ନୂଆଦିଲ୍ଲୀ,୩୦ା୩(ପି.ଟି.)
ମାର୍ଚ୍ଚ ୩୧ ସୁଦ୍ଧା ଭାରତକୁ ମାଓବାଦୀ ମୁକ୍ତ କରିବା ଲାଗି ସରକାର ସମୟସୀମା ଧାର୍ଯ୍ୟ କରିଥିଲେ। ଏହା ଶେଷ ହେବାକୁ ଆଉ ମାତ୍ର ଗୋଟିଏ ଦିନ ଥିବାବେଳେ ଏନେଇ ସରକାର କରିଥିବା ଉଦ୍ୟମ ସମ୍ପର୍କରେ ସୋମବାର ଲୋକ ସଭାରେ ଆଲୋଚନା ହେବ। ରୁଲ୍-୧୯୩ ଅନୁଯାୟୀ, ଉକ୍ତ ପ୍ରସଙ୍ଗ ଉପରେ ଆଲୋଚନା କରିବାକୁ ଲୋକ ସଭା ସଚିବାଳୟ ତାଲିକାଭୁକ୍ତ କରିଥିବାରୁ ଏହା ଉପରେ ଭୋଟିଂ ହେବ ନାହିଁ। ସ୍ବଳ୍ପ ସମୟର ଏହି ଆଲୋଚନା ପରେ ସରକାର ଉତ୍ତର ରଖିବେ। ଟିଡିିପି ସଦସ୍ୟ ବାୟରେଡ୍ଡୀ ଶବରୀ ଏବଂ ଶିବସେନା ସଦସ୍ୟ ଶ୍ରୀକାନ୍ତ ଶିନ୍ଦେ ଆଲୋଚନା ଆରମ୍ଭ କରିବେ।
୨୦୨୬ ମାର୍ଚ୍ଚ ୩୧ ସୁଦ୍ଧା ଦେଶକୁ ମାଓବାଦୀ ସମସ୍ୟାରୁ ସମ୍ପୂର୍ଣ୍ଣ ମୁକ୍ତ କରିବା ଲାଗି ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ଘୋଷଣା କରିଥିଲେ। ସଦ୍ୟ ସମୀକ୍ଷା ଅନୁଯାୟୀ, ଦେଶରେ ମାଓବାଦୀ ପ୍ରଭାବିତ ଜିଲା ସଂଖ୍ୟା ୮ରୁ ୭କୁ ହ୍ରାସ ପାଇଛି। ମାଓବାଦୀ ନିରୋଧୀ ଅଭିଯାନରେ ଅଧିକ ସୁରକ୍ଷା ବଳଙ୍କୁ ସାମିଲ କରାଯାଇ ସମୟସୀମା ଶେଷ ସୁଦ୍ଧା ଅବଶିଷ୍ଟ ସଶସ୍ତ୍ର ମାଓବାଦୀଙ୍କୁ ନିପାତ କରିବା ଲାଗି ଉଦ୍ୟମ ଜାରି ରହିଛି।
ସୁରକ୍ଷା ଚାପ ସହ ପୁନର୍ବାସନ ଉଦ୍ୟମ ମାଓବାଦ ଅଭିଯାନକୁ ବଡ଼ ଝଟକା ଦେଇଛି। ଗତ ଦଶନ୍ଧି ମଧ୍ୟରେ ୧୦,୦୦୦ରୁ ଊର୍ଦ୍ଧ୍ୱ ମାଓବାଦୀ ଅସ୍ତ୍ର ତ୍ୟାଗ କରିଥିବାବେଳେ ବହୁସଂଖ୍ୟାରେ ଶୀର୍ଷ ମାଓବାଦୀ ନିହତ ହୋଇଥିବା ସରକାରୀ ଅଧିକାରୀମାନେ ସୂଚନା ନେଇଛନ୍ତି। ୨୦୨୫ରେ ମୋଟ ୨,୩୦୦ ମାଓବାଦୀ ଅସ୍ତ୍ର ସମର୍ପଣ କରିଥିବାବେଳେ ୨୦୨୬ର ପ୍ରଥମ ୩ ମାସରେ ୬୨୦ରୁ ଊର୍ଦ୍ଧ୍ୱ ମାଓବାଦୀ ଆତ୍ମସମର୍ପଣ କରି ସମାଜର ମୁଖ୍ୟ ସ୍ରୋତକୁ ଫେରିବା ପାଇଁ ନିଷ୍ପତ୍ତି ନେଇଥିଲେ। ମାଓବାଦୀଙ୍କୁ ଦମନ କରିବା ପାଇଁ ସରକାର ଏକକ, ବହୁମୁଖୀ ଏବଂ ନିର୍ଣ୍ଣାୟକ ରଣନୀତି ଆପଣାଇଛନ୍ତି। ଏଥିସହିତ ମାଓବାଦୀ ପ୍ରବଣ ଅଞ୍ଚଳର ବିକାଶ ପାଇଁ ସରକାର ରୂପରେଖ ପ୍ରସ୍ତୁତ କରିଛନ୍ତି। ଉକ୍ତ ଅଞ୍ଚଳରୁ ସରକାର ୫ କେନ୍ଦ୍ରୀୟ ସଶସ୍ତ୍ର ପୋଲିସ୍ ଫୋର୍ସ (ପିଏପିଏଫ୍)ଙ୍କୁ ପ୍ରତ୍ୟାହାର କରିନେଇ ସେଠାରେ ବିଭିନ୍ନ କଲ୍ୟାଣକାରୀ ଯୋଜନା କାର୍ଯ୍ୟକାରୀ କରିବାକୁ ଯାଉଛନ୍ତି।