ନୂଆଦିଲ୍ଲୀ,୮।୫: କରୋନା ଭାଇରସ୍ ସଙ୍କଟ ମଧ୍ୟରେ ପିଥୋରଗଡ଼ରୁ ଚାଇନା ସୀମା ପର୍ଯ୍ୟନ୍ତ ରାସ୍ତା ନିର୍ମାଣ କରିବାରେ ସଫଳ ହୋଇଛି ଭାରତ। ଏହି ନୂତନ ସଡ଼କକୁ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ ଶୁକ୍ରବାର ନୂଆଦିଲ୍ଲୀରେ ଭିଡ଼ିଓ କନ୍ଫରେନ୍ସିଂରେ ଉଦ୍ଘାଟନ କରିଛନ୍ତି। ଚାଇନା ସମା ପର୍ଯ୍ୟନ୍ତ ଏହି ସଡ଼କ ସଂଯୋଗକୁ ଏକ ପ୍ରମୁଖ ସଫଳତା କହିବା ସହ ଏହାଦ୍ୱାରା ଦେଶ ମଜ୍ଭୁତ ହୋଇଛି ବୋଲି ରାଜନାଥ କହିଛନ୍ତି। ସୂଚନା ମୁତାବକ କୈଳାଶ-ମାନସରୋବର ଯାତ୍ରା ମାର୍ଗ ଭାବେ ପ୍ରସିଦ୍ଧ ଧର୍ଚୁଲାରୁ ଲିପୁଲେଖ(ଚାଇନା ସୀମା) ପର୍ଯ୍ୟନ୍ତ ବିଆରଓ ଦ୍ୱାରା ନିର୍ମିତ ହୋଇଥିବା ଏହି ରାସ୍ତାକୁ ଏବେ ଦେଶ ପାଇଁ ଉତ୍ସର୍ଗୀକୃତ କରାଯାଇଛି। ଏହି ସଡ଼କ ନିର୍ମାଣ ହେବା ଫଳରେ କୈଳାଶ ଯାତ୍ରା ସହଜ ହେବା ସହ ସେନା ଓ ସାମରିକ ବାହିନୀର ଗତିବିଧି ମଧ୍ୟ ସୁବିଧା ହେବ। ଏତଦ୍ ବ୍ୟତୀତ ସ୍ଥାନୀୟ ଲୋକମାନେ ମଧ୍ୟ ରାସ୍ତାର ସୁବିଧା ପାଇପାରିବେ ବୋଲି ରାଜନାଥ କହିଛନ୍ତି। ଏହି ଅବସରରେ ସେନାଧ୍ୟକ୍ଷ ଜେନେରାଲ ବିପିନ ରାୱତ ଓ ସ୍ଥଳ ସେନାଧ୍ୟକ୍ଷ ଜେନେରାଲ ମନୋଜ ମୁକୁନ୍ଦ ନରୱାଣେ ମଧ୍ୟ ଉପସ୍ଥିତ ଥିଲେ। ସୂଚନାଯୋଗ୍ୟ, ବିଆର୍ଓ ଦ୍ୱାରା ନିର୍ମାଣ ହୋଇଥିବା ଏହି ସଡ଼କ ୮୦ କିଲୋମିଟର ଧର୍ଚୁଲାରୁ ଲିପୁଲେଖକୁ ଯୋଡ଼ି ହୋଇଛି। ଏହାର ସମ୍ପ୍ରସାରଣ ୬୦୦୦ରୁ ୧୭୦୬୦ ଫୁଟ ଉଚ୍ଚ ରହିଥିବା ଜଣାପଡ଼ିଛି।
