ନବରଙ୍ଗପୁର,୧୪ା୧(ସଦାଶିବ ପ୍ରହରାଜ): ମଣ୍ଡିରେ ଧାନ କ୍ରୟ ଆରମ୍ଭରୁ ଅବ୍ୟବସ୍ଥା। ଚାଷୀଙ୍କୁ ଟୋକନ ପ୍ରଦାନରେ ଅହେତୁକ ବିଳମ୍ବ ସାଙ୍ଗକୁ କଟ୍ନି ଛଟ୍ନି ବାହାନାରେ ଶୋଷଣ। ସାମାନ୍ୟ ବିଳମ୍ବରେ ଧାନମଣ୍ଡିରେ ପହଞ୍ଚତ୍ଲେ ଫେରସ୍ତ ସହ ସାଧାରଣ ମୌଳିକ ସୁବିଧା ଯୋଗାଇଦେବାରେ ସରକାର ବିଫଳ। ସାଟେଲାଇଟ୍ ଜମି ସର୍ଭେରେ ତ୍ରୁଟି ଯୋଗୁ ବହୁ ଚାଷୀ ଧାନ ବିକ୍ରି ସୁଯୋଗରୁ ବଞ୍ଚତ୍ତ ହେଉଥିବା ଏଭଳି ଅଭିଯୋଗକରି ବିଜେଡି ରାସ୍ତାକୁ ଓହ୍ଲାଇଛି। ନବରଙ୍ଗପୁର ଜିଲା ବିଜେଡି ସଭାପତି ତଥା ଡାବୁଗାଁ ବିଧାୟକ ମନୋହର ରନ୍ଧାରୀ ଓ ପୂର୍ବତନ ଏମ୍ପି ପ୍ରଦୀପ ମାଝୀଙ୍କ ନେତୃତ୍ୱରେ ନବରଙ୍ଗପୁର ଜିଲାର ୭ ବ୍ଲକ୍ରେ ମଙ୍ଗଳବାର ୧୨ ଘଣ୍ଟିଆ ବନ୍ଦ କରାଯାଇଛି। ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି ସମୟରେ ଜିଲାରେ ଚକ ଅଖ ବନ୍ଦ ଥିଲା। ଶତାଧିକ ବିଜେଡି ନେତା ଓ କର୍ମୀଙ୍କ ସମେତ ହଜାର ହଜାର ଚାଷୀ ଆନ୍ଦୋଳନକୁ ସମର୍ଥନକରି ଏଥିରେ ସାମିଲ ହୋଇଥିଲେ। କିନ୍ତୁ ଅତ୍ୟାବଶ୍ୟକ ପରିବହନ ବ୍ୟବସ୍ଥା ଚାଲିଥିଲା। ସେହିଭଳି ଦୋକାନ, ବଜାର ଓ ସାପ୍ତାହିକ ହାଟକୁ ବନ୍ଦରୁ ବାଦ୍ ଦିଆଯାଇଥିବା କାରଣରୁ ବଜାରରେ କାରବାର ସ୍ବାଭାବିକ ଥିଲା। ସରକାରୀ କାର୍ଯ୍ୟାଳୟ ଓ ଶିକ୍ଷାନୁଷ୍ଠାନ ବନ୍ଦ ପରିସଭୁକ୍ତ କରାଯାଇ ନ ଥିବାରୁ ସେସବୁ ସ୍ବାଭାବିକ ଭାବେ ଖୋଲା ରହିଥିଲା।
ନବରଙ୍ଗପୁର ଜିଲା ବିଜେଡି ସଭାପତି ରନ୍ଧାରୀ, ପୂର୍ବତନ ଏମ୍ପି ମାଝୀଙ୍କ ସମେତ ପୂର୍ବତନ ନବରଙ୍ଗପୁର ବିଧାୟକ ସଦାଶିବ ପ୍ରଧାନୀ, ପୂର୍ବତନ ଉମରକୋଟ ବିଧାୟକ ସୁବାସ ଗଣ୍ଡ, ବିଧାୟିକା ପ୍ରାର୍ଥୀ କୌଶଲ୍ୟା ପ୍ରଧାନୀ ଓ ନବୀନା ନାୟକ, ବଦ୍ରିନାରାୟଣ ସିଂ, ଜିଲା ମହିଳା ବିଜେଡି ସଭାନେତ୍ରୀ ମଞ୍ଜୁଳା ମାଝୀ, ପୌରାଧ୍ୟକ୍ଷା