ଖଣି ସମସ୍ୟା ନେଇ ଜିଲାପାଳଙ୍କ କାର୍ଯ୍ୟାଳୟରେ ବୈଠକ : ସୁରକ୍ଷା ସହ ସାଲିସ ହେବନି

ଅନୁଗୋଳ ଅଫିସ, ୧ା୮ – ଅନୁଗୋଳ ଜିଲା ତାଳଚେରସ୍ଥିତ ଭରତପୁର କୋଇଲା ଖଣି ଦୁର୍ଘଟଣା ପରେ ସୃଷ୍ଟ ବିଭିନ୍ନ ସମସ୍ୟାର ସମାଧାନ ପାଇଁ ବୁଧବାର ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ତାଙ୍କ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲାପାଳଙ୍କ ସହ ଏମ୍‌ସିଏଲ୍‌ର ଉଚ୍ଚପଦସ୍ଥ ଅଧିକାରୀ, ପୋଲିସ, ତାଳଚେର ବିଧାୟକ, ପାଲଲହଡା ବିଧାୟକ, ଦୁର୍ଘଟଣାରେ ମୁତକଙ୍କ ପରିବାର ଲୋକ ଓ ତାଳଚେରର ବିଭିନ୍ନ ସଙ୍ଗଠନର କର୍ମକର୍ତ୍ତା ଉପସ୍ଥିତ ଥିଲେ। ମୃତକଙ୍କ ପରିବାରରୁ ଜଣକୁ ସ୍ଥାୟୀ ନିଯୁକ୍ତି ସହ କ୍ଷତିପୂରଣ ପ୍ରଦାନ ପାଇଁ ଏମ୍‌ସିଏଲ୍‌ କର୍ତ୍ତୃପକ୍ଷଙ୍କୁ କୁହାଯାଇଥିବା ଜିଲାପାଳ ସୂଚନା ଦେଇଛନ୍ତି। ଏଥିସହ ଏମ୍‌ସିଏଲ୍‌ ସୁରକ୍ଷା ପ୍ରମାଣପତ୍ର ଦେବାପରେ ଖଣି କାର୍ଯ୍ୟ ଆରମ୍ଭ ହେବ ଓ ସୁରକ୍ଷାରେ କୌଣସି ସାଲିସ କରାଯିବ ନାହିଁ ବୋଲି ଜିଲାପାଳ କହିଛନ୍ତି। ଦୁର୍ଘଟଣାର ତଦନ୍ତ ଏମ୍‌ସିଏଲ୍‌ର ଟେକ୍ନିକାଲ କମିଟି ଜାରି ରଖିଛି। ଏହାବାଦ୍‌ ସେଣ୍ଟ୍ରାଲ ଇନଷ୍ଟିଚ୍ୟୁଟ୍‌ ଅଫ ମାଇନିଂ ଆଣ୍ଡ ଫୁଏଲ ରିସର୍ଚ୍ଚ (ସିଆଇଏମ୍‌ଏଫ୍‌ଆର୍‌) ଟେକ୍ନିକାଲ ଟିମ୍‌ ଘଟଣାର ତଦନ୍ତ କରିବ ବୋଲି ଏମ୍‌ସିଏଲ୍‌ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିବା ଜିଲାପାଳ ପ୍ରକାଶ କରିଛନ୍ତି।
ଭରତପୁର ଖଣି ଦୁର୍ଘଟଣା ପରେ ଭାଜପା ପକ୍ଷରୁ ୫ ଦଫା ଦାବି ପୂରଣ ପାଇଁ ଖଣି ବନ୍ଦ ଆନ୍ଦୋଳନ କରାଯାଇଥିଲା। ଫଳରେ ରାଷ୍ଟ୍ରାୟତ୍ତ ଉଦ୍ୟୋଗ ଗୁଡିକ ଉପରେ ଏହାର ସିଧାସଳଖ ପ୍ରଭାବ ପଡିଥିଲା। ଏହାର ସମାଧାନ ପାଇଁ ଜିଲାପାଳ ଜରୁରୀ ବୈଠକ ଡାକି ଆନ୍ଦୋଳନକାରୀ ଓ ଖଣି କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ପ୍ରଥମେ ଏମ୍‌ସିଏଲ କର୍ତ୍ତୃପକ୍ଷ ଓ ଜିଲା ପ୍ରଶାସନ ମଧ୍ୟରେ ବୈଠକ ବସିଥିଲା। ଏଥିରେ ଜିଲାପାଳ ମନୋଜ କୁମାର ମହାନ୍ତିଙ୍କ ସହ ଏମ୍‌ସିଏଲ ସିଏମ୍‌ଡି ବି.