ବଡ଼ବିଲ,୮।୧(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ପୋଲିସ ମଙ୍ଗଳବାର ବିଳମ୍ବିତ ରାତିରେ ଚୋରାଚାଲାଣ ହେଉଥିବା ୨୭ ମେଟ୍ରିକ ଟନ୍ ସାଇଜ ଲୁହାପଥର ବୋଝେଇ ହାଇଓ୍ବା ଜବତ କରିବା ସହ ଘଟଣାରେ ସଂପୃକ୍ତ ୬ ଜଣଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ମାଷ୍ଟରମାଇଣ୍ଡ ଝାଡ଼ଖଣ୍ଡ ପଶ୍ଚିମ ସିଂହଭୂମ ଜିଲା ମଝିଗାଁ ଥାନା ଖାରପଶି ଗ୍ରାମର ସମ୍ପ୍ରଦ କୁମାର କାଳନ୍ଦୀ, ଜବତ ହାଇଓ୍ବା ଟ୍ରକର ମାଲିକ ଝାଡ଼ଖଣ୍ଡର ପୂର୍ବ ସିଂହଭୂମ ଜିଲା ସିଧଗୋଡ଼ା ଥାନା ବିରିଡିହ ଗ୍ରାମର ଉମେଶ କୁମାର ପାଠକ, ହାଇଓ୍ବା ଟ୍ରକ୍ ଡ୍ରାଇଭର ଝାଡ଼ଖଣ୍ଡର ଲକ୍ଷ୍ମଣ ମାହାତୋ, ହାଇଓ୍ବା ବିକାଶ ମାହାତୋ ଏବଂ ଦଲାଲ ଦ୍ୱୟ ହେଲେ କେନ୍ଦୁଝର ଜିଲା ଯୋଡ଼ା ଥାନା ଅନ୍ତର୍ଗତ କଳାପାହାଡ଼ ଅଞ୍ଚଳର ଶମ୍ଭୁ ବାହାଦୂର ଓ ବନେଇକଳା ଅଞ୍ଚଳର ରାଜେଶ ମୁଣ୍ଡା। ସମସ୍ତଙ୍କୁ କୋର୍ଟ ଚାଲାଣ କରାଯାଇଥିବା ବଡ଼ବିଲ୍ ଥାନାଧିକାରୀ ସୁଶାନ୍ତ ଦାଶ ସୂଚନା ଦେଇଛନ୍ତି।
