ନୂଆଦିଲ୍ଲୀ,୧୧-୧ : ଟାଟାସନ୍ସର ଅଧ୍ୟକ୍ଷ ପଦବୀରେ ଅବସ୍ଥାପିତ ହେବା ନେଇ ଟାଟା ଗ୍ରୁପର ପୂର୍ବତନ ଅଧ୍ୟକ୍ଷ ସାଇରସ ମିସ୍ତ୍ରିଙ୍କ ସପକ୍ଷରେ ଡିସେମ୍ବର ୧୮ରେ ନ୍ୟାଶନାଲ କମ୍ପାନୀ ଲ ଆପିଲେଟ ଟ୍ରିବ୍ୟୁନାଲ (ଏନ୍ସିଏଲ୍ଏଟି) ରାୟ ଦେଇଥିଲେ। ଏହି ରାୟକୁ ସୁପ୍ରିମକୋର୍ଟ ଶୁକ୍ରବାର ରହିତାଦେଶ ଦେଇଛନ୍ତି। ଫଳରେ ମିସ୍ତ୍ରିଙ୍କୁ ଏହି ମାମଲାରେ ଝଟକା ଲାଗିଛି। ମିସ୍ତ୍ରିଙ୍କ ସପକ୍ଷରେ ଟ୍ରିବ୍ୟୁନାଲ ରାୟ ଦେବା ସହ ଟାଟାସନ୍ସକୁ ଏକ ଘରୋଇ କମ୍ପାନୀରେ ପରିବର୍ତ୍ତନ ଏବଂ ଅଧ୍ୟକ୍ଷ ପଦବୀରେ ଏନ୍.ଚନ୍ଦ୍ରଶେକରନ୍ଙ୍କ ନିଯୁକ୍ତିକୁ ବେଆଇନ ବୋଲି କହିଥିଲେ। ଏହି ରାୟ ବିରୋଧରେ ଚ୍ୟାଲେଞ୍ଜ କରିବା ଲାଗି ଟାଟାସନ୍ସକୁ ଗୋଟିଏ ମାସ ସମୟ ଦିଆଯାଇଥିଲା। ଉକ୍ତ ମାମଲାରେ ଟାଟା ସନ୍ସ, ଗ୍ରୁପର ସେବା ନିବୃତ୍ତ ଅଧ୍ୟକ୍ଷ ରତନ ଟାଟା ଏବଂ ଟିିସିଏସ୍ ପ୍ରମୁଖ ସୁପ୍ରିମକୋର୍ଟରେ ଦ୍ୱାରସ୍ଥ ହୋଇଥିଲା। ଏହାର ଶୁଣାଣି ଶୁକ୍ରବାର ହୋଇଥିବା ବେଳେ ସର୍ବୋଚ୍ଚ ନ୍ୟାୟାଳୟ ଏହି ମାମଲାରେ ବିସ୍ତୃତ ଶୁଣାଣି କରିବାକୁ କହିଛନ୍ତି। ମୁଖ୍ୟ ବିଚାରପତି ଏସ୍.ଏ.ବୋବଡେ, ଜଷ୍ଟିସ ବି.ଆର୍. ଗଭାଇ, ଜଷ୍ଟିସ ସୂର୍ଯ୍ୟକାନ୍ତଙ୍କୁ ଗଠିତ ଖଣ୍ଡପୀଠ ଉକ୍ତ ମାମଲାରେ ଶୁଣାଣି କରିଛନ୍ତି।
ଏକ ବିବାଦୀୟ ସ୍ଥିତିରେ ୨୦୧୬ ଅକ୍ଟୋବର ମିସ୍ତ୍ରିଙ୍କୁ ଟାଟାସନ୍ସ ଅଧ୍ୟକ୍ଷ ପଦବୀରୁ ହଟାଯାଇଥିଲା। ଏହାକୁ ବିରୋଧ କରି ସେ ପ୍ରଥମେ ନ୍ୟାଶନାଲ କମ୍ପାନୀ ଲ ଟ୍ରିବ୍ୟୁନାଲ(ଏନ୍ସିଏଲ୍ଟି)ଙ୍କ ଦ୍ୱାରସ୍ଥ ହୋଇଥିଲେ। ସେଠାରେ ମାମଲା ଟାଟା ଗ୍ରୁପ ସମକ୍ଷରେ ଯାଇଥିଲା। ଏହା ବିରୋଧରେ ମିସ୍ତ୍ରି ପରେ ଏନ୍ସିଏଲ୍ଏଟିଙ୍କ ଦ୍ୱାରସ୍ଥ ହେଲେ ଯେଉଁଠାରେ ରାୟ ତାଙ୍କ ସପକ୍ଷରେ ଯାଇଥିଲା। ହେଲେ ଏହି ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବାକୁ ଟାଟା ଗ୍ରୁପକୁ କୁହାଯାଇଥିଲା। ଯେଉଁଠାରେ ଏନ୍ସିଏଲ୍ଏଟି ରାୟକୁ ରହିତାଦେଶ ଦିଆଯାଇଛି। ଟାଟା ଗ୍ରୁପ ଅଧ୍ୟକ୍ଷ ପଦବୀକୁ ଫେରିବା ନେଇ କୌଣସି ଆଗ୍ରହ ନ ଥିବା ମିସ୍ତ୍ରି ଗତ ସପ୍ତାହରେ କହିଥିଲେ। ଅଳ୍ପ ସଂଖ୍ୟକ ଅଂଶୀଦାରଙ୍କ ସ୍ବାର୍ଥକୁ ନଜରରେ ରଖି ଏଭଳି ନିଷ୍ପତ୍ତି ନେଇଥିବା ମିସ୍ତ୍ରି କହିଥିଲେ। ସାଇରସ ମିସ୍ତ୍ରି ସାପୁରଜୀ ପାଲୋନଜୀ ପରିବାରର ହୋଇଥିବା ବେଳେ ୨୦୧୨ରେ ରତନ ଟାଟାଙ୍କ ସ୍ଥାନରେ ଟାଟାସନ୍ସର କାର୍ଯ୍ୟକାରୀ ଅଧ୍ୟକ୍ଷ ପଦବୀରେ ଅବସ୍ଥାପିତ ହୋଇଥିଲେ। ଏହି ପଦବୀ କାରଣରୁ ସେ ଟାଟା ମୋଟର୍ସ, ଟାଟା ପାଓ୍ବାର ଭଳି ଗ୍ରୁପର ସମସ୍ତ ସୂଚୀଭୁକ୍ତ କମ୍ପାନୀଗୁଡିକରେ ପ୍ରମୁଖ ସ୍ଥାନରେ ରହିଥିଲେ। ଟାଟାସନ୍ସରେ ସାଇରସ ମିସ୍ତ୍ରିଙ୍କ ପରିବାରର ୧୮% ଅଂଶଧନ ରହିଛି।