ଏନ୍‌. ଶୁକ୍ଳା, ଡାଇରେକ୍ଟର ଟେକ୍ନିକାଲ ଓ.ପି. ସିଂହ, ୬ଟି କ୍ଷେତ୍ରର ଜେନେରାଲ ମ୍ୟାନେଜର ଓ ବରିଷ୍ଠ ଉପଦେଷ୍ଟା ମଣ୍ଡଳୀର ସଦସ୍ୟମାନେ ଉପସ୍ଥିତ ଥିଲେ। ଏହାପରେ ଭାଜପା ନେତା କାଳନ୍ଦୀ ସାମଲ ଓ ତାଙ୍କ ସମର୍ଥକଙ୍କ ସହ ଅନ୍ୟ ଏକ ପର୍ଯ୍ୟାୟରେ ୪ ଦଫା ଦାବି ଉପରେ ଆଲୋଚନା ହୋଇଥିଲା। ଉକ୍ତ ବୈଠକ ପରେ ତାଳଚେର ସୁରକ୍ଷା ମଞ୍ଚ ସଭାପତି ମୁରଲୀଧର ସାହୁ ଓ ତାଙ୍କ ଟିମ୍‌ ସହ ୩ ଦଫା ଦାବି ସମ୍ପର୍କରେ ଏମ୍‌ସିଏଲ କର୍ତ୍ତୃପକ୍ଷ ଓ ଜିଲା ପ୍ରଶାସନ ଆଲୋଚନା କରିଥିଲେ। ସେହିପରି ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ପାଲଲହଡ଼ା ବିଧାୟକ ମୁକେଶ ପାଲ, ମୃତକଙ୍କ ପରିବାର ଲୋକ, ସ୍ଥାନୀୟ ଲୋକଙ୍କ ସହିତ ଜିଲାପାଳ, ଏସ୍‌ପି ଓ ଏମ୍‌ସିଏଲ୍‌ କର୍ତ୍ତୃପକ୍ଷ ପର୍ଯ୍ୟାୟକ୍ରମେ ଆଲୋଚନା କରିଥିଲେ। ବୈଠକ ପରେ ଜିଲାପାଳ କହିଥିଲେ ଯେ, ଏକ ଜାତୀୟ ସ୍ତରୀୟ ତଦନ୍ତକାରୀ ସିଆଇଏମ୍‌ଏଫ୍‌ଆର୍‌ ଟେକ୍ନିକାଲ ଟିମ୍‌ ଘଟଣାର ତଦନ୍ତ କରିବ। କୋଇଲା ଖଣିରେ ସୁରକ୍ଷିତ ଥିବା ସ୍ଥାନରେ କୋଇଲା ଊତ୍ତୋଳନ ଏବଂ ଦୁର୍ଘଟଣାଜନିତ କ୍ଷତିପୂରଣ ସମ୍ପର୍କରେ ଏକ ସ୍ବତନ୍ତ୍ର ନୀତି ଆପଣେଇବାକୁ ନିଷ୍ପତ୍ତି ହୋଇଛି। ୮ ଦିନ ଭିତରେ ମୃତକଙ୍କ ପରିବାରର ଜଣକୁ ସ୍ଥାୟୀ ଚାକିରି ଓ ଆର୍ଥତ୍କ ସହାୟତା ଦିଆଯିବ। କୋଇଲା ଖୋଳାଯିବା ପରେ ଖାଲି ସ୍ଥାନରେ ବାଲି ଭର୍ତ୍ତି କରାଯିବ। ବୈଠକ ସଫଳ ହୋଇଥିବାରୁ ଭାଜପା ଆନ୍ଦୋଳନ ପ୍ରତ୍ୟାହାର କରିଥିବା ଜିଲାପାଳ କହିଥିଲେ। ତେବେ ବୈଠକ ପରେ ବି ମୃତକଙ୍କ ପରିବାର ଓ ଗ୍ରାମବାସୀ ତାଳଚେରରେ ଖଣି ବନ୍ଦ ଆନ୍ଦୋଳନ ଆରମ୍ଭ କରିଥିବା ସୂଚନା ମିଳିଛି।