ପାରାଦୀପ, ୨୩।୨(ଶରତ ରାଉତ): ଜଗତସିଂହପୁର ଜିଲା ପାରାଦୀପ ଆଦର୍ଶଥାନା ଅନ୍ତର୍ଗତ ତାରିଣୀଗଡା ଅଞ୍ଚଳରେ ସୋମବାର ସକାଳୁ ଅଭାବନୀୟ ଘଟଣା ଘଟିଛି। ଜଣେ ଅଚିହ୍ନା ମହିଳା ୪ ମହଲା ବିଶିଷ୍ଟ କୋଠା ଛାତରୁ ଖସି ପଡିବାରୁ ତାଙ୍କର ମୃତ୍ୟୁ ଘଟିଛି। ଖବରପାଇ ଆଦର୍ଶଥାନା ପୋଲିସ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ ଟିମ ଜରିଆରେ ତଦନ୍ତ ଚଳାଇଛନ୍ତି। ଉକ୍ତ ଘରେ ଲାଗିଥିବା ସିସିଟିଭି ଫୁଟେଜ ଥିବା କମ୍ପ୍ୟୁଟର ହାର୍ଡଡିସ୍କକୁ ଜବତ କରି ଯାଞ୍ଚ କରୁଛି। ସେହି ଘରର ୪ ମହଲାରେ ଥିବା ୯ ଜଣ ଭଡାଟିଆ ଯୁବକଙ୍କ ମଧ୍ୟରୁ ୭ ଜଣଙ୍କୁ ଅଟକ ରଖିଛି।
ଛାତ ଉପରେ ଅଧାଜଳା ସିଗାରେଟ, ଗୁଟୁଖା ଖୋଳ, ମହିଳାଙ୍କ ଚପଲ ପଡିଛି। ଛାତରୁ ଖସିବା ବେଳେ ମହିଳାଙ୍କ ପୋଷାକ ଚିରି କାନ୍ଥ ପାଇପରେ ଲାଗିଥିବା ଦେଖିବାକୁ ମିଳିଛି। ଉକ୍ତ ଘର ମାଲିକ ହେଲେ ବଡପଡିଆ ବଜାର ବ୍ୟବସାୟୀ ଶମ୍ଭୁ ଖୁଣ୍ଟିଆ। ଉକ୍ତ ଘର ମରାମତି କାର୍ଯ୍ୟ ଚାଲିଥିବାରୁ ସବୁ ଘର ଖାଲି ରହିଛି। ଗତ ୮ ଦିନ ତଳେ ୯ ଜଣ ବ୍ୟାଚେଲର ପିଲା ଉପର ଘରେ ଭଡାରେ ରହୁଥିଲେ। ମହିଳାଙ୍କ ମୁଣ୍ଡ ମାଡ ହୋଇଥିବାରୁ ମୁଣ୍ଡରୁ ରକ୍ତସ୍ରାବ ହୋଇଛି ଏବଂ ତଳେ ପଡିବା ବେଳେ ଅର୍ଦ୍ଧ ଉଲଗ୍ନ ଅବସ୍ଥାରେ ଥିଲେ। ଘଟଣାକୁ ନେଇ ବିଭିନ୍ନ ପ୍ରକାର ଆଲୋଚନା ହେଉଛି। ଘଟଣା ସମ୍ପର୍କରେ ଅତିରିକ୍ତ ଆରକ୍ଷୀ ଅଧିକ୍ଷକ ସ୍ମୃତିରଞ୍ଜନ କର କୁହନ୍ତି, ମହିଳାଙ୍କ ପରିଚୟ ମିଳିନାହିଁ। ସବୁ ଦିଗରୁ ପୋଲିସ ତଦନ୍ତ କରୁଛି। କେତେକ ପ୍ରାଥମିକ ସୁରାକ ମିଳିଛି। ବ୍ୟବଚ୍ଛେଦ ରିପୋର୍ଟ,ସିସିଟିଭି ଫୁଟେଜ, ସାଇଣ୍ଟିଫିକ ଟିମ ରିପୋର୍ଟ ମିଳିବା ପରେ କାରଣ ସ୍ପଷ୍ଟ ହୋଇଯିବ।