ନୂଆଦିଲ୍ଲୀ,୨ା୧୧(ଆଇଏଏନ୍ଏସ୍): ଦୁଇଦିନିଆ ଭାରତ ଗସ୍ତରେ ଆସିଥିବା ଜର୍ମାନ୍ ଚାନ୍ସେଲର ଆଞ୍ଜେଲା ମର୍କେଲ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗରେ ଆଲୋଚନା ଶୁକ୍ରବାର ଅନୁଷ୍ଠିତ ହୋଇଛି। ଏହି ଅବସରରେ ଦୁଇଦେଶ ମଧ୍ୟରେ କୃଷି, କୃତ୍ରିମ ବୌଦ୍ଧିକତା, ସବୁଜ ସହରାଞ୍ଚଳ ପରିବହନ ସମେତ ୨୦ଟି ରାଜିନାମା ସ୍ବାକ୍ଷର ହୋଇଛି। ଆତଙ୍କବାଦ ବିରୋଧରେ ମିଳିତ ଲଢ଼େଇ ପାଇଁ ଦୁଇନେତା ସଂକଳ୍ପ ନେଇଛନ୍ତି। କୃତ୍ରିମ ବୌଦ୍ଧିକତା ଓ ଡିଜିଟାଲ ଟ୍ରାନ୍ସଫର୍ମେଶନ୍ କ୍ଷେତ୍ରରେ ସହଯୋଗକୁ ଅଧିକ ମଜଭୁତ କରିବା ଉପରେ ମିଳିତ ବିବୃତିରେ ଉଭୟ ନେତା ଗୁରୁତ୍ୱ ଦେଇଥିଲେ।
ଅବସରରେ ଉଦ୍ବୋଧନ ଦେଇ ମୋଦି କହିଥିଲେ, ଆତଙ୍କବାଦ ଓ ଉଗ୍ରବାଦ ବିରୋଧରେ ଦ୍ୱିପାକ୍ଷିକ ଓ ବହୁପାକ୍ଷିକ ସହଯୋଗ ବଢ଼ାଇବା ପାଇଁ ଭାରତ ଓ ଜର୍ମାନୀ ସଂକଳ୍ପ ନେଇଛନ୍ତି। ଏହା ବ୍ୟତୀତ ନୂତନ ତଥା ଆଧୁନିକ ପ୍ରଯୁକ୍ତ କ୍ଷେତ୍ରରେ ସହଯୋଗ ବୃଦ୍ଧି ଉପରେ ଉଭୟ ପକ୍ଷ ଗୁରୁତ୍ୱ ଦେବା ସହ ଦକ୍ଷତା ବିକାଶ, ଶିକ୍ଷା, ସାଇବର ସୁରକ୍ଷା କ୍ଷେତ୍ରରେ ସହଯୋଗକୁ ପ୍ରାଧାନ୍ୟ ଦେଇଥିବା ପ୍ରଧାନମନ୍ତ୍ରୀ କହିଥିଲେ। ଇ-ମୋବିଲିଟି, ଫୁଏଲ୍ ସେଲ୍ ଟେକ୍ନୋଲୋଜି, ସ୍ମାର୍ଟ ସିଟି, ଅନ୍ତର୍ଦ୍ଦେଶୀୟ ଜଳମାର୍ଗ, ଉପକୂଳ ପରିଚାଳନା, ନଦୀ ପରିଷ୍କରଣ ଓ ଜଳବାୟୁ ପରିବର୍ତ୍ତନ କ୍ଷେତ୍ରରେ ସହଯୋଗ ନେଇ ମଧ୍ୟ ଦୁଇଦେଶ ରାଜି ହୋଇଛନ୍ତି। ଉତ୍ତରପ୍ରଦେଶ ଓ ତାମିଲନାଡୁରେ ଥିବା ପ୍ରତିରକ୍ଷା କରିଡରରେ ପ୍ରତିରକ୍ଷା