ନୂଆଦିଲ୍ଲୀ,୩-୮: କ୍ୟାଫେ କଫି ଡେ(ସିସିଡି)ର ମାଲିକ ଭି.ଜି.ସିଦ୍ଧାର୍ଥଙ୍କ ଆକଷ୍ମିକ ମୃତ୍ୟୁ ପରେ ଏହାର ନେତୃତ୍ୱ କିଏ ନେବ ବୋଲି ସାଧାରଣରେ ପ୍ରଶ୍ନ ଆସିଛି। ତେବେ ମିଡିଆ ରିପୋର୍ଟ ଅନୁଯାୟୀ ସିଦ୍ଧାର୍ଥଙ୍କ ସ୍ତ୍ରୀ ମାଳବିକା କମ୍ପାନୀକୁ ଚଳାଇବେ। ସେ ପୂର୍ବରୁ କମ୍ପାନୀ ବୋର୍ଡରେ ରହିଛନ୍ତି। କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏସ୍.ଏମ୍.କ୍ରିଷ୍ଣାଙ୍କ କନ୍ୟା ମାଳବିକା ବେଙ୍ଗାଲୁରୁ ବିଶ୍ୱବିଦ୍ୟାଳୟରୁ ଇଞ୍ଜିନିୟରିଂ ଡିଗ୍ରୀ ହାସଲ କରିଛନ୍ତି। ଅନ୍ୟପକ୍ଷରେ ସିସିଡିକୁ କିଣିବା ଲାଗି କୋକା କୋଲା, ଟାଟା ଗ୍ଲୋବାଲ ବେଭରେଜସ୍ ଏବଂ ଜୁବିଲିଏଣ୍ଟ ଫୁଡ଼୍ଓ୍ବର୍କ୍ସ ଇଚ୍ଛୁକ ଥିବା ଜଣାପଡିଛି। ସ୍ବାମୀଙ୍କ ମୃତ୍ୟୁ ପରେ ମାଳବିକା ଏବେ ଗଭୀର ଶୋକରେ ରହିଛନ୍ତି। ଏଣୁ ଯଥାଶୀଘ୍ର କମ୍ପାନୀ ସମ୍ଭାଳିବା ତାଙ୍କ ପକ୍ଷରେ ସମ୍ଭବ ହୋଇ ନ ପାରେ। ସିିଦ୍ଧାର୍ଥଙ୍କ ପରଲୋକ ପରେ ସିସିଡି ବୋର୍ଡ ଜରୁରୀ ବୈଠକ ଡକାଇ ପୂର୍ବତନ ଆଇଏଏସ୍ ଅଧିକାରୀ ଏସ୍.ବି.ରଙ୍ଗନାଥଙ୍କୁ କମ୍ପାନୀ ଦାୟିତ୍ୱ ଦେଇଛି। ଏଥିସହିତ ବୋର୍ଡ ନୀତିନ ବାଗମାନେଙ୍କୁ ଅନ୍ତରୀଣ ଚିଫ୍ ଅପରେଟିଂ ଅଫିସର ଭାବେ ନିଯୁକ୍ତ କରିଛି।
୪ ଦିନରେ ୪୮% ଖସିଲା ସିସିଡି ଶେୟାର
କଫି କିଙ୍ଗ ଭି.ଜି.ସିଦ୍ଧାର୍ଥଙ୍କ ଅକାଳ ବିୟୋଗ ପରେ ଷ୍ଟକ୍ ଏକ୍ସଚେଞ୍ଜରେ କ୍ୟାଫେ କଫି ଡେ ଶେୟାର ମୂଲ୍ୟ ଗତ ୪ ଦିନ ମଧ୍ୟରେ ୪୮ ପ୍ରତିଶତ ହ୍ରାସ ପାଇଛି। କମ୍ପାନୀ ସମ୍ପର୍କରେ ଅନେକ ନକାରାମତ୍କ ସୂଚନା ପ୍ରକାଶ ପାଇବା ପରେ ନିବେଶକ ଏହି ଶେୟାର ବିକ୍ରି କରିଦେବାକୁ ଶ୍ରେୟସ୍କର ମନେ କରୁଛନ୍ତି। ଶୁକ୍ରବାର ମଧ୍ୟ ଏହି ଶେୟାର ସର୍ବନିମ୍ନ ସ୍ତର ଛୁଇଁଛି। ଗତ ୪ ଦିନ ଭିତରେ ବମ୍ବେ ଷ୍ଟକ୍ ଏକ୍ସଚେଞ୍ଜ ବିଏସ୍ଇରେ କମ୍ପାନୀର ମାର୍କେଟ କ୍ୟାପିଟାଲାଇଜେଶନ ୧,୯୫୬.