ମୁମ୍ବାଇ,୫-୧୦: ଦେଶର ବ୍ୟାଙ୍କିଙ୍ଗ ବ୍ୟବସ୍ଥାକୁ ନେଇ ଲୋକଙ୍କ ମନରେ ବିଭିନ୍ନ ଆଶଙ୍କା ଉପୁଜୁଥିବା ବେଳେ ଏହାକୁ ନେଇ ରିଜର୍ଭ ବ୍ୟାଙ୍କଗଭର୍ନର ନିଜର ପ୍ରତିକ୍ରିୟା ରଖିଛନ୍ତି। ବ୍ୟାଙ୍କିଙ୍ଗ ସିଷ୍ଟମକୁ ନେଇ ଭୟଭୀତ ହେବାର କୌଣସି ଆବଶ୍ୟକତା ନାହିଁ ବୋଲି ସେ ଶୁକ୍ରବାର କହିଛନ୍ତି। ରାଷ୍ଟ୍ରାୟତ୍ତ ବ୍ୟାଙ୍କ ସମେତ ସମବାୟ ବ୍ୟାଙ୍କଗୁଡିକର ସ୍ଥିତି ଭଲ ରହିଛି ଏବଂ ସ୍ଥିତାବସ୍ଥା ବଜାୟ ରହିବ ବୋଲି ସେ ଲୋକମାନଙ୍କୁ ଆଶ୍ୱାସନା ଦେଇଛନ୍ତି। ପଞ୍ଜାବ ମହାରାଷ୍ଟ୍ର କୋଅପରେଟିଭ (ପିଏମ୍ସି) ବ୍ୟାଙ୍କରେ ହୋଇଥିବା ଋଣ ଠକେଇ ମାମଲା ଉପରେ ବର୍ତ୍ତମାନ ନଜର ରଖାଯାଇଛି। ସମବାୟ ବ୍ୟାଙ୍କଗୁଡିକ ଲାଗି ରହିଥିବା ନିୟାମକ ବ୍ୟବସ୍ଥା ଉପରେ ସରକାରଙ୍କ ସହ ଆଲୋଚନା କରାଯିବ ବୋଲି ସେ ସ୍ପଷ୍ଟ କରିଛନ୍ତି।
ବିଭିନ୍ନ ସମୟରେ ଲୋକଙ୍କ ମନରେ ଭୟ ସଞ୍ଚାର କରିବା ଲାଗି ଘଟଣାକୁ ଭିନ୍ନ ଢଙ୍ଗରେ ଦେଖାଯାଉଛି। ମାତ୍ର ଲୋକମାନେ ଏହାକୁ କର୍ଣ୍ଣପାତ ନ କରି ନିଶ୍ଚିତ ରହିବାକୁ ସେ ନିବେଦନ କରିଛନ୍ତି। ବିଭିନ୍ନ ଅନୀୟମିତତା ଧରାପଡିବା ପରେ କେନ୍ଦ୍ରୀୟ ବ୍ୟାଙ୍କ ପିଏମ୍ସି ଉପରେ ବିଭିନ୍ନ କଟକଣା ଲଗାଇଛନ୍ତି। ରିୟଲ ଇଷ୍ଟେଟ ସଂସ୍ଥା ଏଚ୍ଡିଆଇଏଲ୍କୁ ଏହା ବୃହତ୍ତ ପରିମାଣର ଋଣ ଦେଇ ଦେଇଥିବା ବେଳେ ଉକ୍ତ ଦେବାଳିଆ ହୋଇଯାଇଛି। ଏଭଳି ଘଟଣା ସାମ୍ନାକୁ ଆସିଲେ ଆର୍ବିଆଇ କାର୍ଯ୍ୟାନୁଷ୍ଠାନ ନେଇଥାଏ। ଲୋକମାନଙ୍କ ଉପରେ ଲାଗିଥିବା ଉଠାଣ କଟକଣାକୁ ୧ ହଜାରରୁ ପରିବର୍ତ୍ତନ କରି ୧୦ ହଜାର ଏବଂ ଏବେ ଏହା ୨୫,୦୦୦କୁ ବୃଦ୍ଧି କରାଯାଇଛି। ସମବାୟ ବ୍ୟାଙ୍କଗୁଡିକ ଲାଗି ରହିଥିବା ନିୟମାବଳୀକୁ ଆର୍ବିଆଇ ବର୍ତ୍ତମାନ ତର୍ଜମା କରୁଥିବା ସେ ପ୍ରକାଶ କରିଛନ୍ତି।
