ରେକର୍ଡ ଷଷ୍ଠଥର ପାଇଁ ବାଲୋନ ଡି’ ଅର ପୁରସ୍କାର ହାସଲ କରିଥିବା ଲିଓନେଲ ମେସି ବାର୍ସିଲୋନା ପାଇଁ ୭୦୦ତମ ମ୍ୟାଚ ଖେଳିଛନ୍ତି। ଚାମ୍ପିୟନ୍ସ ଲିଗ୍ରେ ବୋରୁସିଆ ଡର୍ଟମୁଣ୍ଡ ବିପକ୍ଷରେ ମ୍ୟାଚ୍ ଖେଳି ସେ ଏହି ମାଇଲଖୁଣ୍ଟ ଛୁଇଁଛନ୍ତି। ଏଥି ସହିତ ସେ ସର୍ବାଧିକ ମ୍ୟାଚ୍ ଖେଳିବା ଓ ସର୍ବାଧିକ ଗୋଲ ସ୍କୋର କରିବା ରେକର୍ଡର ନିକଟତର ହୋଇଛନ୍ତି।
ଆର୍ଜେଣ୍ଟିନା ଫୁଟବଲ ସୁପରଷ୍ଟାର ଲିଓନେଲ ମେସି କ୍ୟାରିୟରରେ ଆଉ ଏକ ମାଇଲଖୁଣ୍ଟ ନିକଟତର ହୋଇଛନ୍ତି। କେବଳ ସେତିକି ନୁହେଁ ସେ କିମ୍ବଦନ୍ତୀ ଫୁଟବଲର ପେଲେ ଓ ତାଙ୍କ ପୂର୍ବତନ ବାର୍ସିଲୋନା ସାଥି ଖେଳାଳି ଜାଭି ହେର୍ନାଣ୍ଡେଜଙ୍କ ରେକର୍ଡକୁ ଅତିକ୍ରମ କରିବାର ସମ୍ଭାବନା ସୃଷ୍ଟି କରିଛନ୍ତି। ସେ ନିଜ କ୍ଲବ ବାର୍ସିଲୋନ ପାଇଁ ୭୦୦ତମ ମ୍ୟାଚ୍ ଖେଳିଛନ୍ତି। ଚାମ୍ପିୟନ୍ସ ଲିଗ୍ରେ ସେ ଗତ ୨୭ ତାରିଖରେ ବୋରୁସିଆ ଡର୍ଟମୁଣ୍ଡ ବିପକ୍ଷରେ ମ୍ୟାଚ୍ ଖେଳି ଏହି ମାଇଲଖୁଣ୍ଟ ଛୁଇଁଛନ୍ତି। ଗ୍ରୁପ୍ ଏଫ୍ର ଏହି ମ୍ୟାଚ୍ରେ ମେସି ବାର୍ସିଲୋନାର ନେତୃତ୍ୱ ନେଇଥିଲେ। ଘରୋଇ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ୩-୧ ଗୋଲରେ ବିଜୟୀ ହୋଇ ବାର୍ସିଲୋନା ନକ୍ଆଉଟ୍ ପର୍ଯ୍ୟାୟକୁ ଉଠିଛି। ୩୩ତମ ମିନିଟ୍ରେ ଗୋଟିଏ ଗୋଲ ଦେଇଥିଲେ। ମୋଟ ଉପରେ ବାର୍ସିଲୋନା ପାଇଁ ମେସି ୬୧୩ଟି ଗୋଲ ସ୍କୋର କରିଛନ୍ତି।
