା କରିଥିଲେ।
ଉଦ୍ଘାଟନୀ ଉତ୍ସବରେ ବିଭିନ୍ନ କଳା, ସଂସ୍କୃତିରେ ପ୍ରତିଭାବାନ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା। ପରେ ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ, ଓଡ଼ିଶୀ, ସଙ୍ଗୀତ, ଦଳଗତ ନୃତ୍ୟ ଆଦି ପରିବେଷଣ ହୋଇଥିଲା। ଫୁଲବାଣୀର ସଙ୍ଗୀତ ସାଧନା କେନ୍ଦ୍ରର କଣ୍ଠଶିଳ୍ପୀ ସନ୍ତୋଷ ଦାସ ଏବଂ କାଁହୁଚରଣ ଦିଗାଲଙ୍କ ଦେଶାତ୍ମକ ସଙ୍ଗୀତ ଓ ଭଜନ ଦର୍ଶକଙ୍କୁ ବାନ୍ଧି ରଖିଥିଲ