ବ୍ରିସବେନ,୧୨।୧ (ଏଏଫପି)- ଚେକ ଗଣରାଜ୍ୟ ମହିଳା ଟେନିସ ତାରକା କାରୋଲିନା ପ୍ଲିସ୍କୋଭା ବ୍ରିସ୍ବେନ ଇଣ୍ଟରନ୍ୟାଶନାଲ ଟାଇଟଲ ହାସଲ କରିଛନ୍ତି। ସ୍ଥାନୀୟ ପାଟ ରାଫ୍ଟର ଏରିନାରେ ରବିବାର ଖେଳାଯାଇଥିବା ଫାଇନାଲ ମ୍ୟାଚ୍ରେ ବିଶ୍ୱର ୨ ନମ୍ବର ଖେଳାଳି ପ୍ଲିସ୍କୋଭା ୬-୪, ୪-୬, ୭-୫ ସେଟ୍ରେ ଆମେରିକାର ମାଡିନସନ କେଜଙ୍କୁ ମାତ୍ର ୨ ଘଣ୍ଟା ୭ ମିନିଟ୍ ମଧ୍ୟରେ ପରାସ୍ତ କରି ଚାମ୍ପିୟନ ହୋଇଛନ୍ତି। ଏହି ବିଜୟ ବର୍ଷର ପ୍ରଥମ ଗ୍ରାଣ୍ଡସ୍ଲାମ ଅଷ୍ଟ୍ରେଲିଆନ ଓପନ ଟେନିସ ପାଇଁ ପ୍ରସ୍ତୁତିରେ ସହାୟକ ହେବ ବୋଲି ପ୍ଲିସ୍କୋଭା କହିଛନ୍ତି। ଏଥିସହିତ ପ୍ଲିସ୍କୋଭା କ୍ୟାରିୟରର ତୃତୀୟ ବ୍ରିସ୍ବେନ ଓ ୧୬ତମ ଡବ୍ଲ୍ୟୁଟିଏ ଟାଇଟଲ ହାସଲ କରିଛନ୍ତି। ତେବେ ପ୍ଲିସ୍କୋଭା ଏପର୍ଯ୍ୟନ୍ତ କୌଣସି ଗ୍ରାଣ୍ଡସ୍ଲାମ ସିଙ୍ଗଲ୍ସ ଟାଇଟଲ ହାସଲ କରିପାରି ନାହାନ୍ତି। ଏହାପୂର୍ବରୁ ଶନିବାର ରାତିରେ ଖେଳାଯାଇଥିବା ସେମିଫାଇନାଲରେ ପ୍ଲିସ୍କୋଭା ଆମେରିକାର ନାଓମି ଓସାକାଙ୍କୁ ୬-୭,୭-୬, ୬-୨ ସେଟରେ ପରାସ୍ତ କରି ଫାଇନାଲରେ ପ୍ରବେଶ କରିଥିଲେ। ବିଜୟୀ ହେବା ପାଇଁ ପ୍ଲିସ୍କୋଭାଙ୍କୁ ମାରାଥନ ୩ ଘଣ୍ଟା ଆବଶ୍ୟକ ହୋଇଥିଲା।