୬ କୋଟି ଟଙ୍କା ହ୍ରାସ ପାଇ ୨,୧୧୦.୪୦ କୋଟି ଟଙ୍କାରେ ପହଞ୍ଚତ୍ଛି। ଶୁକ୍ରବାର କମ୍ପାନୀର ଶେୟାର ୯.୯୬ ପ୍ରତିଶତ ହ୍ରାସ ପାଇ ୫୨ ସପ୍ତାହର ସର୍ବନିମ୍ନ ସ୍ତର ଛୁଇଁସାରିବା ସହ ୯୯.୯୦ ଟଙ୍କା ପ୍ରତି ଶେୟାର ବନ୍ଦ ହୋଇଛି। ଏନ୍ଏସ୍ଇରେ ଏହି ଶେୟାର ୧୦ ପ୍ରତିଶତ ହ୍ରାସ ପାଇ ୯୯.୪୫ ଟଙ୍କାରେ ବନ୍ଦ ହୋଇଛି।
ସିଏଫ୍ଓଙ୍କୁ ଜେରା କରିବ ପୋଲିସ
ସିସିଡି ମାଲିକ ଭି.ଜି.ସିଦ୍ଧାର୍ଥଙ୍କ ମୃତ୍ୟୁକୁ ନେଇ ପୋଲିସ କଫି ଡେ ଏଣ୍ଟରପ୍ରାଇଜେସ୍ ଲିମିଟେଡର ଚିଫ୍ ଫାଇନାନ୍ସ ଅଫିସର(ସିଏଫଓ) ଓ ଅନ୍ୟ ଫାଇନାନ୍ସିଆଲ ଆଡଭାଇଜରଙ୍କୁ ଜେରା କରିବ। ବେଙ୍ଗାଲୁରୁରେ ପୋଲିସର ଏକ ଟିମ୍ ଗଠନ କରାଯାଇ ପ୍ରାଥମିକ ତଦନ୍ତ ଆରମ୍ଭ କରାଯାଇଛି। ଏ ସଂକ୍ରାନ୍ତରେ ପ୍ରାରମ୍ଭିକ ପର୍ଯ୍ୟାୟରେ କମ୍ପାନୀ ଅଧିକାରୀମାନଙ୍କୁ ଜେରା କରାଯାଇଛି ବୋଲି ମାଙ୍ଗାଲୁରୁ ପୋଲିସ କମିଶନର ସନ୍ଦିପ ପାଟିଲ କହିଛନ୍ତି। ସେ କହିଛନ୍ତି ଯେ, ବର୍ତ୍ତମାନ ଟୋକିଓରେ ଥିବା ସିଏଫ୍ଓଙ୍କୁ ପ୍ରଶ୍ନ ସବୁକୁ ଇମେଲ ଜରିଆରେ ପଠାଯିବ ଏବଂ ତାଙ୍କଠାରୁ ଉତ୍ତର ଲୋଡାଯିବ। ସିଦ୍ଧାର୍ଥ ନେତ୍ରାବତୀ ନଦି ପୋଲ ନିକଟରେ ସୋମବାର ରାତିରୁ ନିଖୋଜ ହୋଇଯାଇଥିଲେ। ପରେ ତାଙ୍କର ମୃତଦେହକୁ ଜଣେ ମତ୍ସ୍ୟଜୀବୀ ନଦୀରୁ ଉଦ୍ଧାର କରିଥିଲା। ମୃତ୍ୟୁ ପୂର୍ବରୁ ନିଜ କର୍ମଚାରୀ ଓ ବୋର୍ଡ ଉଦ୍ଦେଶ୍ୟରେ ସେ ଏକ ପତ୍ର ଲେଖିଥିଲେ। ତାଙ୍କୁ ଆୟକର ବିଭାଗର ଜଣେ ପୂର୍ବତନ ଡିଜି ଅଯଥା ହଇରାଣ କରିଥିଲେ ବୋଲି ସେ ଅଭିଯୋଗ କରିଥିଲେ।
