ନୂଆଦିଲ୍ଲୀ,୧୪।୧୦: ନେଦରଲ୍ୟାଣ୍ଡସ୍ର ରାଜା ଓ୍ବିଲିୟମ ଆଲେକଜାଣ୍ଡର ଓ ରାଣୀ ମାକ୍ସିମା ସୋମବାର ରାଜଘାଟଠାରେ ଜାତିର ପିତା ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ଏହି ରାଜ ଦମ୍ପତି ୫ ଦିନିଆ ଭାରତ ଗସ୍ତରେ ଆସି ରବିବାର ନୂଆଦିଲ୍ଲୀଠାରେ ପହଞ୍ଚିଥିଲେ। ବିମାନ ବନ୍ଦରରେ ତାଙ୍କୁ ଭବ୍ୟ ସ୍ବାଗତ କରାଯାଇଥିଲା। ଏହାପରେ ସେ ରାଷ୍ଟ୍ରପତି ରାମନାଥ କୋବିନ୍ଦ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ୍ କରିଥିଲେ। ଏହା ରାଜା ଆଲେକଜାଣ୍ଡରଙ୍କର ପ୍ରଥମ ଭାରତ ଗସ୍ତ। ଦିଲ୍ଲୀରେ ସେମାନେ ୨୫ ତମ ପ୍ରଯୁକ୍ତି ବିଦ୍ୟା ଶୀର୍ଷ ସମ୍ମିଳନୀରେ ଯୋଗ ଦେବା ପରେ ମୁମ୍ବାଇ ଓ କେରଳ ଗସ୍ତ କରିବାର କାର୍ଯ୍ୟକ୍ରମ ରହିଛି। ଡଚ୍ ଦମ୍ପତିଙ୍କ ଏହି ଗସ୍ତ ଭାରତ ଓ ନେଦରଲାଣ୍ଡସ୍ ମଧ୍ୟରେ ଆର୍ଥିକ ଓ ରାଜନୈତିକ କ୍ଷେତ୍ରରେ ମଜଭୁତ ସମ୍ପର୍କ ବୃଦ୍ଧି କରିବ ବୋଲି କୁହାଯାଉଛି।
