ଆନନ୍ଦପୁର,୩୧।୭(ସ୍ବ.ପ୍ର.) : କେନ୍ଦୁଝର ଜିଲା ଆନନ୍ଦପୁର ବିଦ୍ୟୁତ୍ ବିଭାଗର ମନମାନି ଯୋଗୁ ଉପଭୋକ୍ତା ଶୋଷଣର ଶିକାର ହେଉଥିବା ଅଭିଯୋଗ ହେଉଛି। ବିନା ସୂଚନାରେ ବାରମ୍ବାର ବିଦ୍ୟୁତ୍ କାଟ, ସାମାନ୍ୟ ପତ୍ର ହଲିଲେ ଲାଇନ୍ ସଂଯୋଗ ବିଚ୍ଛିନ୍ନ ପରେ ଏବେ ବିଲ୍ ଉପଭୋକ୍ତାଙ୍କ ଚିନ୍ତାର କାରଣ ସାଜିଛି। ମାସିକିଆ କରାଯାଉଥିବା ମିଟର୍ ରିଡିଂ ନିୟମିତ କରାନଯାଇ କେବଳ ମାସେ ୧୦ ଦିନ ତ ଆଉ କେତେବେଳେ ୨୦ଦିନର ରିଡିଂ ନିଆଯାଇ ଉପଭୋକ୍ତାଙ୍କୁ ବିଲ୍ ଦିଆଯାଉଛି। ଆଉ କେତେବେଳେ ଦୁଇ ମାସର ବିଲ୍ ଏକ ସଙ୍ଗରେ ଦିଆଯାଉଛି। ଫଳରେ ଉପଭୋକ୍ତାଙ୍କ ଉପରେ ବିଦ୍ୟୁତ ବିଲ୍ର ବୋଝ ବଢ଼ିଯାଉଛି ବୋଲି ଅଭିଯୋଗ କରିଛନ୍ତି ବରିଷ୍ଠ ଆଇନଜୀବୀ ଲକ୍ଷ୍ମୀଧର ମିଶ୍ର ଏବଂ ଅବସରପ୍ରାପ୍ତ ସୈନିକ ମୁରଲୀଧର ମିଶ୍ର। ଉପଭୋକ୍ତାଙ୍କ କହିବା ଅନୁଯାୟୀ, ଅଧିକ ଦିନର ବିଲ୍ ଏକା ସାଙ୍ଗରେ ଦେବା ଫଳରେ ୟୁନିଟ୍ ପିଛା ରେଟ୍ ବୃଦ୍ଧି ପାଉଛି। ଯାହା ପଇଠ କରିବା କଷ୍ଟକର ହୋଇପଡୁଛି। ଏହାକୁ ନେଇ ଜନଅସନ୍ତୋଷ ବୃଦ୍ଧି ପାଉଛି। ଅନ୍ୟପକ୍ଷରେ ତଦନ୍ତ କରି ପଦକ୍ଷେପ ନେବେ ବୋଲି ବିଦ୍ୟୁତ ବିଭାଗ ନିର୍ବାହୀ ଯନ୍ତ୍ରୀ ଚିତ୍ତରଞ୍ଜନ ମିସ୍ତ୍ରୀ କହିଛନ୍ତି।
