ନୂଆଦିଲ୍ଲୀ,୮ା୪(ପି.ଟି.):କାର୍ଯ୍ୟବ୍ୟସ୍ତତା କାରଣରୁ ୪୨.୫ ପ୍ରତିଶତ ଭାରତୀୟ ସେମାନଙ୍କ ସ୍ବାସ୍ଥ୍ୟ ପ୍ରତି ଅଣଦେଖା କରୁଥିବା ସ୍ବୀକାର କରିଛନ୍ତି। ୫୭.୮ ପ୍ରତିଶତ କହିଛନ୍ତି, ସେମାନଙ୍କ ସ୍ବାସ୍ଥ୍ୟ ପାଇଁ କ’ଣ ଭଲ ତାହା ସେମାନେ ଜାଣନ୍ତି, କିନ୍ତୁ ତାହାକୁ କାର୍ଯ୍ୟକାରୀ କରିବା କଷ୍ଟ ହୋଇଥାଏ। ସଚେତନତା ଏବଂ ଏହାକୁ କାର୍ଯ୍ୟକାରୀ କରିବା ମଧ୍ୟରେ ବ୍ୟବଧାନ ବଢ଼ୁଥିବା ମଙ୍ଗଳବାର ପ୍ରକାଶିତ ଏକ ସର୍ଭେରୁ ଏହା ଜଣାପଡ଼ିଛି।
ବିଶ୍ୱ ସ୍ବାସ୍ଥ୍ୟ ଦିବସ ଅବସରରେ ହାବିଲ୍ଡ ନାମକ ଆରୋଗ୍ୟ ମଞ୍ଚ ପକ୍ଷରୁ ମେଟ୍ରୋ ସମେତ ବିଭିନ୍ନ ସହରର ୫,୦୦୦ରୁ ଊର୍ଦ୍ଧ୍ୱ ଲୋକଙ୍କ ମତାମତ ନିଆଯାଇ ଏହି ତଥ୍ୟ ଆଧାରିତ ଅଧ୍ୟୟନ କରାଯାଇଥିଲା। ଅଧ୍ୟୟନ ଅନୁଯାୟୀ, ୪୬ ପ୍ରତିଶତ ଲୋକ ନିଜକୁ ଫିଟ୍ ରଖିବା ପାଇଁ ସକ୍ରିୟ ଉଦ୍ୟମ କରୁଥିଲେ ମଧ୍ୟ ଏହାକୁ ନିୟମିତ ଜାରି ରଖିବାରେ ବିଫଳ ହେଉଛନ୍ତି। ଏଥିରୁ ସୂଚିତ ହେଉଛି ଯେ, ସଚେତନତାକୁ ନେଇ ନୁହେଁ, ବରଂ ଦୈନନ୍ଦିନ ଜୀବନରେ ସ୍ବାସ୍ଥ୍ୟକର ଅଭ୍ୟାସଗୁଡ଼ିକୁ ସାମିଲ କରିବାକୁ ନେଇ ଚ୍ୟାଲେଞ୍ଜ ରହିଥିତ୍ବା ରିପୋର୍ଟରେ କୁହାଯାଇଛି। ମତାମତ ଦେଇଥିବା ଲୋକଙ୍କ ମଧ୍ୟରୁ ପ୍ରାୟ ୯୦ ପ୍ରତିଶତ ମହିଳାଙ୍କ ବୟସ ୪୫ ବର୍ଷ କିମ୍ବା ତଦୂର୍ଦ୍ଧ୍ୱ ଥିଲା।
