କୋରାପୁଟ,୧୭।୮(ସ୍ବ.ପ୍ର.) : କୋରାପୁଟ ଟାଉନ ଥାନା ଅନ୍ତର୍ଗତ ଡୁମୁରିପୁଟ ରେଳ ଷ୍ଟେଶନରେ ଶନିବାର ଏକ ଅଭାବନୀୟ ଘଟଣା ଘଟିଛି। ଏକ ମାଲବାହୀ ଟ୍ରେନ ଧକ୍କାରେ ଜଣେ ମହିଳାଙ୍କ ମୃତ୍ୟୁ ଘଟିଛି। ମୃତ ମହିଳା ଜଣକ ହେଲେ ସୁନାବେଡ଼ାସ୍ଥିତ ହାଲ୍ କର୍ମଚାରୀ କେଦାରନାଥ ଦାଶଙ୍କ ସ୍ତ୍ରୀ ସୁଭଦ୍ରା ଷଡ଼ଙ୍ଗୀ(୨୭)। ମିଳିଥିବା ସୂଚନା ଅନୁଯାୟୀ, କେଦାରନାଥ ସ୍ତ୍ରୀ ସୁଭଦ୍ରା ଓ ପୁଅ ଆଭାଂଶୁ(୫)ଙ୍କ ସହ ଭୁବେନେଶ୍ୱର- ଜଗଦଲପୁର ହୀରାଖଣ୍ଡ ଏକ୍ସପ୍ରେସରେ ପ୍ରହ୍ମପୁରରୁ ଆସି ସୁନାବେଡ଼ା ଯିବା ପାଇଁ ଶନିବାର ପୂର୍ବାହ୍ନରେ ଡୁମୁରିପୁଟ ଷ୍ଟେଶନଠାରେ ଓହ୍ଲାଇଥିଲେ। ହୀରାଖଣ୍ଡରୁ ଓହ୍ଲାଇ ସେମାନେ ଅନ୍ୟ ଏକ ରେଳ ଲାଇନ ଅତିକ୍ରମ କରି ଅଟୋ ନିକଟକୁ ଯାଉଥିବାବେଳେ ସେହି ଲାଇନରେ ଆସୁଥିବା ନାଲ୍କୋର ଏକ ମାଲବାହୀ ଟ୍ରେନ ସୁଭଦ୍ରାଙ୍କୁ ଧକ୍କା ଦେଇଥିଲା। କେଦାରନାଥ ଏକ ଅଟୋରେ ସୁଭଦ୍ରାକୁ ତୁରନ୍ତ ସୁନାବେଡ଼ା ହାଲ୍ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ତେବେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି।
