ନବରଙ୍ଗପୁର,୨୫ା୧(ସଦାଶିବ ପ୍ରହରାଜ): ଚଳିତ ମାସ ୧୩ ତାରିଖ ସନ୍ଧ୍ୟାରେ ମହିଳାଙ୍କୁ ହାତ ଓ ପାଟିକୁ କପଡ଼ାରେ ବାନ୍ଧି ତଣ୍ଟିରେ ଛୁରି ଲଗାଇ ନଗଦ ୨୦ ଲକ୍ଷ ଟଙ୍କା ଓ ୧୦ ଭରି ସୁନା ଲୁଟି ନେଲେ ଦୁର୍ବୃତ୍ତ ଏହି ଘଟଣା ପ୍ରଚାରିତ ହେବା ପରେ ସହରରେ ଏକ ପ୍ରକାର ଭୟର ବାତାବରଣ ସୃଷ୍ଟି ହୋଇଥିଲା ।
ଏହି ଘଟଣାରେ ନବରଙ୍ଗପୁର ପୋଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରିବା ସହିତ କୋର୍ଟ ଚାଲାଣ କରିଛି। ସେମାନେ ହେଲେ ଚିନ୍ମୟ କୁମାର ସାହୁ(୩୭) ଓ ଶ୍ରୀମାନ କୁମାର ଘଡ଼େଇ (୩୯)। ଚିନ୍ମୟଙ୍କ ଘର ଢେଙ୍କାନାଳ ଜିଲା କାମାକ୍ଷା ନଗର ବୈଶିଙ୍ଗା। ସେ ନବରଙ୍ଗପୁର ସାନ ମସିଗାଁରେ ରହିଥିଲେ। ଶ୍ରୀମାନଙ୍କ ଘର ନବରଙ୍ଗପୁର କେଉଟ ସାହିରେ। ସେ ଜଣେ ପରିବା ବ୍ୟବସାୟୀ ଭାବେ ବେଶ ଜଣାଶୁଣା। ସେମାନଙ୍କଠାରୁ ଚୋରିରେ ବ୍ୟବହାର ମୋଟରସାଇକେଲ ନମ୍ବର (ଓଡି ୨୪ କେ ୨୯୨୪) ୧୧ ଲକ୍ଷ ୨୩ ହଜାର ଟଙ୍କା, ଗୋଟିଏ ସୁନା ଚେନ, ମୁଦି, ଛୁରି, ଟଙ୍କା ରହିଥିବା ବ୍ୟାଗ୍ ଓ ତିନୋଟି ମୋବାଇଲ ଜବତ କରାଯାଇଛି ବୋଲି ନବରଙ୍ଗପୁର ଏସପି ମିହିର କୁମାର ପଣ୍ଡା ଖବରଦାତା ସମିଳନୀରେ ସୂଚନା ଦେଇଛନ୍ତି। ଦୁଇଜଣ ଅଭିଯୁକ୍ତ ଟଙ୍କା ବ୍ୟାଗ୍ ଓ ସୁନା ଡକାୟତି କରିବା ପରେ ବାଙ୍ଗାପାଲି ଜଙ୍ଗଲକୁ ଯାଇ ସମାନ ଭାବରେ ୭ ଲକ୍ଷ ଟଙ୍କା ଦୁଇ ଭାଗ କରିଥିଲେ। ପରେ ଆସି ଘରେ ଟଙ୍କା ରଖିଥିଲେ।
ନବରଙ୍ଗପୁର ମଧ୍ୟଭାଗରେ ଥିବା ଦାରୁବନ୍ଧ ସାହିର ବ୍ୟବସାୟୀ ସରୋଜ ମହାନ୍ତି ଘରେ ନଥିବା ବେଳେ ଦୁଇଜଣ ମୁଖାପିନ୍ଧା ଯୁବକ ଘର ଭିତରେ ପଶିଥିଲେ। ସରୋଜଙ୍କ ସ୍ତ୍ରୀ ଅମିତା ମହାନ୍ତି ଘରେ ଏକୁଟିଆ ଥିବା ଦେଖି ତାଙ୍କୁ ପ୍ରଥମେ ମୁଣ୍ଡକୁ ମାଡ଼ ମାରି ହାତ ଓ ପାଟିକୁ ବାନ୍ଧି ଦେଇଥିଲେ। ପରେ ବେକରେ ଛୁରି ଲଗାଇ ସୁନା ଓ ଟଙ୍କା ମାଗିଥିଲେ। ପ୍ରତିବାଦ କରିବାରୁ ଜୀବନରେ ମାରିବାକୁ ଧମକ ଦେଇଥିଲେ। ପରେ ମହିଳା ଜଣକ ନିଜର ପିନ୍ଧିଥିବା ଅଳଙ୍କାର କାଡି ଦେଇଥିଲେ । ପରେ ଆଲମିରା ଖୋଲିବାକୁ ଧମକ ଦେଇଥିଲେ। ଆଲମିରା ଖୋଲିବା ପରେ ଆଲମିରାରୁ ଟଙ୍କା ବ୍ୟାଗ୍ ଓ ସୁନା ଅଳଙ୍କାର ବାହାର କରି ନେଇଯାଇଥିଲେ। ପରେ ତାଲା ପଡ଼ି ନ ଥିବା ଅନ୍ୟ ଏକ ଆଲମିରାରୁ ଟଙ୍କା ଓ ସୁନା ମଧ୍ୟ ବାହାର କରିଥିଲେ। ଟଙ୍କା ଓ ସୁନା ଧରିବା ପରେ ମହିଳାଙ୍କୁ ଏକ ରୁମ୍ ଭିତରେ ରଖି ବାହାର ଗାଡ଼ା ଦେଇଦେଇ ଦୁଇ ଯୁବକ ଏକ ମୋଟରସାଇକେଲର ଫେରାର ହୋଇଯାଇଥିଲେ। ମହିଳା ଜଣକ ପାଟି କରିବାରୁ ତଳଘର ଲୋକ ଆସି କବାଟ ଖୋଲିଥିଲେ।
ପରେ ସରୋଜ ମହାନ୍ତି ନବରଙ୍ଗପୁର ଥାନାରେ ଏତଲା ଦେଇଥିଲେ। ପ୍ରାୟ ୧୮ ଲକ୍ଷ ଟଙ୍କା ଓ ଗହଣା ଚୋରି ହୋଇଥିବା ଥାନାରେ ଏତଲା ଦେଇଥିଲେ। ତେବେ ସରୋଜଙ୍କ ସ୍ତ୍ରୀ ଅମିତା ଶ୍ରୀମାନଙ୍କ କଥାରୁ ବାରିଥିଲେ ଯେ କେହି ଜଣେ ଚିହ୍ନା ଲୋକ ଯୁବକ। ଯେହେତୁ ମୁଖା ପିନ୍ଧିଥିବାରୁ ସନ୍ଦେହ କରି ପରବର୍ତ୍ତୀ ସମୟରେ ପୋଲିସକୁ ସୂଚନା ଦେଇଥିଲେ। ଡକାୟତି କରିବା ସମୟରେ ଦୁଇ ଅଭୁଯୁକ୍ତ ମୋବାଇଲ ବ୍ୟବହାର କରି ନ ଥିବାରୁ ପୋଲିସ ତଦନ୍ତରେ କିଛି ପାଇବ ନାହିଁ ଅଭିଯୁକ୍ତ ଭାବିଥିଲେ। ଅତିରିକ୍ତ ଏସପି ଆଦିତ୍ୟ ସେନ, ଏସ୍ଡିପିଓ କୃଷ୍ଣଚନ୍ଦ୍ର ଭତରା, ଥାନା ଅଧିକାରୀ ସମ୍ବିତ କୁମାର ବେହେରା, ଏସାଇ ଦେବାଶିଷ ସାହୁ, ସବୀର ଅହମ୍ମଦ ଓ ଏଏସ୍ଆଇ ତୁଳସୀରାମ ପୂଜାରୀଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ସ୍ଥାନୀୟ ୨ଶହରୁ ଊର୍ଦ୍ଧ୍ୱ ଲୋକଙ୍କୁ ପଚରାଉଚରା କରିବା ପରେ ମୁଖ୍ୟ ଅଭିଯୁକ୍ତ ତଥା ମାଷ୍ଟରମାଇଣ୍ଡ ଶ୍ରୀମାନ ଓ ଚିନ୍ମୟକୁ ଧରିଥିଲା ପୋଲିସ । ଅଭିଯୁକ୍ତମାନେ ଚୋରି ଟଙ୍କାରୁ ୧ ଲକ୍ଷ ୫୭ ହଜାର ଟଙ୍କା ଖର୍ଚ୍ଚ କରିବା ସହିତ ୭୯ ହଜାର ଟଙ୍କା ଦେଇ ୩ ଟି ମୋବାଇଲ କିଣିଥିଲେ। ୫୦ ହଜାର ଟଙ୍କା ଫାଇନାନ୍ସରେ ଜମା କରିଥିଲେ। ତେବେ ଫାଇନାନ୍ସ ବିଭାଗକୁ ଟଙ୍କା ଫେରସ୍ତ ପାଇଁ ପୋଲିସ ଚିଠି କରିଛି ବୋଲି ସୂଚନା ଦେଇଛନ୍ତି ଏସ୍ପି ପଣ୍ଡା। ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ଆଦିତ୍ୟ ସେନ, ଏସଡ଼ିପିଓ କୃଷ୍ଣଚନ୍ଦ୍ର ଭତ୍ରା, ନବରଙ୍ଗପୁର ଥାନା ଅଧିକାରୀ ସମ୍ବିତ କୁମାର ବେହେରା ପ୍ରମୁଖ ଉପସ୍ଥିତ ଥିଲେ।