ନୂଆଦିଲ୍ଲୀ,୨୦-୭: କେନ୍ଦ୍ର ସରକାର ସମାବେଶୀ, ସମଗ୍ର ତଥା ସ୍ଥାୟୀ ଅଭିବୃଦ୍ଧି ଲାଗି ବଦ୍ଧପରିକର ଏବଂ ୨୦୨୪ ସୁଦ୍ଧା ଦେଶର ଅର୍ଥନୀତିକୁ ୫ ଲକ୍ଷ କୋଟି ଡଲାରରେ ପହଞ୍ଚାଇବା ଲକ୍ଷ୍ୟରେ ଆଗେଇ ଚାଲିଛି ବୋଲି କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ବାଷ୍ପ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି। ଏଠାରେ ଆୟୋଜିତ ଏନର୍ଜି ହରିଜନ, ୨୦୧୯ ସମ୍ମିଳନୀରେ ଉଦ୍ବୋଧନ ଦେଇ ସେ କହିଛନ୍ତି ଯେ, ଭାରତ ବିଶ୍ୱ ଶକ୍ତି ପରିବର୍ତ୍ତନ ପ୍ରକ୍ରିୟାକୁ ଆପଣାଇଛି ଏବଂ ବ୍ରିଟେନକୁ ପଛକୁ ପକାଇ ୫ମ ବୃହତ ଅର୍ଥନୀତି ଆଡକୁ ଅଗ୍ରସର ହେଉଛି। ଭାରତ ଏବଂ ବିଶ୍ୱ ପାଇଁ ନବୀକରଣୀୟ ଶକ୍ତି ଅତ୍ୟନ୍ତ ଶସ୍ତା ଏବଂ ଏହା ଶକ୍ତି ଚାହିଦାକୁ ମେଣ୍ଟାଇପାରିବ। ପ୍ରଧାନ କହିଛନ୍ତି ଯେ, ଦେଶ ପାଇଁ ଇଲେକ୍ଟ୍ରିକ ଗାଡ଼ି ଏବେ ପ୍ରାଥମିକତା ହୋଇଛି। ସମସ୍ତ ପ୍ରକାର ସ୍ବଚ୍ଛ ଇନ୍ଧନ ସହ ପରିବହନ କ୍ଷେତ୍ରରେ ସମସ୍ତ ପ୍ରକାର ସମାଧାନ ଭାରତ ଆବଶ୍ୟକ କରୁଛି। ଦେଶରେ ଇଲେକ୍ଟ୍ରିକ ଗାଡ଼ିର ବିକାଶ ଏବଂ ସ୍ବଚ୍ଛ ପରିବହନ ସୃଷ୍ଟି ହେବ ଏବଂ ଏଥିପାଇଁ ରୋଡମ୍ୟାପ୍ ପ୍ରସ୍ତୁତ ହେଉଛି। କ୍ଲାଉଡ ଟେକ୍ନୋଲୋଜି, ରୋବୋଟିକ୍ ଅଟୋମେଶନ, ବ୍ଲକ୍ ଚେନ୍ ଭଳି ବାଧା ଉତ୍ପନ୍ନକାରୀ ଡିଜିଟାଲ ଟେକ୍ନୋଲୋଜି ଆସିଥିବା ବେଳେ ଭାରତୀୟ କମ୍ପାନୀଗୁଡ଼ିକ ନିଜକୁ ଏହାସହ ଖାପ୍ଖୁଆଇବାକୁ ହେବ। ଏଭଳି ବାଧାକାରକ ଉଦ୍ଭାବନ ସହ ତାଳ ଦେବା ଲାଗି ପ୍ରତ୍ୟେକ ଦେଶ ଓ କମ୍ପାନୀ ନିଜର କାର୍ଯ୍ୟବଳ ପ୍ରସ୍ତୁତ କରିବାକୁ ସେ ଆହ୍ବାନ ଦେଇଛନ୍ତି।
