ମୌସୁମୀ ପହଞ୍ଚିଲେ ଜୋର୍ ଧରିବ ଚାଷ କାର୍ଯ୍ୟ : ନିଅଣ୍ଟ ବିହନକୁ ନେଇ ଚିନ୍ତାରେ ଚାଷୀ
21 ଅନୁଗୋଳ ଅଫିସ, ୧୬।୬ – ଅକ୍ଷୟ ତୃତୀୟାରେ ଅଖିମୁଠି ଅନୁକୂଳ ପରେ ଚାଷ କାର୍ଯ୍ୟ ଆରମ୍ଭ କରିଦେଇଛନ୍ତି ଚାଷୀ। ଗତବର୍ଷ ଅପେକ୍ଷା ଚଳିତବର୍ଷ କ୍ଷେତରୁ ଭଲ ଫସଲ ଅମଳ କରିବାକୁ ସେମାନେ ଆଶା ବାନ୍ଧିଛନ୍ତି। ଗତବର୍ଷ ଅନିୟମିତ ବର୍ଷା ଯୋଗୁ ଚାଷରେ ସାମାନ୍ୟ ବାଧା ଉପୁଜିଥିଲା। ଏପରି କି ଜିଲାର କେତେକ ବ୍ଲକରେ ମରୁଡ଼ି ଚାଷୀଙ୍କୁ କ୍ଷତିଗ୍ରସ୍ତ କରିଥିଲା। ତଥାପି ନୂଆ ଆଶା ଓ ଉତ୍ସାହ ନେଇ ଚାଷୀ ଓହ୍ଲାଇଛନ୍ତି ଜମିକୁ। ହେଲେ ଘରେ ନ ପଶୁଣୁ ଚାଳ ବାଜିବା ପରି ଚାଷ କାର୍ଯ୍ୟ ଜୋର୍ ଧରିବା ପୂର୍ବରୁ ବିହନ ଅଭାବ ଚିନ୍ତାର କାରଣ ହୋଇଛି। ଚଳିତବର୍ଷ ଅନୁଗୋଳ ଜିଲାରେ ପଞ୍ଜୀକୃତ ହୋଇଥିବା ଚାଷୀଙ୍କ ପାଇଁ ୧୩ ହଜାର କୁଇଣ୍ଟାଲ ଧାନ ବିହନ ଆବଶ୍ୟକ। କିନ୍ତୁ ବର୍ତ୍ତମାନ ସୁଦ୍ଧା ୯ ହଜାର ୮୯୦ କୁଇଣ୍ଟାଲ ବିହନ ମହଜୁଦ ରହିଥିବା କୃଷି ବିଭାଗ ପକ୍ଷରୁ ସୂଚନା ମିଳିଛି। ଏହାକୁ ନେଇ ଚାଷୀ ମହଲରେ ଅସନ୍ତୋଷ ଦେଖାଦେଇଛି।
ସରକାରଙ୍କ ନିୟମ ଅନୁଯାୟୀ, କୃଷି ସମବାୟ ସମିତିରୁ ବିହନ କିଣିଲେ ଚାଷୀ ସିଧାସଳଖ ସବ୍ସିଡି ପାଇପାରିବେ। ଏ ନେଇ ଚାଷୀଙ୍କ ମନରେ ଉତ୍କଣ୍ଠା ରହିଛି। ଜିଲାର ମୋଟ୍ ୬୮ ହଜାର ୬୨୮ ଚାଷୀ ବିଭିନ୍ନ କୃଷି ସମବାୟ ସମିତିରେ ନାମ ପଞ୍ଜୀକୃତ କରିଛନ୍ତି। ଜିଲା କୃଷି ଉପ ନିର୍ଦ୍ଦେଶକ କାର୍ଯ୍ୟାଳୟର ତଥ୍ୟ ମୁତାବକ ଅନୁଗୋଳ ଜିଲାରେ ସମୁଦାୟ ୨ ଲକ୍ଷ ୧୧ ହଜାର ୨୯୧ ହେକ୍ଟର ଚାଷ ଜମି ରହିଛି। ସେଥିମଧ୍ୟରୁ ୮୮ ହଜାର ୫୦ ହେକ୍ଟର ଜମିରେ ଧାନ ଚାଷ ପାଇଁ ଗତବର୍ଷ ଲକ୍ଷ୍ୟ ରଖାଯାଇଥିବା