ସୋହେଲା,୧୦ା୫(ଡି.ଏନ.ଏ.): ପେଟପାଟଣା ପାଇଁ ନିଜ ଭଟାମାଟି ଛାଡି ଗୁଜରାଟର ସୁରଟ ଯାଇଥିଲେ। ହେଲେ ଲକ୍ଡାଉନ ପରେ କର୍ମସଂସ୍ଥାନ ହରାଇ ହାହୁତାଶ ମଧ୍ୟରେ ଦିନ କାଟୁଥିବା ୮ପ୍ରବାସୀ ଓଡିଆ ଶ୍ରମିକ ଶେଷରେ ସାଇକେଲରେ ଓଡିଶା ଫେରି ଆସିବାକୁ ନିଷ୍ପତ୍ତି ନେଇଥିଲେ। ଗତ ୨ତାରିଖ ସକାଳୁ ସାଇକେଲରେ ଓଡିଶା ଅଭିମୁଖେ ବାହାରିଥିଲେ ପୁରୀ ଜିଲା କଣାସ ବ୍ଲକ କାଳିଘଡି ଗ୍ରାମର ସର୍ବେଶ୍ୱର ରାଉତରାୟ, ପିଣ୍ଟୁ ଉଦନରାୟ, ସୀଦେନ ବଳୀୟାର ସିଂ, ଅଶୋକ ପାସିଂ, ଖୋର୍ଦ୍ଧା ଡାଙ୍ଗପଡାର ପ୍ରମୋଦ ସାମନ୍ତରାୟ, ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ଭୁଅନମୁହି ଗ୍ରାମର ଗୋରା ବେହେରା, ଯୁଧେଷ୍ଟି ବେହେରା ଓ ହିଂଜିଳୁକାଟୁ ବ୍ଲକ ଗିରୀଆ ନାରାୟଣପୁର ଗ୍ରାମର ଟୁନୁ ଭୋଳ ପ୍ରମୁଖ ଶ୍ରମିକ। ରବିବାର ସକାଳେ ସେମାନେ ଓଡିଶା ରାଜ୍ୟ ସୀମା ବରଗଡ ଜିଲା ସୋହେଲା ବ୍ଲକ ଲୁହୁରାଚଟି ଚେକ୍ଗେଟରେ ପହଞ୍ଚିବା ପରେ ଦୀର୍ଘ ୯ଦିନର ପ୍ରାୟ ୧୭ଶହ କିମି ସାଇକେଲ ଯାତ୍ରା ସମ୍ପର୍କରେ ବଖାଣିଥିଲେ। ଘରକୁ ଫେରିବାର ଅନ୍ୟ କୌଣସି ଉପାୟ ନପାଇ ଆମେ ସମସ୍ତେ ସାଇକେଲରେ ଫେରିବାକୁ ନିଷ୍ପତ୍ତି ନେଇ ବାହାରିଥିଲୁ । ଯେଉଠି ଟିକିଏ ସୁବିଧା ମିଳୁଥିଲା ବିଶ୍ରାମ ନେଇ ପୁଣି ଯାତ୍ରା ଆରମ୍ଭ କରୁଥିଲି। ନିଜ ରାଜ୍ୟରେ ପାଦ ଦେବା ପରେ ଖୁସି ଲାଗୁଛି ବୋଲି ଶ୍ରମିକମାନେ କହିଛନ୍ତି। ଆଉ କେଇଘଣ୍ଟା ପରେ ଭିଟାମାଟିରେ ପହଞ୍ଚିଯିବୁ ବୋଲି ସେମାନେ କହିଛନ୍ତି।
