କେନ୍ଦ୍ରାପଡ଼ା ଅଫିସ,୧୦ା୬: କେନ୍ଦ୍ରାପଡ଼ା ଜିଲା ସ୍ବାଧୀନତା ସଂଗ୍ରାମୀ ସମିତିର ସଭାପତି ତଥା ବରିଷ୍ଠ ସାମାଜିକକର୍ମୀ ନକୁଳ ଚରଣ ଦାସ(୯୪)ଙ୍କର ବାର୍ଦ୍ଧକ୍ୟ ଜନିତ କାରଣରୁ ବୁଧବାର ପରଲୋକ ଘଟିଛି। ଜିଲା ପ୍ରଶାସନ ପକ୍ଷରୁ କେନ୍ଦ୍ରାପଡ଼ା ସହର ନିକଟ ସୁଜାନଗର ବାସଭବନରେ ତାଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି। ଏଥିସହିତ ବହୁ ରାଜନେତା, ଶିକ୍ଷାବିତ୍, ସାମାଜିକ କର୍ମୀ ତାଙ୍କ ଶବାଧାରରେ ରହି ଶୋକ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ସ୍ବର୍ଗତ ଦାସ ୧୯୨୬ ମସିହା ସେପ୍ଟେମ୍ବରରେ ଜନ୍ମ ଗ୍ରହଣ କରିଥିଲେ। ତାଙ୍କ ମା’ଙ୍କ ନାମ ପାର୍ବତୀ ଓ ବାପାଙ୍କ ନାମ ହରିହର। ପାଠପଢ଼ା ସମୟରେ ସ୍ବାଧୀନତା ସଂଗ୍ରାମରେ ଯୋଗ ଦେଇଥିବାବେଳେ ୧୯୪୨ରେ ଅଙ୍ଗୁଳେଇ ପୋଷ୍ଟ ଅଫିସ ପୋଡ଼ି ମାମଲାରେ ବ୍ରିଟିଶ ଶାସକ ତାଙ୍କୁ ଜେଲ ଦଣ୍ଡାଦେଶ ଦେଇଥିଲେ। ବରହମପୁର ଜେଲରୁ ଫେରି ନବକୃଷ୍ଣ ଚୌଧୁରୀଙ୍କ ନିର୍ଦ୍ଦେଶରେ ପ୍ରଜାମେଳି ଆନ୍ଦୋଳନରେ ସାମିଲ ହୋଇଥିଲେ। ସେ କୋରାପୁଟ ଜିଲା ନାରାୟଣପାଟଣାରେ ରହି ଭୂଦାନ ଆନ୍ଦୋଳନରେ ସକ୍ରିୟ ଅଂଶଗ୍ରହଣ କରିଥିଲେ। ସ୍ବାଧୀନତା ପରେ ବିଭିନ୍ନ ଅନୁଷ୍ଠାନ ଗଠନରେ ସକ୍ରିୟ ଅଂଶଗ୍ରହଣ କରିବା ସହିତ ସାମାଜିକ କର୍ମକୁ ବ୍ରତ କରିଥିଲେ। ମୃତ୍ୟୁବେଳକୁ ସେ ଅଖିଳ ଭାରତୀୟ ସ୍ବାଧୀନତା ସଂଗ୍ରାମୀ ଓ ଉତ୍ତର ଦାୟାଦ ସଂଯୁକ୍ତ ସଂଗଠନର ଉପସଭାପତି, ରାଜ୍ୟ ସ୍ବାଧୀନତା ସଂଗ୍ରାମୀ ସମିତିର ଉପସଭାପତି ଓ ଜିଲା ସଭାପତି ଦାୟିତ୍ୱରେ ଥିଲେ। ପୁରୀ ସ୍ବର୍ଗଦ୍ୱାରରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ ବୋଲି ଜିଲା ଯୁବ ବିଜେଡି ସଭାପତି ରାଜେଶ ପଣ୍ଡା ସୂଚନା ଦେଇଛନ୍ତି।