ସର୍ଭେରୁ ସ୍ପଷ୍ଟ ହୋଇଛି ଯେ, ଦୈନନ୍ଦିନ ଜୀବନରେ ବ୍ୟାୟାମ ଛାଡ଼ିଦେବା, ପରିବାରର ଦାୟିତ୍ୱ ଯୋଗୁ ଚାଲିବା ପାଇଁ ସମୟ ନ ଦେବା ଏବଂ ଅଧିକ ସମୟ ଶୋଇବାରେ ସାଲିସ୍ କରିବା ଯୋଗୁ ସ୍ବାସ୍ଥ୍ୟ ପ୍ରତି ପ୍ରାଥମିକତା ଦିଆଯାଇପାରୁନାହିଁ। ଶାରୀରିକ କାର୍ଯ୍ୟକଳାପରେ ସ୍ଥିରତା ବଜାୟ ରଖିବାରେ ଲିଙ୍ଗଗତ ପ୍ରତିବନ୍ଧକ ମଧ୍ୟ ରହିଥିବା ସର୍ଭେରୁ ଜଣାପଡ଼ିଛି। ପରିବାର ଏବଂ ଘରର ଦାୟିତ୍ୱ ଯୋଗୁ ମହିଳାମାନେ ସେମାନଙ୍କ ସ୍ବାସ୍ଥ୍ୟ ପ୍ରତି ଅଧିକ ଅଣଦେଖା କରିଥାନ୍ତି। ଅନ୍ୟପକ୍ଷରେ ପୁରୁଷମାନେ ଇଚ୍ଛାଶକ୍ତି ଥିବା ସତ୍ତ୍ୱେ ନିୟମିତ ନିୟମ ମାନି କାର୍ଯ୍ୟ କରିବାରେ ଅସୁବିଧା ହୋଇଥାଏ। ଉତ୍ତମ ସ୍ବାସ୍ଥ୍ୟ ବଜାୟ ରଖିବାରେ ଜୀବନଶୈଳୀ ଚାପ ମୁଖ୍ୟ ପ୍ରତିବନ୍ଧକ ଭାବେ ଦେଖାଦେଇଛି। ପରିବାରର ଦାୟିତ୍ୱ ସବୁଠୁ ବଡ଼ ପ୍ରତିବନ୍ଧକ ବୋଲି ୨୮ ପ୍ରତିଶତ ମତ ଦେଇଥିବାବେଳେ କାର୍ଯ୍ୟଜନିତ ଚାପକୁ ୧୯.୬% ଏବଂ ପ୍ରେରଣାର ଅଭାବକୁ ୧୭.୫%
ଦାୟୀ କରିଛନ୍ତି।
ଆଗାମୀ ଦଶକରେ ଜୀବନଶୈଳୀ ରୋଗ ଭାରତରେ ସ୍ବାସ୍ଥ୍ୟ ପ୍ରତି ସବୁଠୁ ବଡ଼ ଆହ୍ବାନ ହେବ ବୋଲି ୫୧.୫ ପ୍ରତିଶତରୁ ଊର୍ଦ୍ଧ୍ୱ ବିଶ୍ୱାସ କରୁଥିବା କହିଛନ୍ତି। ମାନସିକ ସ୍ବାସ୍ଥ୍ୟକୁ ନେଇ ଚିନ୍ତା ବଢ଼ୁଥିବା ୨୭.୪ ପ୍ରତିଶତ ମତ ଦେଇଛନ୍ତି। ଏ ସମ୍ପର୍କିତ ସଚେତନତା ସ୍ଥାୟୀ ଆଚରଣରେ ପରିଣତ ହୋଇପାରିନାହିଁ। ସ୍ବାସ୍ଥ୍ୟକୁ ଅଧିକ ଗୁରୁତ୍ୱର ସହ ନେବା ପାଇଁ ଗଠନମୂଳକ କାର୍ଯ୍ୟକ୍ରମ ସହାୟକ ହେବ ବୋଲି ୫୮.୭ ପ୍ରତିଶତ ମତ ଦେଇଛନ୍ତି। ପ୍ରତିବେଶୀଙ୍କ ସହଭାଗିତାରେ ସ୍ବାସ୍ଥ୍ୟ ସଚେତନତା ନିୟମିତତାରେ ଉନ୍ନତି ଘଟିବ ବୋଲି ୭୧ ପ୍ରତିଶତ ବିଶ୍ୱାସ କରୁଥିବା କହିଛନ୍ତି।