ସାମଗ୍ରୀ ଉତ୍ପାଦନରେ ଭାଗନେବା ପାଇଁ ଜର୍ମାନୀକୁ ଆମନ୍ତ୍ରଣ କରାଯାଇଛି। ୨୦୨୨ ସୁଦ୍ଧା ନୂଆ ଭାରତ ନିର୍ମାଣ ଲକ୍ଷ୍ୟ ରଖାଯାଇଥିଲାବେଳେ ଜର୍ମାନୀ ଭଳି ବୈଷୟିକ ସମୃଦ୍ଧ ଓ ବିକଶିତ ରାଷ୍ଟ୍ର ଏ ଦିଗରେ ସହାୟକ ହୋଇପାରିବ। ଜାତିସଂଘ ସୁରକ୍ଷା ପରିଷଦରେ ସଂସ୍କାର ଲାଗି ଦୁଇଦେଶ ସହଯୋଗ ଜାରି ରଖିବେ ବୋଲି ମୋଦି କହିଛନ୍ତି। ଉଚ୍ଚଶିକ୍ଷା କ୍ଷେତ୍ରରେ ଭାରତ-ଜର୍ମାନୀ ଭାଗୀଦାରିତାକୁ ଉଭୟ ନେତା ସ୍ବାଗତ କରିଥିଲେ। ଆମ ସହଯୋଗର ଏହା ଏକ ବଡ଼ ଅଂଶ ବୋଲି ମର୍କେଲ କହିଥିଲେ। କଶ୍ମୀର ପ୍ରସଙ୍ଗରେ ଜର୍ମାନ ଚାନ୍ସେଲର କହିଥିଲେ ଏହା ଅସ୍ଥାୟୀ ସ୍ଥିତି। ତେବେ ଏଭଳି ପରିସ୍ଥିତିରେ ପରିବର୍ତ୍ତନ ଅଣାଯିବ ଆବଶ୍ୟକ ବୋଲି ସେ ମତ ଦେଇଥିଲେ।
ରାଷ୍ଟ୍ରପତି ଭବନରେ ପ୍ରଧାନମନ୍ତ୍ରୀ ମୋଦି ଜର୍ମାନ୍ ଚାନ୍ସେଲରଙ୍କୁ ସ୍ବାଗତ କରିଥିଲେ। ଭାରତ ଓ ଜର୍ମାନୀ ମଧ୍ୟରେ ଘନିଷ୍ଠ ସମ୍ପର୍କ ରହିଥିବା ମର୍କେଲ କହିଛନ୍ତି। ପଞ୍ଚମ ଆନ୍ତଃସରକାର ପରାମର୍ଶ ଆଲୋଚନାରେ ଭାଗନେବା ଲାଗି ଭାରତ ଆସିଥିବାରୁ ସେ ବହୁତ ଖୁସି ବୋଲି କହିବା ସହିତ ଭବ୍ୟ ସ୍ବାଗତ ସମ୍ବର୍ଦ୍ଧନା ପାଇଁ ଧନ୍ୟବାଦ ଜଣାଇଥିଲେ। ମର୍କେଲଙ୍କ ସହ ଜର୍ମାନୀର ବହିର୍ବ୍ୟାପାର, ବିଜ୍ଞାନ ଓ ଶିକ୍ଷା, ଖାଦ୍ୟ ଓ କୃଷିମନ୍ତ୍ରୀ ଏବଂ ଅଫିସରମାନଙ୍କ ଏକ ପ୍ରତିନିଧି ଦଳ ଭାରତ ଆସିଛନ୍ତି। ମର୍କେଲ ଅସୁସ୍ଥ ଥିବାରୁ ଜର୍ମାନୀ ସରକାରଙ୍କ ଅନୁରୋଧକ୍ରମେ ଜାତୀୟ ସଂଗୀତ ଗାନବେଳେ ତାଙ୍କୁ ବସି ରହିବା ଲାଗି ଅନୁମତି ଦିଆଯାଇଥିଲା।
