ନୂଆଦିଲ୍ଲୀ,୧୩-୮: ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) କ୍ରମାଗତ ଚତୁର୍ଥ ଥର ରେପୋ ରେଟ୍ ହ୍ରାସ କରିଛନ୍ତି। ଅଥଚ ବ୍ୟାଙ୍କଗୁଡ଼ିକ ଏହାର ସମ୍ପୂର୍ଣ୍ଣ ଫାଇଦା ଗ୍ରାହକଙ୍କୁ ଦେଉନାହାନ୍ତି। ଏହାକୁ ନେଇ କ୍ଷୁବ୍ଧ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ୟାଙ୍କଗୁଡ଼ିକୁ ରେପୋ ରେଟ୍ ହ୍ରାସର ଫାଇଦା ଗ୍ରାହକଙ୍କୁ ଦେବାକୁ ଆହ୍ବାନ ଦେଇଛନ୍ତି। ସେ କହିଛନ୍ତି ଯେ, ଦୈନିକ ଭିତ୍ତିରେ ବ୍ୟାଙ୍କଗୁଡ଼ିକ ନିଜର ନିଷ୍ପତ୍ତି ନ ନେଲେ ଦେଶର ଅର୍ଥନୀତି ଆଗେଇବ ନାହିଁ।
ଗଣମାଧ୍ୟମ ସହ ସାକ୍ଷାତକାର ବେଳେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ବ୍ୟାଙ୍କଗୁଡ଼ିକୁ ଦୈନିକ ଭିତ୍ତିରେ ସମସ୍ୟାକୁ ବୁଝି ଏହାର ସମାଧାନ କରିବାକୁ ହେବ। ଆର୍ଥିକ ନୀତି ପ୍ରଣୟନ କ୍ଷେତ୍ରରେ ବଜେଟ କାର୍ଯ୍ୟାରମ୍ଭ କରିବା କିମ୍ବା ଶେଷ କରିବାର ମାଧ୍ୟମ ହେବା ଅନୁଚିତ୍। ଏହାକୁ ବୁଝାଇବାକୁ ଯାଇ ସେ କହିଛନ୍ତି ଯେ, ଦେଶର ଆର୍ଥିକ ପ୍ରଗତିର ମାନେ ହେଉଛି ସମ୍ପତ୍ତି ସୃଷ୍ଟି କରିବାକୁ ବୁଝାଇବ। ଏହାର ଅର୍ଥାତ୍ ଲୋକଙ୍କ ନିକଟରେ ଖର୍ଚ୍ଚ କରିବା ଲାଗି ଅଧିକ ଅର୍ଥ ରହିବା ଆବଶ୍ୟକ। ଦୀର୍ଘମିଆଦି ଭିତ୍ତିରେ ଦେଶର ଅର୍ଥନୀତିକୁ ଆଗେଇ ନିଆଯାଉଛି। ଉଲ୍ଲେଖଥାଉ କି, ଦେଶକୁ ୫ ଲକ୍ଷ କୋଟି ଡଲାର ଅର୍ଥନୀତି ଆଡକୁ ନେଇଯିବା ଲାଗି ମୋଦି ସରକାର ଉଦ୍ୟୋଗ ଜଗତରେ ନିବେଶ ବୃଦ୍ଧି କରିବା ଉପରେ ଜୋର୍ ଦେଇଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ, ସରକାର ଚାହୁଁଛନ୍ତି ନିବେଶ ବୃଦ୍ଧି କରି ନିବେଶକାରୀ ସେଥିରୁ ଅଧିକ ଲାଭ ଉଠାନ୍ତୁ। ଏହାଦ୍ୱାରା ଦେଶରେ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ ଏବଂ ଦେଶର ଅର୍ଥନୀତିର ବିକାଶ ହେବ। ଉଦ୍ୟୋଗ ଜଗତ ଦ୍ରୁତଗତିରେ ଉତ୍ପାଦନ ବଢ଼ାଇ ଦେଶ ସମେତ ବିଦେଶରେ ନିଜର ଉପସ୍ଥିତି ଜାହିର କରିବା ଆବଶ୍ୟକ ବୋଲି ସେ କହିଛନ୍ତି।
