ଚଣ୍ଡିଗଡ଼,୧୬।୧୦: କର୍ତ୍ତାରପୁର କରିଡର ଯାତ୍ରା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ଏକ ସ୍ବତନ୍ତ୍ର ଫର୍ମ ଜାରି କରିଯାଇଛି। ଏହାକୁ ତୀର୍ଥଯାତ୍ରୀ ଅନ୍ଲାଇନରେ ଆବେଦନ କରିପାରିବେ। ପାକିସ୍ତାନରେ ଥିବା ଶିଖଙ୍କ ପବିତ୍ର ସ୍ଥଳ କର୍ତ୍ତାରପୁର ଯାତ୍ରା ପାଇଁ ଖୁବ୍ଶୀଘ୍ର କେନ୍ଦ୍ର ସରକାର ଔପଚାରିକ ଭାବେ ଏକ ଫର୍ମ ଜାରି କରିବେ ବୋଲି ଜଣାପଡ଼ିଛି। ଯାତ୍ରାର ଏକ ମାସ ପୂର୍ବରୁ ଅନ୍ଲାଇନ୍ରେ ଏହାର ପଞ୍ଜିକରଣ କରିବା ବାଧ୍ୟତାମୂଳକ ରହିବ। ଆବେଦନ କରିବା ସମୟରେ ପାସପୋର୍ଟ, ଆଧାର, ପାନ କାର୍ଡର ସୂଚନା ଦେବାକୁ ପଡ଼ିବ। ଏଥିସହ ପୂର୍ବରୁ ସେମାନଙ୍କ ନଁାରେ କୌଣସି ଅପରାଧୀକ ମାମଲା ରହିଛି କି ନାହିଁ ସେନେଇ ମଧ୍ୟ ତଥ୍ୟ ଦେବାକୁ ପଡ଼ିବ। ପୋଲିସର ଯାଞ୍ଚପରେ ତୀର୍ଥଯାତ୍ରୀଙ୍କୁ ଯାତ୍ରା କରିବା ପାଇଁ ଅନୁମତି ଦିଆଯିବ। ଆସନ୍ତା ଅକ୍ଟୋବର ୨୦ରୁ ଏହି ଆବେଦନ ପଞ୍ଜିକରଣ ଆରମ୍ଭ ହେବ ବୋଲି ଜଣାପଡ଼ିଛି। ତେବେ ପାକିସ୍ତାନ ପକ୍ଷରୁ ନିର୍ଦ୍ଧାରିତ କରାଯାଇଥିବା ୨୦ଡଲାର ଏବେ ବି ବଳବତ୍ତର ରହିଛି।