ସୌମ୍ୟା ମହାପାତ୍ର, ଅବିଭକ୍ତ କୋରାପୁଟ ଯୁବ ବିଜେଡି ସଭାପତି ତାପସ ତ୍ରିପାଠୀ, ଭୀମ ହରିଜନ ଓ ସରୋଜ ପାତ୍ରଙ୍କ ସମେତ ସମସ୍ତ କାଉନସିଲର ଓ ଶତାଧିକ ଦଳୀୟ ନେତା ଓ କର୍ମୀ ୨୬ ନମ୍ବର ଜାତୀୟ ରାଜପଥର ମାଝୀଗୁଡ଼ା, ଚାଉଁରିଆଗୁଡ଼ା ଓ ମା’ ଭଣ୍ଡାରଘରଣୀ ମନ୍ଦିର ସମ୍ମୁଖରେ ଧାରଣାରେ ବସିଥିଲେ। ସେହିଭଳି ଅପରାହ୍ନ ୧ଟାରେ ଦଳୀୟ ନେତା ଓ କର୍ମୀ ବିରାଟ ଶୋଭାଯାତ୍ରାରେ ଯାଇ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିବା ସହ ଭାଜପା ବିରୋଧରେ ନାରାବାଜି କରି ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହକରିଥିଲେ। ରାଜ୍ୟପାଳଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ଜିଲା ଯୋଗାଣ ଅଧିକାରୀ ଦେବାଶିଷ ମହାନ୍ତି ଲିଖିତ ଭାବେ ଆନ୍ଦୋଳନକାରୀଙ୍କୁ ଜଣାଇଲେ, ସୋସାଇଟିକୁ ମିଲ୍ ମାଲିକମାନେ ଅଖାବସ୍ତା ଯୋଗାଇ ଦେବେ। ଚାଷୀମାନେ ଅଖା ନେବେ ଓ ଏଫ୍ଏକ୍ୟୁ ଧାନ ଦେଲେ କଟ୍ନିଛଟ୍ନି ହେବ ନାହିଁ। ପ୍ରତିଦିନ ୪ ହଜାର କୁଇଣ୍ଟାଲ ଧାନ ମଣ୍ଡିରୁ ଉଠିବ। ଏଥିସହ ଚାଷୀଙ୍କୁ ସମସ୍ତ ଆନୁଷଙ୍ଗିକ ବ୍ୟବସ୍ଥା ଯୋଗାଇଦିଆଯିବ ବୋଲି ଲିଖିତ ପ୍ରତିଶ୍ରୁତି ଦେବାପରେ ଆନ୍ଦୋଳନ ହଟିଥିଲା। ଦାବି ପୂରଣ ନ ହେଲେ ଆଗାମୀ ଦିନରେ ଆନ୍ଦୋଳନ କଡ଼ାକଡ଼ି କରାଯିବ ବୋଲି ବିଜେଡି ଚେତାବନୀ ଦେଇଛି। ମହିଳା, ଯୁବ, ଛାତ୍ର ଓ କୃଷକ ସଙ୍ଗଠନ ସଦସ୍ୟ ଏଥିରେ ସାମିଲ ହୋଇଥିଲେ। ଆନ୍ଦୋଳନରେ ବିଜେଡି ନେତା ଉତ୍ତମ ତ୍ରିପାଠୀ, ସୁମିତ ପାଳ, ଦିଲୁ ପଣ୍ଡା, ସୀମାଞ୍ଚଳ ପାଢ଼ୀ, ସଞ୍ଜୟ ନାୟକ, ନଗର ସଭାପତି ପ୍ରମୋଦ ରଥ, ଜିଲା ପରିଷଦ ସଭ୍ୟ ଅରୁଣ ମିଶ୍ର, ଦୟାନିଧି ବିଷୋୟୀ, ପ୍ରଣତୀ ତ୍ରିପାଠୀ, କାମିନୀ ପାଢ଼ୀ, ନୀଳମାଧବ ପାତ୍ର ପ୍ରମୁଖ ସାମିଲଥିଲେ।