ସାତକୋଶିଆରେ ୧୮୪୫ ପିଆଇପି, ୨୪୬ ଟ୍ରାଞ୍ଜାକ୍ଟ ଲାଇନ:ବାଘ ସର୍ବେକ୍ଷଣ ଆରମ୍ଭ

ବନ୍ତଳା,୧୭ା୧୨(ଡି.ଏନ.ଏ.)

ଅନୁଗୋଳ ଜିଲା ଆଞ୍ଚଳିକ ବନ ସଂରକ୍ଷଣ ଅଧୀନରେ ଥିବା ସାତକୋଶିଆ ବ୍ୟାଘ୍ର ପ୍ରକଳ୍ପରେ ସୋମବାରଠାରୁ ତୃଣଭୋଜି ଓ ମାଂସାସୀ ପ୍ରାଣୀଙ୍କ ସର୍ବେକ୍ଷଣ ଆରମ୍ଭ ହୋଇଛି। ଏହା ୨୧ ତାରିଖ ପର୍ଯ୍ୟନ୍ତ ୬ ଦିନ ଧରି ଚାଲିବ। ୧୮ ତାରିଖ ଯାଏ ତୃଣଭୋଜୀ ଓ ୧୯ରୁ ୨୧ ତାରିଖ ପର୍ଯ୍ୟନ୍ତ ମାଂସାସୀ ପ୍ରାଣୀଙ୍କ ସର୍ବେକ୍ଷଣ କରାଯିବ। ସାତକୋଶିଆ ବ୍ୟାଘ୍ର ପ୍ରକଳ୍ପ ଅଞ୍ଚଳ ତଥା ମୋଟ୍‌ ୧୧୩୬.୭୦ ବର୍ଗ କିଲୋମିଟର ପରିଧିରେ ଏହି ସର୍ବେକ୍ଷଣ କରାଯିବ।
ଏହି ସର୍ବେକ୍ଷଣ ପାଇଁ ନଭେମ୍ବର ୨୦ରେ ବନଖଣ୍ଡସ୍ତରୀୟ ଓ ନଭେମ୍ବର ୨୨ରେ ରେଞ୍ଜ କାର୍ଯ୍ୟାଳୟସ୍ତରୀୟ ତାଲିମ ପ୍ରଦାନ କରାଯାଇଥିଲା। ଏଥିସହ ପ୍ରତି ବିଟ୍‌କୁ ଗୋଟିଏ ୟୁନିଟ୍‌ ଭାବେ ନିଆଯାଇ ସେଥିରେ ୧୫ଟି ପବ୍‌ ଇମ୍ପ୍ରେସନ ପ୍ୟାଡ୍‌ (ପିଆଇପି) ଓ ଦୁଇଟି ଟ୍ରାଞ୍ଜାକ୍ଟ ଲାଇନ ତିଆରି ନିମନ୍ତେ ନିର୍ଦ୍ଦେଶ ଦିଆଯାଇଥିଲା। ବ୍ୟାଘ୍ର ପ୍ରକଳ୍ପ ଅଧୀନରେ ମୋଟ୍‌ ୧୨୩ଟି ବିଟ୍‌ ଥିବାରୁ ୧୮୪୫ଟି ପିଆଇପି ଓ ୨୪୬ଟି ଟ୍ରାଞ୍ଜାକ୍ଟ ଲାଇନ ପ୍ରସ୍ତୁତ କରାଯାଇଛି। ସେଥିମଧ୍ୟରୁ ସାତକୋଶିଆ ବନ୍ୟପ୍ରାଣୀ ବନଖଣ୍ଡର ୪୫ ବିଟ୍‌ରେ ୬୭୫ଟି ପିଆଇପି ଓ ୯୦ଟି ଟ୍ରାଞ୍ଜାକ୍ଟ ଲାଇନ ନିର୍ମାଣ କରାଯାଇଛି। ସେହିପରି ମହାନଦୀ ବନ୍ୟପ୍ରାଣୀ ବନଖଣ୍ଡର ୩୬ଟି ବିଟ୍‌ରେ ୫୪୦ଟି ପିଆଇପି ଓ ୭୨ଟି