ନୂଆଦିଲ୍ଲୀ,୨୦।୬: ଦେଶରେ ଜଳସଙ୍କଟ ଉତ୍କଟ ହେବାରେ ଲାଗିଛି। ଜଳବାୟୁ ପରିବର୍ତ୍ତନ ତଥା କଂକ୍ରିଟ୍ ଜଙ୍ଗଲ ଯୋଗୁ ଧୀରେଧୀରେ ଭୂତଳ ଜଳସ୍ତର କମିବାରେ ଲାଗିଛି। ଆସନ୍ତା ୨୦୨୦ ସୁଦ୍ଧା ଦେଶର ୨୧ଟି ସହର ଭୂତଳ ଜଳ ଶୂନ୍ୟ ହେବାର ଆଶଙ୍କ ଦେଖାଦେଇଛି। ଏନେଇ ନୀତି ଆୟୋଗ ଦ୍ୱାରା ପ୍ରସ୍ତୁତ ଏକ ରିପୋର୍ଟରେ ପ୍ରକାଶ ପାଇଛି। ଏସବୁ ସହର ମଧ୍ୟରେ ଦିଲ୍ଲୀ, ବେଙ୍ଗାଲୁର୍, ଚେନ୍ନାଇ, ହାଇଦ୍ରାବାଦ୍ ଆଦି ରହିଛି। ଏହାଦ୍ୱାରା ଶହେ ନିୟୁତ ଲୋକ ପ୍ରଭାବିତ ହେବାର ଆଶଙ୍କା ରହିଛି। ୨୦୩୦ ସୁଦ୍ଧା ଦେଶର ୪୦ ପ୍ରତିଶତ ଲୋକ ପିଇବା ପାଣି ଅଭାବରେ ହନ୍ତସନ୍ତ ହେବେ ବୋଲି ଏହି ରିପୋର୍ଟରେ ଦର୍ଶାଯାଇଛି। ଭଲ ବର୍ଷା ହେବା ସତ୍ତ୍ୱେ ସମ୍ପ୍ରତି ଚେନ୍ନାଇରେ ୩ଟି ନଦୀ, ୪ଟି ଜଳ ଉତ୍ସ, ୫ଟି ଆଦ୍ର ଭୂମି ଏବଂ ୬ଟି ଜଙ୍ଗଲ ସମ୍ପୂର୍ଣ୍ଣ ଶୁଖି ଯାଇଛି। ଏହାର ପ୍ରଭାବରେ ଏଠାରେ ଜଳ ସଙ୍କଟ ଉତ୍କଟ ରୂପ ଧାରଣ କରିଥିବା କୁହାଯାଉଛି। ଏଠାରେ ଥିବା କଂକ୍ରିଟ୍ ଜଙ୍ଗଲ ଯୋଗୁ ଏଭଳି ହେଉଥିବା ପରିବେଶ୍ବିତ୍ ମତପୋଷଣ କରୁଥିବା ରିପୋର୍ଟରେ କୁହାଯାଉଛି। ଅପରପକ୍ଷରେ ଭଲ ବର୍ଷା ହେଉ ନ ଥିବା ଭାରତର ଅନ୍ୟ ସହରର ଅବସ୍ଥା ଆଗାମୀ ଦିନରେ ଚେନ୍ନାଇଠାରୁ ଅଧିକ ଖରାପ ହେବାର ଆଶଙ୍କା ଥିବା ରିପୋର୍ଟ ସୂଚିତ ହୋଇଛି।