ନୂଆଦିଲ୍ଲୀ,୨।୧୧: ରାଷ୍ଟ୍ରୀୟ ସ୍ତରରେ ୨୦୨୧ରେ ଜନ ଗଣନା ସରିବା ପରେ ସାରା ଦେଶରେ ଆସାମ ଭଳି ରାଷ୍ଟ୍ରୀୟ ଜନସଂଖ୍ୟା ରେଜିଷ୍ଟର(ଏନ୍ଆର୍ସି) ଲାଗୁ କରାଯିବ ବୋଲି ଜଣାପଡିଛି। ରାଷ୍ଟ୍ରୀୟ ସ୍ବୟଂ ସେବକ ସଂଘର ଆନୁଷଙ୍ଗିକ ସଂଗଠନ, ସରକାରୀ ପ୍ରତିନିଧି ଓ ଭାଜପା ନେତାଙ୍କ ମାରାଥନ ବୈଠକ ପରେ ଏଭଳି ନିଷ୍ପତ୍ତି ନିଆଯାଇଥିବା ବିଶେଷ ସୂତ୍ରରୁ ସୂଚନା ମିଳିଛି। ସୂଚନାଯୋଗ୍ୟ, ରାଜଧାନୀରେ ଅନୁଷ୍ଠିତ ଏହି ବୈଠକ ଗୁରୁବାର ଶେଷ ହୋଇଥିବା ବେଳେ ଏଥିରେ ଭବିଷ୍ୟତର ନୂଆ ଜନସଂଖ୍ୟା ନୀତି, ଅନୁଚ୍ଛେଦ ୩୭୦ ଉଚ୍ଛେଦ ପରେ ସେଠାକାର ସ୍ଥିତି, ଅଯୋଧ୍ୟା ବିବାଦ ଆଦିକୁ ନେଇ ଚର୍ଚ୍ଚା ହୋଇଥିଲା। ଏହି ବୈଠକରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ, ଭାଜପା କାର୍ଯ୍ୟକାରୀ ଅଧ୍ୟକ୍ଷ ଜେପି ନଡ୍ଡା ଓ ସଙ୍ଗଠନର ମହାସଚିବ ବିଏଲ୍ ସନ୍ତୋଷ ଭାଗ ନେଇଥିବା କୁହାଯାଉଛି।
