ନୂଆଦିଲ୍ଲୀ,୧୮।୪: ହିରୋ ମୋଟୋକର୍ପ ପକ୍ଷରୁ କରୋନା ଲଢେଇରେ ଯୋଗଦାନ ସ୍ବରୂପ ୬୦ ଫାଷ୍ଟ ରେସପଣ୍ଡର ମୋବାଇଲ ଆମ୍ବୁଲାନ୍ସ ପ୍ରଦାନ କରାଯାଇଛି। ଗ୍ରାମାଞ୍ଚଳ ଏବଂ ଅପହଞ୍ଚ ଇଲାକାଗୁଡିକରେ ରୋଗୀଙ୍କ ବର୍ତ୍ତମାନ ସମୟରେ ସେବା ଯୋଗାଣ ଲାଗି କମ୍ପାନୀ ଏଭଳି ପଦକ୍ଷେପ ଗ୍ରହଣ କରିଥିବା କହିଛି। ହିରୋର ୧୫୦ ସିସି ଏବଂ ଅଧିକ ଇଞ୍ଜିନ କ୍ଷମତା ବିଶିଷ୍ଟ ମୋଟର ସାଇକେଲଗୁଡିକୁ ଏଭଳି ଆମ୍ବୁଲାନ୍ସରେ ରୂପାନ୍ତରିତ କରାଯାଇଛି। ଏଥିରେ ଆବଶ୍ୟକୀୟ ମେଡିକାଲ ଯନ୍ତ୍ରାଂଶ, ଫାଷ୍ଟ ଏଡ କିଟ୍, ଅକ୍ସିଜେନ ସିଲିଣ୍ଡର, ଫାୟାର ଏକ୍ସଟିନଗୁଇସର ଏବଂ ସିରେନ ସୁବିଧା କରାଯାଇଛି। କୋଭିଡ୍ ଲାଗି ହିରୋ ପକ୍ଷରୁ ୧୦୦ କୋଟି ଟଙ୍କା ବ୍ୟବସ୍ଥା କରାଯାଇଛି। ପିଏମ୍ କେୟାର୍ସ ପାଣ୍ଠିକୁ ୫୦ କୋଟି ଏବଂ ରିଲିଫ ସହାୟତାରେ କମ୍ପାନୀ ୫୦ କୋଟି ଟଙ୍କା ଖର୍ଚ୍ଚ କରିବ ବୋଲି କହିଛି। ହରିୟାଣାରେ ୨୦୦ ଶର୍ଯ୍ୟା ବିଶିଷ୍ଟ ହସ୍ପିଟାଲ ଏବଂ ଫସି ରହିଥିବା ଶ୍ରମିକଙ୍କ ଲାଗି କମ୍ପାନୀ ପକ୍ଷରୁ ଖାଇବା ବ୍ୟବସ୍ଥା କରାଯାଇଛି।
