ମଦୁରାଇ: କରୋନା ସଂକ୍ରମଣ ରୋକିବା ଲାଗି ଲୋକଙ୍କୁ ସଚେତନ କରିବାକୁ ପ୍ରୟାସ ଜାରି ରହିଛି। ତେବେ ସରକାରଙ୍କ ଏହି ଉଦ୍ୟମକୁ କେତେଜଣ ବ୍ୟକ୍ତି ସ୍ବଇଚ୍ଛାରେ କରିବାରେ ଲାଗିଛନ୍ତି। ଆଉ ଏଥିପାଇଁ ନିଜେ ଖର୍ଚ୍ଚାନ୍ତ ହେବାକୁ ବି ପଛାଉ ନାହାନ୍ତି। ଏମିତି ଜଣେ ଉଦାର ହୃଦୟର ବ୍ୟକ୍ତି ହେଉଛନ୍ତି ଭି. କୃପାସ୍ବାମୀ।
ତାମିଲନାଡୁର ମଦୁରାଇ ଅଞ୍ଚଳରେ କୃପାସ୍ବାମୀ ବସ୍ କଣ୍ଡକ୍ଟର ଭାବେ କାମ କରନ୍ତି। ଏବେ ବସ୍ ଚଳାଚଳ ନେଇ ସରକାର କଟକଣାକୁ କୋହଳ କରିଥିବାରୁ ଅନେକେ ବସ୍ରେ ଯିବାଆସିବା ଆରମ୍ଭ ହୋଇଛିି। କିନ୍ତୁ ଏବେ ବି ଅନେକେ କରୋନା ସଂକ୍ରମଣ ନେଇ ସଚେତନ ନାହାନ୍ତି କିମ୍ବା କରୋନା ସମ୍ପର୍କରେ କିଛି ଜାଣନ୍ତି ନାହିଁ। ତେଣୁ ଏଭଳି ଲୋକଙ୍କୁ ସାହାଯ୍ୟ କରିବା ପାଇଁ କୃପାସ୍ବାମୀ ଚିନ୍ତା କରିଥିଲେ। ଏଥିପାଇଁ ନିଜର ମାସିକ ଦରମା ଟଙ୍କା ଖର୍ଚ୍ଚକରି ମାସ୍କ ଏବଂ ପିପିଇ କିଟ୍ କିଣି ସେସବୁକୁ ଆବଶ୍ୟକ ଲୋକଙ୍କୁ ବାଣ୍ଟୁଛନ୍ତି। ଅବଶ୍ୟ ବର୍ତ୍ତମାନ ସମୟରେ ନିଜ ପରିବାରର ଜରୁରୀ ଆବଶ୍ୟକତା ମେଣ୍ଟାଇବା ପାଇଁ ବହୁ ଅସୁବିଧାର ସମୁଖୀନ ହେବାକୁ ପଡୁଛି, କିନ୍ତୁ ନିଜେ ଅସୁବିଧାରେ ରହି ବି ସେ ଲୋକଙ୍କୁ ସାହାଯ୍ୟ କରିବା ପାଇଁ ଚିନ୍ତା କରିଛନ୍ତି। ତାଙ୍କର ଏଭଳି କାମରେ ତାଙ୍କ ପରିବାର ଲୋକଙ୍କ ମଧ୍ୟ ପୂର୍ଣ୍ଣ ସମର୍ଥନ ରହିଛି। ତେଣୁ ସେ ତାଙ୍କର ପୂରା ଦରମା ଟଙ୍କାକୁ ମାସ୍କ କିଣି ବାଣ୍ଟିବାରେ ଖର୍ଚ୍ଚ କରିଦେଇଛନ୍ତି। ତେଣୁ ଘରଖର୍ଚ୍ଚ ଏବଂ ପିଲାଙ୍କ ପାଠପଢା ଖର୍ଚ୍ଚ ଆସନ୍ତା ମାସରେ ଦେବାପାଇଁ ଚିନ୍ତା କରିଛନ୍ତି। ତାଙ୍କ ମତରେ ଲୋକେ ସଚେତନ ହୋଇ ମାସ୍କ ପିନ୍ଧିଲେ କରୋନା ଭାଇରସ୍ ନିୟନ୍ତ୍ରଣ ହୋଇପାରିବ ଏବଂ ସମସ୍ତେ ଭଲରେ ଜୀବନଯାପନ କରିପାରିବେ। ତେଣୁ ଏ ସମୟରେ ସମସ୍ତେ ଏଭଳି ସଚେତନ ହେବା ଆବଶ୍ୟକ।
