ନୂଆଦିଲ୍ଲୀ,୧୪।୯: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀଥାରମଣ ଶନିବାର ଆୟୋଜିତ ଏକ ଖବରଦାତା ସମ୍ମିଳନୀ ଜରିଆରେ ଦେଶର ଅର୍ଥ ବ୍ୟବସ୍ଥା ସୁଧୁରୁଥିବା କହିଛନ୍ତି। ସେ ରିଅଲ୍ ଇଷ୍ଟେଟକୁ ଆଶ୍ୱସ୍ତି ଦେଇଛନ୍ତି। ତେବେ ମୁଦ୍ରାସ୍ଫିତି ନିୟନ୍ତ୍ରଣରେ ରହିଥିବା ଓ ଔଦ୍ୟୋଗିକ କ୍ଷେତ୍ରରେ ସୁଧାର ଆସୁଥିବା ସଙ୍କେତ ଦେଖିବାକୁ ମିଳୁଛି ବୋଲି ସେ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଗତ କିଛିମାସ ହେବ ଦେଶର ଆର୍ଥିକ ସ୍ଥିତି ବିଗିଡି ଯାଇଥିବା ଆଲୋଚନା ହେଉଥିବା ବେଳେ ବେରୋଜଗାରୀ ସଂଖ୍ୟାରେ ମଧ୍ୟ ବୃଦ୍ଧି ଘଟିଛି। ଏମିତିକି ଅଟୋମୋବାଇଲ ଶିଳ୍ପରେ ଅଧିକ ପରିମାଣରେ ଛଟେଇ ହେଉଥିବାରୁ ବେରୋଜଗାରୀ ସମସ୍ୟା ଧୀରେଧୀରେ ବୃଦ୍ଧି ପାଉଥିବା ଏକ ବଡ ସମସ୍ୟା ହୋଇ ମୁଣ୍ଡ ଟେକିଛି। ସେପଟେ ଦେଶର ଅର୍ଥ ବ୍ୟବସ୍ଥା ଏବେ କୋମାକୁ ଚାଲିଯାଇଥିବା କହି ଶାସକ ଭାଜପାକୁ ମଧ୍ୟ କଂଗ୍ରେସ ଘେରିଥିବା ଦେଖାଯାଇଥିଲା।
