ଭୁବନେଶ୍ୱର,୧୦।୨(ବ୍ୟୁରୋ): ମଧ୍ୟପ୍ରଦେଶ ଓ ଛତିଶଗଡ଼ରେ ସୃଷ୍ଟ ଘୂର୍ଣ୍ଣିବଳୟ ପ୍ରଭାବରେ ଓଡ଼ିଶାରେ ଗତ ୩ଦିନ ଧରି ବର୍ଷା ଲାଗିରହିଛି। ରବିବାର ରାଜ୍ୟର ବିଭିନ୍ନ ସ୍ଥାନରେ ବର୍ଷା ହୋଇଥିବାବେଳେ କେନ୍ଦୁଝରରେ ସର୍ବାଧିକ ୨୨.୪ ମିମି ବର୍ଷା ରେକର୍ଡ କରାଯାଇଛି। ସେହିଭଳି ବୌଦ୍ଧ ୧୫.୩, ଦାରିଙ୍ଗବାଡ଼ି ଓ ତାଳଚେର ୧୩, ପାରଳାଖେମୁଣ୍ଡି ୧୨.୫, ଫୁଲବାଣୀ ଓ ଟିଟିଲାଗଡ଼ ୧୨, ବାଲେଶ୍ୱର ୧୦.୫, ସୋନପୁର ଓ ଅନୁଗୋଳ ୧୦, କଟକ ୯.୨, କୋରାପୁଟ ୮.୬, ବଲାଙ୍ଗୀର ୭, ଚାନ୍ଦବାଲି ୬, ଗୋପଳପୁର ୫.୮, ଭୁବନେଶ୍ୱର ଓ ସମ୍ବଲପୁର ୪.୪ ଓ ସୁନ୍ଦରଗଡ଼ରେ ୪ ମିମି ବର୍ଷା ହୋଇଥିବା ରେକର୍ଡ କରାଯାଇଛି। ଏହାସହ ରବିବାର କୋରାପୁଟ ଓ ସୁନ୍ଦରଗଡ଼ରେ ସର୍ବନିମ୍ନ ୧୦ ଡିଗ୍ରୀ ତାପମାତ୍ରା ରହିଥିଲା। ତେବେ ସୋମବାରଠାରୁ ଆଉ ବର୍ଷା ହେବ ନାହିଁ। ବର୍ଷା କମିଲେ ମଧ୍ୟ ପ୍ରବଳ ଶୀତ ଥରାଇବ। ତାପମାତ୍ରା ୩ରୁ ୫ ଡିଗ୍ରୀ ଖସିବ ବୋଲି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ଆଶଙ୍କା କରିଛି। ସୋମବାର ପ୍ରବଳ ଶୀତ ନେଇ ସୁନ୍ଦରଗଡ଼, ବାଲେଶ୍ୱର, ଅନୁଗୋଳ, କଟକ, ସୋନପୁର ଓ ବଲାଙ୍ଗୀର ଆଦି ୬ଜିଲାକୁ ୟେଲୋ ଓ୍ବାର୍ନିଂ ଜାରି କରାଯାଇଛି। ଏହାସହ କିଛି ଜିଲାରେ ଘନ କୁହୁଡ଼ିର ଆସ୍ତରଣ ମଧ୍ୟ ଦେଖିବାକୁ ମିଳିପାରେ। ଏନେଇ ସୋମବାର ବଲାଙ୍ଗୀର, କଳାହାଣ୍ଡି, କନ୍ଧମାଳ, ରାୟଗଡ଼ା, କୋରାପୁଟ ଓ ଅନୁଗୋଳ ଆଦି ୬ ଜିଲାକୁ ୟେଲୋ ଓ୍ବାର୍ନିଂ ଜାରି କରାଯାଇଛି। ସେହିଭଳି ମଙ୍ଗଳବାର ଘନ କୁହୁଡ଼ି ନେଇ ବଲାଙ୍ଗୀର, କଳାହାଣ୍ଡି, କନ୍ଧମାଳ ଓ କୋରାପୁଟ ଆଦି ୪ଜିଲାକୁ ୟେଲୋ ଓ୍ବାର୍ନିଂ ଜାରି ହୋଇଛି।