ବେଳେ ତାହା ପାଖାପାଖି ପୂରଣ ମଧ୍ୟ ହୋଇଥିଲା। ମାତ୍ର ଅନିୟମିତ ବର୍ଷା ଓ ଉପଯୁକ୍ତ ଜଳସେଚନ ଅଭାବ ଯୋଗୁ ଧାନ ଅମଳ ହ୍ରାସ ପାଇଥିଲା। ଚଳିତବର୍ଷ ମଧ୍ୟ ସମାନ ପରିମାଣର ଜମିରେ ଧାନ ଚାଷ ପାଇଁ ଲକ୍ଷ୍ୟ ରଖାଯାଇଛି। ଏଥିପାଇଁ ୧୩ ହଜାର କୁଇଣ୍ଟାଲ ବିହନ ଚାଷୀଙ୍କୁ ଦରକାର ଥିବା ବେଳେ ଜିଲାର ବିଭିନ୍ନ ସମବାୟ ସମିତିରେ ୯ ହଜାର ୮୯୦ କୁଇଣ୍ଟାଲ ଗଚ୍ଛିତ ରହିଛି। ବର୍ତ୍ତମାନ ସୁଦ୍ଧା ଉକ୍ତ ଗଚ୍ଛିତ ବିହନ ମଧ୍ୟରୁ ୪ ହଜାର ୮ଶହ କୁଇଣ୍ଟାଲ ବଣ୍ଟା ସରିଲାଣି। ଆଗକୁ ବଣ୍ଟନ କାର୍ଯ୍ୟ ଜାରି ରହିବ ବୋଲି କୃଷି ବିଭାଗ ପକ୍ଷରୁ କୁହାଯାଇଛି। କିନ୍ତୁ ନିଅଣ୍ଟ ପଡ଼ୁଥିବା ୩ ହଜାରରୁ ଅଧିକ କୁଇଣ୍ଟାଲ ବିହନ ଏଯାଏ ଆସି ନ ଥିବାରୁ ଚାଷୀ ମହଲରେ ଅସନ୍ତୋଷ ଦେଖାଦେଇଛି। ଅନ୍ୟପକ୍ଷରେ ପୂର୍ବରୁ ବିହନ ଯୋଗାଣରେ ଅନିୟମିତତା ସହ ସବ୍ସିଡି ଟଙ୍କା ଚାଷୀଙ୍କ ବ୍ୟାଙ୍କ ଖାତାକୁ ଯାଉ ନ ଥିବା ଅଭିଯୋଗ ହେଉଥିଲା। ଏହାକୁ ଦୃଷ୍ଟିରେ ରଖି ବିଭାଗ ପକ୍ଷରୁ ନୂଆ ବ୍ୟବସ୍ଥା କରାଯାଇଛି। ଏଣିକି ଚାଷୀ ସିଧା ସଳଖ ଜିଲାର ବିଭିନ୍ନ ସମବାୟ ସମିତିରେ ଟଙ୍କା ପୈଠ କରି ଧାନ ନେଇପାରିବେ। ଯେଉଁ ଚାଷୀ ନାମ ପଞ୍ଜୀକୃତ କରିଥିବେ ସେମାନେ ଏଭଳି ସୁବିଧା ପାଇପାରିବେ। ୧୦ ବର୍ଷ ପୂର୍ବର ବିଭିନ୍ନ କିଷମ ବିହନ କିଣିଲେ କୁଇଣ୍ଟାଲ ପିଛା ୨ ହଜାର ଟଙ୍କା ଦେବାକୁ ପଡ଼ିବ। ୧୦ ବର୍ଷ ମଧ୍ୟରେ ବିଭିନ୍ନ କିଷମର ବିହନ ପାଇଁ ୧୮ଶହ ଟଙ୍କା ଦେବାକୁ ହେବ। ଏଥିପାଇଁ ଜିଲାର ୬୮ ହଜାର ୬୨୮ ଜଣ ଚାଷୀ ନିଜ ନାମ ପଞ୍ଜୀକୃତ କରିଛନ୍ତି। ଅନୁଗୋଳ ବ୍ଲକରେ ୧୧,୮୩୪ ଚାଷୀ ପଞ୍ଜୀକରଣ କରାଇ ଥିବାବେଳେ ବଅଁରପାଳରେ ୭,୩୦୫, ଛେଣ୍ଡିପଦାରେ ୧୪,୪୯୭, କିଶୋରନଗରରେ ୭,୧୨୨, କଣିହଁାରେ ୧୦,୭୦୭, ଆଠମଲ୍ଲିକରେ ୭,୭୫୦, ପାଲଲହଡ଼ାରେ ୬,୯୧୨ ଓ ତାଳଚେରରେ ୨,୫୦୧ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ହେଲେ କେତେଜଣଙ୍କ ନାମ ପଞ୍ଜୀକୃତ ବେଳେ ତ୍ରୁଟି ରହିଛି। ଏହି ଚାଷୀମାନେ ଫଟୋ ପରିଚୟପତ୍ର ସହ ପଞ୍ଜୀକରଣ ରସିଦ ଦେଖାଉଥିଲେ ମଧ୍ୟ ସଂଶୋଧନ କରାଯାଉ ନ ଥିବାରୁ ସେମାନେ ହରଡ଼ଘଣାରେ ପଡ଼ିଛନ୍ତି। ସେପଟେ ଚାଷୀଙ୍କୁ ସରକାର ମୋବାଇଲ ଦେବାକୁ ପ୍ରତିଶ୍ରୁତି ଦେଇଥିଲେ ବି ଅଦ୍ୟାବଧି ସମସ୍ତଙ୍କୁ ତାହା ପ୍ରଦାନ କରିବାରେ ବିଫଳ ହୋଇଛନ୍ତି। ଫଳରେ କେତେଜଣ ଚାଷୀ ମୋବାଇଲ ନ ଥିବାରୁ ପଞ୍ଜୀକରଣ କରିବାରେ ସମସ୍ୟାରେ ପଡ଼ିଛନ୍ତି। ତେଣୁ ତ୍ରୁଟି ସଂଶୋଧନ କରା ନ ଗଲେ ସମ୍ପୃକ୍ତ ଚାଷୀମାନେ ସବ୍ସିଡିରେ ବିହନ ପାଇବାରୁ ବଞ୍ଚତ୍ତ ହେବା ନେଇ ଆଶଙ୍କା ରହିଛି।
ଏ ସମ୍ପର୍କରେ ଜିଲା ଉପକୃଷି ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି, ଜିଲା କୃଷି ବିଭାଗ ପକ୍ଷରୁ ସମସ୍ତ ପଦକ୍ଷେପ ଗ୍ରହଣ କରାଯାଇଛି। ଜିଲାରେ ୧୩ ହଜାର କୁଇଣ୍ଟାଲ ଧାନ ବିହନ ଆବଶ୍ୟକ ଥିବା କୁହାଯାଉଥିବାବେଳେ ଏତେ ପରିମାଣରେ ଧାନ ନାହିଁ। ଯଦି ମହଜୁଦ ଥିବା ବିହନ ଶେଷ ହୋଇଯାଏ, ତେବେ ଚାଷୀଙ୍କୁ ଅଧିକ ବିହନ ଯୋଗାଇ ଦେବାକୁ ବ୍ୟବସ୍ଥା କରାଯାଇଛି। ସେହିପରି ନାମ ପଞ୍ଜୀକୃତ କରିପାରୁ ନ ଥିବା ଚାଷୀଙ୍କ ସମସ୍ୟା କେଉଁଠି ରହିଛି ତାହାର ମଧ୍ୟ ଅନୁଧ୍ୟାନ କରାଯିବ ବୋଲି ସେ କହିଛନ୍ତି। ଚଳିତବର୍ଷ ଚାଷୀମାନଙ୍କ ଭଲ ଅମଳ ପାଇଁ ଯଥା ସମ୍ଭବ ସହଯୋଗ ଯୋଗାଇ ଦିଆଯିବ ବୋଲି ମହାପାତ୍ର ପ୍ରକାଶ କରିଛନ୍ତି।