ଟ୍ରାଞ୍ଜାକ୍ଟ ଲାଇନ, ଆଠମଲ୍ଲିକ ବନଖଣ୍ଡର ୧୧ଟି ବିଟ୍‌ ଅଞ୍ଚଳରେ ୧୬୫ଟି ପିଆଇପି ଓ ୨୨ ଟ୍ରାଞ୍ଜାକ୍ଟ ଲାଇନ, ଅନୁଗୋଳ ବନଖଣ୍ଡର ୧୪ଟି ବିଟ୍‌ରେ ୨୧୦ଟି ପିଆଇପି ଓ ୨୮ ଟ୍ରାଞ୍ଜାକ୍ଟ ଲାଇନ, ଆଠଗଡ ବନଖଣ୍ଡ ଅଞ୍ଚଳର ୧୪ଟି ବିଟ୍‌ରେ ୨୧୦ ପିଆଇପି ଓ ୨୮ ଟ୍ରାଞ୍ଜାକ୍ଟ ଲାଇନ, ଢେଙ୍କାନାଳ ବନଖଣ୍ଡ ଅଞ୍ଚଳର ଗୋଟିଏ ବିଟ୍‌ରେ ୧୫ ପିଆଇପି ଓ ଦୁଇଟି ଟ୍ରାଞ୍ଜାକ୍ଟ ଲାଇନ, ବୌଦ୍ଧ ବନଖଣ୍ଡର ଦୁଇଟି ବିଟ୍‌ରେ ୩୦ ପିଆଇପି ଓ ୪ଟି ଟ୍ରାଞ୍ଜାକ୍ଟ ଲାଇନ ନିର୍ମାଣ ହୋଇଛି। ପ୍ରତି ବିଟ୍‌ ବା ୟୁନିଟ୍‌ରେ ଜଣେ ଫରେଷ୍ଟରଙ୍କ ସହିତ ୪ ଜଣ ୱାଚରଙ୍କୁ ନିଯୁକ୍ତି ଦିଆଯାଇଛି। ଆଞ୍ଚଳିକ ମୁଖ୍ୟ ବନ ସଂରକ୍ଷକଙ୍କ ନିର୍ଦ୍ଦେଶ କ୍ରମେ ସାତକୋଶିଆ ଡିଏଫଓ ରାମାସ୍ବାମୀ ପି, ମହାନଦୀ ଡିଏଫଓ ଅଂଶୁପ୍ରଜ୍ଞା ଦାସ, ଅନୁଗୋଳ ଡିଏଫଓ ଭି. କାର୍ତ୍ତିକ, ଆଠମଲ୍ଲିକ ଡିଏଫଓ ଏବଂ ଆଠଗଡ଼ ଡିଏଫଓଙ୍କ ତତ୍ତ୍ୱବାଧାନରେ ଏହି ସର୍ବେକ୍ଷଣ କରାଯାଉଛି। ପ୍ରତ୍ୟେକ ରେଞ୍ଜ ଅଧିକାରୀ ନିଜ ଅଞ୍ଚଳର ତଥ୍ୟ ସଂଗ୍ରହ କରି ଡିଏଫ୍‌ଓମାନଙ୍କୁ ପ୍ରଦାନ କରିବେ।
ଏ ସମ୍ପର୍କରେ ଅନୁଗୋଳ ଆଞ୍ଚଳିକ ମୁଖ୍ୟ ତଥା ସାତକୋଶିଆ କ୍ଷେତ୍ର ନିର୍ଦ୍ଦେଶକ ପ୍ରଦୀପ ରାଜ କରାଟେ କୁହନ୍ତି, ଏହା ଚତୁର୍ଥସ୍ତରୀୟ ମନିଟରିଂ କାର୍ଯ୍ୟକ୍ରମ। ୬ ଦିନ ଧରି ଏହି ସର୍ବେକ୍ଷଣ ଏନ୍‌ଟିସିଏ ଗାଇଡ ଲାଇନ ଅନୁଯାୟୀ ହେବ। ସମ୍ପୂର୍ଣ୍ଣ ତଥ୍ୟ ଆସିଲେ ବାଘ ଓ ତୃଣଭୋଜୀଙ୍କ ସଂଖ୍ୟା ସମ୍ପର୍କରେ କୁହାଯିବ।