ନୂଆଦିଲ୍ଲୀ,୪ ।୧୨: ଦିଲ୍ଲୀ ନଗର ନିଗମ(ଏମସିଡି)ର ସମସ୍ତ ୨୫୦ ୱାର୍ଡ ପାଇଁ ରବିବାର ସକାଳ ୮ଟାରୁ ଭୋଟ ଗ୍ରହଣ ଆରମ୍ଭ ହୋଇଛି । ଦିନ ୨ଟା ପର୍ଯ୍ୟନ୍ତ ପାଖାପାଖି ୩୦ ପ୍ରତିଶତ ମତଦାନ ହୋଇଥିବା ଜଣାପଡିଛି । ଏହି ନିର୍ବାଚନରେ ଅମ ଆଦମୀ ପାର୍ଟି(ଏଏପି), ଭାରତୀୟ ଜନତା ପାର୍ଟି(ଭାଜପା) ତଥା କଂଗ୍ରେସ ମଧ୍ୟରେ ତ୍ରିକୋଣୀୟ ମୁକାବିଲା ହେଉଛି ।
ନୂଆ ଭୋଟର ଲିଷ୍ଟ କାରଣରୁ ଅନେକେ ଭୋଟରଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଛି । କିଛି ସ୍ଥାନରେ ଭୋଟର ଲିଷ୍ଟରେ କେତେଜଣ ଲୋକଙ୍କ ନାଁ ନ ଥିବା ବେଳେ ଏମାନେ ଭୋଟ ନ ଦେଇ ଫେରି ଆସିଥିବା ଦେଖାଯାଇଛି ।
ଦିଲ୍ଲୀ କଂଗ୍ରେସ ଅଧ୍ୟକ୍ଷ ଅନୀଲ ଚୌଧୁରୀଙ୍କ ନାମ ବି ଭୋଟର ଲିଷ୍ଟରେ ନଥିଲା । ଫଳରେ ସେ ଭୋଟ ଦେଇ ପାରି ନାହାନ୍ତି । ଏହାକୁ ନେଇ ଏବେ ରାଜନୀତି ଆରମ୍ଭ ହୋଇଯାଇଛି । ଦିଲ୍ଲୀ ଭାଜପାର ପୂର୍ବତନ ଅଧ୍ୟକ୍ଷ ତଥା ଏମପି ମନୋଜ ତିୱାରୀ ଆମ ଆଦମୀ ପାର୍ଟିକୁ ଟାର୍ଗେଟକୁ ନେଇ ଏହା ଏଏପିର ଷଡଯନ୍ତ୍ର ବୋଲି କହିଛନ୍ତି । ଭାଜପା ଏମପି ଦାବି କରିଛନ୍ତି ଯେ କେଜରିୱାଲ ସରକାର ଭାଜପା ସମର୍ଥକଙ୍କ ଭୋଟ କାଟି ଦେଇଛନ୍ତି । ଦଳ ୪୫୦ ଲୋକଙ୍କ ଭୋଟ କାଟି ଦେଇଛି । ତେଣୁ ଯେ ଏହି କାମ କରିଛି ତା’ର ସ୍ଥାନ ଜେଲରେ ବୋଲି ତିୱାରୀ ପ୍ରତ୍ୟେକ୍ଷ ଭାବେ ଏଏପିକୁ ଟାର୍ଗେଟ କରି କହିଛନ୍ତି ।
ଭାଜପା ଏମ୍ପି ଏହାକୁ ନେଇ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିଥିବା ସୂଚନା ମିଳିଛି । ଏହାସହ ଏଭଳି ଲୋକଙ୍କ ଉପରେ ଆକ୍ସନ ନିଆଯିବା ଦରକାର ବୋଲି ସେ କହିଛନ୍ତି ।
