ନୂଆଦିଲ୍ଲୀ,୨୪।୮: ଅଗଷ୍ଟ ମାସ ଭାରତୀୟ ଜନତା ପାର୍ଟି(ଭାଜପା) ପାଇଁ ଅଶୁଭ ବୋଲି ଆଲୋଚନା ହେଉଛି। କାରଣ ଅଗଷ୍ଟ ମାସରେ ହିଁ ଭାଜପା ତା’ର କେତେଜଣ ବରିଷ୍ଠ ନେତାଙ୍କୁ ହରାଇ ସାରିଲାଣି। ପ୍ରଥମେ ଯଦି ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ କଥା କୁହାଯାଏ ତେବେ ବେଶ୍ କିଛି ଦିନର ଅସୁସ୍ଥତା ପରେ ସେ ଗତବର୍ଷ ଅଗଷ୍ଟ ୧୬ରେ ଶେଷ ନିଃଶ୍ୱାସ ତ୍ୟାଗ କରିଥିଲେ। ସେହିପରି ଚଳିତ ବର୍ଷ ଅଗଷ୍ଟ ୭ରେ ପୂର୍ବତନ କେନ୍ଦ୍ରମନ୍ତ୍ରୀ ସୁଷମା ସ୍ବରାଜଙ୍କର ପରଲୋକ ହୋଇଥିଲା। ଏତିକିରେ ସରି ନ ଥିଲା ଭାଜପା ନେତାଙ୍କ ନିଧନ। କିଛିଦିନ ହେବ ଅସୁସ୍ଥ ଥିବା ମଧ୍ୟ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପା ନେତା ବାବୁଲାଲ ଗୌରଙ୍କର ଅଗଷ୍ଟ ୨୧ରେ ପରଲୋକ ହୋଇଥିଲା। ଆଉ ଏବେ ଅଗଷ୍ଟ ଶେଷ ବେଳକୁ ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କର ଅଗଷ୍ଟ ୨୪ରେ ପରଲୋକ ହୋଇଛି। ଏମିତି ଅଗଷ୍ଟରେ ଚାରି ଚାରି ଜଣ ବରିଷ୍ଠ ନେତାଙ୍କୁ ହରାଇଛି ଭାଜପା।
