ନୂଆଦିଲ୍ଲୀ,୭-୧୦:ଅର୍ଥ ମନ୍ତ୍ରଣାଳୟ ପକ୍ଷରୁ ୨୦୨୦-୨୧ ବର୍ଷ ଲାଗି ବଜେଟ ପ୍ରକ୍ରିୟା ଚଳିତ ମାସ ୧୪ରୁ ଆରମ୍ଭ ହେବ। ସରକାରଙ୍କ ରାଜସ୍ବରେ ହ୍ରାସ, ୬ ବର୍ଷର ସର୍ବନିମ୍ନ ସ୍ତରକୁ ଖସିଥିବା ଅଭିବୃଦ୍ଧି ଏବଂ ମାନ୍ଦାବସ୍ଥା ଭଳି ଜଟିଳ ପ୍ରସଙ୍ଗ ଚଳିତ ବର୍ଷ କେନ୍ଦ୍ର ସରକାରଙ୍କ ଲାଗି ମୁଣ୍ଡବିନ୍ଧାର କାରଣ ପାଲଟିଛି। ଏଦିଗରେ ବଜେଟରେ ବିଭିନ୍ନ ଦିଗକୁ ବିଚାର କରାଯିବାର ଯୋଜନା ରଖାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହା ଦ୍ୱିତୀୟ ପାଳି ହୋଇଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ ଦ୍ୱିତୀୟଥର ଲାଗି ବଜେଟ ଉପସ୍ଥାପନ କରିବେ। ପ୍ରାକ୍ ବଜେଟ ପରିବର୍ତ୍ତିତ ଅଟକଳ ବୈଠକ ଅକ୍ଟୋବର ୧୪ରେ ଅନୁଷ୍ଠିତ ହେବ। ଏଥିଲାଗି ଅର୍ଥନୈତିକ ବ୍ୟାପାର ବିଭାଗ ପକ୍ଷରୁ ବଜେଟ୍ ସର୍କୁଲାର ଜାରି କରାଯାଇଛି। ବୈଠକରେ ଆବଶ୍ୟକ ହେଉଥିବା ଆବଶ୍ୟକୀୟ ବିବରଣୀ ନେଇ ନିଶ୍ଚିତ କରାଇବାକୁ ସମସ୍ତ ଆର୍ଥତ୍କ ପରାମର୍ଶଦାତାଙ୍କୁ କୁହାଯାଇଛି। ବ୍ୟୟ ସଚିବ ଅନ୍ୟ ସଚିବ ଏବଂ ଆର୍ଥତ୍କ ପରାମର୍ଶଦାତାଙ୍କ ସହ ଆଲୋଚନା କରିବା ପରେ ୨୦୨୦-୨୧ ଲାଗି ବଜେଟ ଧାର୍ଯ୍ୟ ଲକ୍ଷ୍ୟ ସମ୍ପର୍କରେ ଚୂଡାନ୍ତ କରାଯିବ। ପ୍ରାକ୍ ବଜେଟ ବୈଠକ ଅକ୍ଟୋବର ୧୪ରୁ ଆରମ୍ଭ ହୋଇ ନଭେମ୍ବର ପ୍ରଥମ ସପ୍ତାହ ଯାଏ ଚାଲିବ। ଅନୁସୂଚିତ ଜାତି ଏବଂ ଜନଜାତି ଉପଯୋଜନା, ଲିଙ୍ଗ, ଏବଂ ଶିଶୁ ବଜେଟ୍ ସମ୍ପର୍କରେ ସର୍କୁଲାରରେ ଉଲ୍ଲେଖ କରାଯାଇଛି।
ଫେବୃୟାରୀ ଶେଷରେ ହେଉଥିବା ବଜେଟ ଉପସ୍ଥାପନ ପ୍ରକ୍ରିୟାକୁ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାର ବାଦ ଦେଇଛନ୍ତି। ଏହା ପରେ ୨୦୧୭ରେ ପ୍ରଥମଥର ଲାଗି ଅର୍ଥମନ୍ତ୍ରୀ ଅରୁଣ ଜେଟଲୀ ଫେବୃୟାରୀ ପହିଲାରେ ବଜେଟ୍ ଉପସ୍ଥାପନ କରିଥିଲେ। ଏଭଳି ପଦକ୍ଷେପ ଦ୍ୱାରା ଏପ୍ରିଲ ପହିଲାରୁ ଆର୍ଥତ୍କ ବର୍ଷ ଆରମ୍ଭ ସମୟରୁ ହିଁ ମନ୍ତ୍ରଣାଳୟଗୁଡିକୁ ଅର୍ଥ ପ୍ରଦାନ କରାଯାଉଛି। ଫଳରେ ପୁଞ୍ଜି ଖର୍ଚ୍ଚ କରିବା ଏହା ଦ୍ୱାରା ସହଜ ହୋଇଛି। ଏହାବାଦ କମ୍ପାନୀଗୁଡିକ ଟିକସ ପ୍ଲାନ ଏବଂ ବାଣିଜ୍ୟ ଗ୍ରହଣ ଲାଗି ସହାୟତା କରିଛି। ପୂର୍ବରୁ ଫେବୃୟାରୀ ଶେଷରେ ବଜେଟ ହେଉଥିବା ବେଳେ ୩ଟି ପର୍ଯ୍ୟାୟରେ ସଂସଦର ଅନୁମୋଦନ ଲାଗି ମେ ମାସ ମଧ୍ୟଭାଗ ହେଉଥିଲା।
