ଚେନ୍ନାଇ: ସେପ୍ଟେମ୍ବର ୨ ତାରିଖ ୧ଟା ୧୫ ମିନିଟ୍ରେ ଅର୍ବିଟର୍ରୁ ଭାରତର ପ୍ରଥମ ମୁନ୍ ଲ୍ୟାଣ୍ଡର ବିକ୍ରମ ଅଲଗା ହୋଇ ଚନ୍ଦ୍ରର ନିକଟତର ହେବାରେ ଲାଗିଛି। ଭାରତୀୟ ଅନ୍ତରୀକ୍ଷ ଅନୁସନ୍ଧାନ କେନ୍ଦ୍ର (ଇସ୍ରୋ) ଲ୍ୟାଣ୍ଡର୍ର ପ୍ରଥମ ଡି-ଅର୍ବିଟାଲ ଅପରେଶନ(ଅଧିକ ଉଚ୍ଚତାରେ ଥିବା ଅର୍ବିଟ ବା କକ୍ଷରୁ ତଳକୁ କମ୍ଉଚ୍ଚତାର କକ୍ଷକୁ ଅଣାଯିବା ପ୍ରକ୍ରିୟା) ସକାଳ ୮ଟା ୫୦ ମିନିଟରେ ଆରମ୍ଭ କରି ସଫଳତାର ସହ ଶେଷ ମଧ୍ୟ କରିଛି। ଅନବୋର୍ଡ ପ୍ରୋପଲ୍ସନ ସିଷ୍ଟମ ବ୍ୟବହାର କରି ଏହି ଅପରେଶନକୁ ଇସ୍ରୋ ୪ ସେକେଣ୍ଡରେ ଶେଷ କରିଛି। ଲ୍ୟାଣ୍ଡର୍ର ଅର୍ବିଟ ବା କକ୍ଷ ୧୦୪କିମି x ୧୨୮ କିମି। ଅପରପକ୍ଷରେ ଚନ୍ଦ୍ରଯାନ-୨ର ଅର୍ବିଟର ଏବେ ବି ଚନ୍ଦ୍ର ଚାରିପାଖରେ ତା କକ୍ଷପଥରେ ଘୂରୁଛି। ଅର୍ବିଟର ଓ ଲ୍ୟାଣ୍ଡର ପୂରା ଠିକ୍ ଅଛି ବୋଲି ଇସ୍ରୋ ପ୍ରକାଶ କରିଛି। ଦ୍ୱିତୀୟ ଡି-ଅର୍ବିଟାଲ ଅପରେଶନ ସେପ୍ଟେମ୍ବର ୪ ତାରିଖ ରାତି ୪ଟା ୩୦ ମିନିଟ୍ରେ କରାଯିବ।ଏହାପରେ ଲ୍ୟାଣ୍ଡର୍ ଚନ୍ଦ୍ରର ନିକଟତର ହୋଇ ସେପ୍ଟେମ୍ବର ୭ ତାରିଖ ରାତି ୧ଟା ୩୦ ମିନିଟରୁ ୨ଟା ୩୦ ମିନିଟ ମଧ୍ୟରେ ଚନ୍ଦ୍ରପୃଷ୍ଠରେ ଅବତରଣ କରିବ।
