ଭୁବନେଶ୍ୱର,୨୩ା୧୧(ବ୍ୟୁରୋ): ଜଳବାୟୁ ପରିବର୍ତ୍ତନର ପ୍ରଭାବ ସମ୍ପର୍କରେ ସଚେତନତା ସୃଷ୍ଟି କରିବା ଲାଗି ୧୧ ଦେଶର ୧୧ ଅନ୍ତର୍ଜାତୀୟ ଖ୍ୟାତିସମ୍ପନ୍ନ ଚଳଚ୍ଚିତ୍ର ନିର୍ମାତାଙ୍କ ଦ୍ୱାରା ପ୍ରସ୍ତୁତ ହୋଇଥିବା ଚଳଚ୍ଚିତ୍ର ‘ଇଣ୍ଟରଡିପେଣ୍ଡେନ୍ସ’ ଗୋଆଠାରେ ଅନୁଷ୍ଠିତ ୱାଲର୍ଡ ପାନୋରମା ଏସିଆ ପ୍ରିମିୟରରେ ପ୍ରଦର୍ଶିତ ହୋଇଯାଇଛି। ଏହି ଅବସରରେ ଓଡ଼ିଶା ଜନ୍ମିତ ଚଳଚ୍ଚିତ୍ର ନିର୍ମାତା ନୀଳମାଧବ ପଣ୍ଡା ନିଜର ଶର୍ଟ ଫିଲ୍ମ ‘ମେଘାସ୍ ଡିଭୋର୍ସ’ ପାଇଁ ରେଡ୍ କାର୍ପେଟ୍ରେ ଚାଲିଥିଲେ। ତାଙ୍କ ସହ ଫିଲ୍ମର ଅଭିନେତ୍ରୀ ଦିବ୍ୟା ଦତା ଓ ମଞ୍ଜରୀ ଫଡ୍ନିସ୍ ମଧ୍ୟ ରେଡ୍ କାର୍ପେଟ୍ରେ ଚାଲିଥିଲେ। ଆଇଏଫ୍ଏଫ୍ଆଇର ୫୦ ବର୍ଷ ପୂର୍ତ୍ତି ଅବସରରେ କାର୍ଯ୍ୟକ୍ରମରେ ସାମିଲ ହେବା ଏକ ସମ୍ମାନର କଥା ବୋଲି ନୀଳମାଧବ ପଣ୍ଡା କହିଥିଲେ। ‘ଇଣ୍ଟରଡିପେଣ୍ଡେନ୍ସ୍ସ’ ଏସିଆ ପ୍ରିମିୟରକୁ ଆସିବା ଗର୍ବର ବିଷୟ ଏବଂ ଏହା ଜଳବାୟୁ ପରିବର୍ତ୍ତନ ଭଳି ଗମ୍ଭୀର ପ୍ରସଙ୍ଗ ଉପରେ ଲୋକଙ୍କୁ ସଚେତନ କରିପାରିବ ବୋଲି ସେ କହିଥିଲେ।
