ବଇଣ୍ଡା,୧୯।୧୦(ଡି.ଏନ.ଏ.)
ଅନୁଗୋଳ ଜିଲା ଆଠମଲ୍ଲିକ ବ୍ଲକ ପେଡ଼ିପଥର ପଞ୍ଚାୟତରେ ଥିବା ଟିଲିମୁଣ୍ଡା ଜଳସେଚନ ପ୍ରକଳ୍ପର ହେଡଓ୍ବାଲ ନିକଟରେ ଘାଇ ସୃଷ୍ଟି ହୋଇଛି। ଫଳରେ ପାଣି ନାଳ ଗୁଡ଼ିକରେ ବାହାରକୁ ଚାଲି ଯାଉଥିବାବେଳେ ମାସେ ହେବ ଚାଷ ଜମିକୁ ପାଣି ମା଼ଡି ପାରୁ ନାହିଁ। ଶୁକ୍ରବାର ଝିଲିମୁଣ୍ଡା ଗ୍ରାମବାସୀ ଭେଟି କରି ଉକ୍ତ ଘାଇ ସ୍ଥାନରେ ବାଲି ବସ୍ତା ପକାଇ ବନ୍ଦ କରିଛନ୍ତି।
ଗ୍ରାମବାସୀ କହିଛନ୍ତି, ଏହି ପ୍ରୋଜେକ୍ଟରୁ ଝାର ବଇଣ୍ଡା, ଝିଲିମୁଣ୍ଡା, ଅଚ୍ୟୁତାପୁର ଗ୍ରାମର ୫ ଶହ ହେକ୍ଟର ଚାଷ ଜମିକୁ ପାଣି ମାଡ଼ୁଛି। ହେଲେ ଏକ ମାସ ତଳେ ଉକ୍ତ ପ୍ରୋଜେକ୍ଟ ହେଡଓ୍ବାଲରୁ କେତେ ଜଣ ଦୁର୍ବୃତ୍ତ ଚାଷ ଜମିକୁ ପାଣି ନ ମାଡ଼ିବା ପାଇଁ ଏକ ଘାଇ ସୃଷ୍ଟି କରି ଦେଇଥିଲେ। ଉକ୍ତ ଘାଇ ଯୋଗୁ ଏକ ମାସ ହେବ ପାଣି ଚାଷ ଜମିକୁ ଆସୁନାହିଁ। ଫଳରେ ଧାନ ଗଛ ଗୁଡ଼ିକ ମରିଯିବାକୁ ବସିଛି। ଉକ୍ତ ଘାଇକୁ ମରାମତି କରିବା ପାଇଁ ଗ୍ରାମବାସୀ ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏହାର ପ୍ରତିକାର ନିମନ୍ତେ ଗ୍ରାମବାସୀ ପାଳି କରି ୨ ଶହରୁ ଊର୍ଦ୍ଧ୍ୱ ବାଲିବସ୍ତା ଦେଇ ଘାଇକୁ ବନ୍ଦ କରିଥିଲେ। ଏଥିରେ ଝିଲିମୁଣ୍ଡା ଗ୍ରାମ ସଭାପତି ପ୍ରମୋଦ କୁମାର ସାହୁ, ତ୍ରିଲୋଚନ ସାହୁ, ଭରତଚନ୍ଦ୍ର ସାହୁ, ବିମଳ ସାହୁ, ହେମନ୍ତ ସାହୁ, ରମାକାନ୍ତ ସାହୁଙ୍କ ସମେତ ଗ୍ରାମବାସୀ ସହଯୋଗ କରିଥିଲେ।
