ପୁରୀ ଅଫିସ, ୧୦।୬: ଶ୍ରୀମନ୍ଦିର ସେବାୟତମାନେ କରୋନା ସଂକ୍ରମଣଠାରୁ କିପରି ଦୂରେଇ ରହିବେ ସେ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯାଇଛି। କରୋନା ସଚେତନତା ଶିବିରଠାରୁ ଆରମ୍ଭକରି ସେବାୟତଙ୍କ କୋଭିଡ୍ ଟେଷ୍ଟ ଏବଂ ସଙ୍ଗରୋଧରେ ରଖାଯିବା ଭଳି ପଦକ୍ଷେପ ମଧ୍ୟ ନିଆଯାଇଛି। ଏବେ ପୁଣି ସେବାୟତଙ୍କୁ ମାସ୍କ ଯୋଗାଇଦେବା ଲାଗି ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଛି । ପ୍ରାୟ ୫ ହଜାର ସେବାୟତଙ୍କ ଲାଗି ଏହି ମାସ୍କ ଯୋଗାଇ ଦିଆଯିବ। ଏଥିଲାଗି ବୟନିକା କିମ୍ବା ମହିଳା ସ୍ବୟଂ ସହାୟକ ଗୋଷ୍ଠୀ ସହ ମିଶି ଶ୍ରୀମନ୍ଦିର ପ୍ରଶାସନ ଏହି ମାସ୍କ ତିଆରି କରିବ ବୋଲି ମୁଖ୍ୟ ପ୍ରଶାସକ ଡ. କିଷନ କୁମାର ସୂଚନା ଦେଇଛନ୍ତି।
ବୁଧବାର ଶ୍ରୀମନ୍ଦିର କାର୍ଯ୍ୟାଳୟରେ ସେବାୟତଙ୍କ କଲ୍ୟାଣ ପାଇଁ ଅନୁଷ୍ଠିତ ସମୀକ୍ଷା ବୈଠକ ପରେ ମୁଖ୍ୟ ପ୍ରଶାସକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, କରୋନାର ଭୟାବହତା ଦୃଷ୍ଟିରୁ ପ୍ରାୟ ୩ ମାସ ହେବ ଶ୍ରୀମନ୍ଦିର ବନ୍ଦ ରହିଛି। ତେଣୁ ସେବାୟତଙ୍କ ଦୈନନ୍ଦିନ ପରିବାର ପ୍ରତିପୋଷଣ ଲାଗି ୫ ହଜାର ଟଙ୍କା ଲେଖାଏ ସହାୟତା ପ୍ରଦାନ କରାଯାଇଥିଲା। ପୁଣି ଦ୍ୱିତୀୟ କିସ୍ତିରେ ଆଉ ୫ ହଜାର ଟଙ୍କା ଲେଖାଏ ଦେବା ଲାଗି ଯୋଜନା ପ୍ରସ୍ତୁତ ହୋଇଛି। ସେବାୟତମାନେ ସୁବିଧାରେ ରହି ମହାପ୍ରଭୁଙ୍କ ନୀତିକାନ୍ତି କିପରି ସୁରୁଖୁରୁରେ ସମ୍ପନ୍ନ କରିବେ ତାହା ଉପରେ ଶ୍ରୀମନ୍ଦିର ପ୍ରଶାସନ ଗୁରୁତ୍ୱ ଦେଉଛି ବୋଲି ମୁଖ୍ୟ ପ୍ରଶାସକ କହିଛନ୍ତି।