ଏଥିସହିତ ୩୨ ବର୍ଷୀୟ ମେସି କ୍ଲବରେ ରେକର୍ଡ ୭୬୭ ମ୍ୟାଚ୍ ଠାରୁ କିଛି ଦୂରରେ ରହିଛନ୍ତି। ପୂର୍ବରୁ ତାଙ୍କ ବାର୍ସିଲୋନା ସାଥୀ ଖେଳାଳି ତାରକା ମିଡ୍ ଫିଲ୍ଡର ଜାଭି ହେର୍ନାଣ୍ଡେଜ ୭୬୭ ସଂଖ୍ୟକ ମ୍ୟାଚ୍ ଖେଳି ଏହି ରେକର୍ଡ ସ୍ଥାପନ କରିଥିଲେ। ମେସି ଗୋଟିଏ ପରେ ଗୋଟିଏ ରେକର୍ଡ ସୃଷ୍ଟି କରିଚାଲିଛନ୍ତି। ସେ ମଧ୍ୟ ଗତ ସୋମବାର ରେକର୍ଡ ଷଷ୍ଠଥର ପାଇଁ ବିଶ୍ୱ ଫୁଟବଲର ସର୍ବୋଚ୍ଚ ପୁରସ୍କାର ବାଲୋନ ଡି’ ଅର ହାସଲ କରିଛନ୍ତି। ଏହି କ୍ରମରେ ନିଜର ପ୍ରତିଦ୍ୱନ୍ଦ୍ୱୀ କ୍ରିଷ୍ଟିଆନୋ ରୋନାଲ୍ଡୋଙ୍କୁ ପଛରେ ପକାଇଛନ୍ତି।
ପୂର୍ବରୁ ଅବଶ୍ୟ ମେସି ବାର୍ସିଲୋନାର ଟପ୍ ଟ୍ରଫି ଓ୍ବିନର ସାବ୍ୟସ୍ତ ହୋଇଛନ୍ତି। ସେ ଏପର୍ଯ୍ୟନ୍ତ ୩୪ଟି ଟାଇଟଲ ହାସଲ କରି ରେକର୍ଡ ସ୍ଥାପନ କରିଛନ୍ତି। ଏଥିରେ ତାଙ୍କର ୧୧୩ଟି ଷ୍ଟ୍ରାଇକ୍ ସାମିଲ ରହିଛି। ଚାମ୍ପିୟନ୍ସ ଲିଗ୍ରେ ୧୪୦ଟି ମ୍ୟାଚ ଖେଳି ସେ ଏହି ସଫଳତା ପାଇଛନ୍ତି। ମେସି ମାତ୍ର ୧୭ ବର୍ଷ ବୟସରେ ୨୦୦୪ରେ ପଦାର୍ପଣ କରିଥିଲେ।
ଚଳିତ ସେସନରେ ଗୋଟିଏ କ୍ଲବ ତରଫରୁ ସେ ୯ଟି କ୍ଲବ ମ୍ୟାଚ୍ ଖେଳି ୧୨ଟି ଗୋଲ ସ୍କୋର କରି କିମ୍ବଦନ୍ତୀ ଫୁଟବଲର ପେଲେଙ୍କ ନିକଟତର ହୋଇଛନ୍ତି। ପେଲେ ୧୯୫୦ରୁ ୧୯୭୦ ମଧ୍ୟରେ ସାଣ୍ଟୋସ୍ ତରଫରୁ ଖେଳି ୬୪୩ଟି ଗୋଲ ସ୍କୋର କରିଥିଲେ। ଚଳିତ ସିଜନ ଶେଷ ଆଡକୁ ଏହି ରେକର୍ଡଗୁଡିକ ଅତିକ୍ରମ କରିବେ ବୋଲି ଆଶା କରାଯାଉଛି। ବାର୍ସିଲୋନା ସହିତ ମେସି ୪ଥର ୟୁରୋପର ସର୍ବବୃହତ୍ କ୍ଲବ ପୁରସ୍କାର ହାସଲ କରିଛନ୍ତି। ୨୦୧୫ରେ ସେ ଶେଷଥର ପାଇଁ ଏହି ପୁରସ୍କାର ହାସଲ କରିଥିଲେ। ରେକର୍ଡ ୬ଥର ବାଲୋନ ଡି’ ଅର ପୁରସ୍କାର ଜିତିଥିବା ମେସି ୬ଥର ୟୁରୋପିଆନ ଗୋଲ୍ଡେନ ବୁଟ୍ ମଧ୍ୟ ହାସଲ କରିଛନ୍ତି।
