ନୂଆଦିଲ୍ଲୀ,୧୦।୨: ଜାମିଆ ମିଲିଆ ଇସ୍ଲାମିଆର ଛାତ୍ରୀଛାତ୍ରମାନେ ନାଗରିକତ୍ୱ ସଂଶୋଧନ ଆଇନ(ସିଏଏ) ବିରୋଧରେ ସୋମବାର ଏକ ଶୋଭାଯାତ୍ରା ବାହାର କରିଥିଲେ। ସେହି ସମୟରେ ଛାତ୍ର ଓ ପୋଲିସ ମୁହାଁମୁହିଁ ହୋଇଛନ୍ତି। ଏଥିରେ କେତେକ ଛାତ୍ର ଆହତ ହୋଇଥିବା ସୂଚନା ମିଳିଛି। ସୂଚନାଯୋଗ୍ୟ, ଛାତ୍ରମାନଙ୍କ ଶୋଭାଯାତ୍ରା ସଂସଦ ଅଭିମୂଖେ ଯାଉଥିଲା। ଅଖୋଲା ହୋଲି ଫ୍ୟାମିଲି ହସ୍ପିଟାଲ ନିକଟରେ ବିକ୍ଷୋଭକାରୀ ଛାତ୍ରୀଛାତ୍ରଙ୍କୁ ପୋଲିସ ଅଟକାଇଦେଇଥିଲା। ଏହାପରେ ଛାତ୍ରୀଛାତ୍ର ବ୍ୟାରିକେଡ ଡେଇଁବାକୁ ଉଦ୍ୟମ କରିଥିଲେ। ସେତିକିବେଳେ ସେମାନଙ୍କୁ ଅଟକାଇବାକୁ ଯାଇ ଦିଲ୍ଲୀ ପୋଲିସ ଓ ଛାତ୍ର ମୁହାଁମୁହିଁ ହୋଇଥିଲେ। କାରଣ ସଂସଦ ମୁହାଁ ବିକ୍ଷୋଭ ପ୍ରଦର୍ଶନ ପାଇଁ ପୋଲିସ ବିକ୍ଷୋଭକାରୀଙ୍କୁ ଅନୁମତି ଦେଇ ନ ଥିଲା। ତେବେ ପରିସ୍ଥିତିକୁ ଅଣାୟତ୍ତ ହେବାରୁ ପୋଲିସ ସେମାନଙ୍କ ଉପରେ ଲାଠିଚାର୍ଜ କରିବା ସହ ବିକ୍ଷୋଭ ପ୍ରଦର୍ଶନ ଶେଷ କରିବାକୁ ଅପିଲ୍ କରିଥିଲା। ତେବେ ଏଥିରେ କେତେକ ଛାତ୍ର ଆହତ ହୋଇଥିବା ଜଣାପଡ଼ିଛି।
